Bugun O'zbekiston Kubogining 1/8 finalning javob uchrashuvlari bo'lib o'tadi. Xususan "Bunyodkor" o'z maydonida "Obod"ni qabul qiladi. Dastlabki uchrashuvda tomonlar 2:2 hisobida durang natija qayd etishgandi. Javob uchrashuvi oldidan "Obod" darvozaboni Dilshod Hamroev UFF.uz internet portaliga o'z fikrlarini bildirib o'tdi.
- Bu javob uchrashuviga jiddiy tarzda tayyorgarlik ko'rdik, - deb gap boshladi Hamroev. Xabaringiz bor, "Bunyodkor" chempionatimizning grand jamoalaridan biri hisoblanadi. Ularga qarshi o'yin ko'rsatish doimo qiziqarli kechgan. Shu boisdan bahsning qiziqarli o'tishiga shubham yo'q.
- Dastlabki uchrashuvda tomonlar jangovar durang qayd etishgandi. Endi sizlarni faqat g'alaba kelasi bosqichga olib chiqadi...
- Ha, to'g'ri aytdingiz. Bizni faqat g'alaba qoniqtiradi. "Bunyodkor" kuchli raqib. Xudo xohlasa, g'alaba tomon intilamiz. Barchasi o'z qo'limizda.
- Joriy yilda "Obod" jamoasi oliy ligada debyut mavsumini o'tkazmoqda. Biroq chempionatda natijalar ko'ngildagidek ketmayapti. Bunga nima sabab bo'lmoqda?
 - Bu borada biror nima deya olmayman. Chunki biz har bir o'yinda g'alaba qozonish uchun kurashmoqdamiz. Futbolda kimdir yutadi va yana qaysidir taraf yutqazadi. Futbolchilar g'alaba uchun kurashayotgan bo'lishiga qaramay, omad etishmasligi sezilib qolinmoqda.

— deya xabar beradi uff.uz nashri.