Ma'lumki, futbol bo'yicha milliy chempionatlar aksariyat hollarda uzoq muddat davom etadi. Boz ustiga, dastlabki turlardagi nisbiy beqarorlikdan so'ng turnir jadvallarida odatdagi ko'nikilgan marom kuzatiladi. Ispaniya primerosi yoki Germaniya bundesligasida chempionlik uchun kurash deyarli barchaga tanish jamoalar o'rtasida kechishi fikrimizning yaqqol dalilidir. To'g'ri, «Barselona» va «Real», «Bavariya» va «Borussiya» D. muxlislari uchun chempionat bahslari hamisha qiziqarli hisoblanadi. Ammo futbolga muxlislik sarhadlari nihoyatda keng va bu chegaralar faqat o'sha mashhur klublarga tarafkashlik bilangina belgilanmaydi. Demoqchimizki, futbol dunyosida boshqa jamoalarning ham ashaddiy muxlislari borki, turnir jadvallarida etakchilarning o'zgarmasligi yoxud o'zgarishiga umidning yo'qligi ular uchun zerikarli jarayondir. Shu ma'noda kubok bahslari milliy chempionatlar muhiti uchun chinakam raqobatbardosh musobaqa, ta'bir joiz bo'lsa, bir xil maromga qarshi ajabtovur raddiyadir. Kubok bahslari har qaysi futbol muhitida yuzaga kelishi ehtimoli bor zerikarli maromni buzib yuborishga moyil qizg'inlikdir. Bu olishuvlar juda tez ko'zga tashlanadigan natijalari bilan muxlislarni quvontiradi yoki iztirobga soladi. Deylik, «Bavariya»ning yana chempionlik taxtiga ko'tarilishi «Borussiya» D. uchun adolatsizlikdir. Ehtimolki, dortmuntliklar o'zlarini myunxenliklardan kuchliroq sanashar. Har holda, «Bavariya»ning aynan Dortmund klubi etakchi futbolchilari evaziga kuchayib olishi odat tusiga kirgan. Shunday vaziyatda kubok bahslaridagi to'qnashuv masalaga oydinlik kiritish borasida o'ziga xos yangi imkondir. Qarangki, Germaniya kubogi finali haqiqatan ham, ikki klubning printsipial kurashiga aylanib ketdi. Finaldagi mag'lubiyatdan so'ng dortmundlik muxlislarning ko'ngillari ancha «joyiga tushgan» bo'lsa, ajabmas. Zero, ularning klublari «Bavariya»ga nisbatan kuchsizroq ekanligi amalda yana bir bor o'z isbotini topdi. Agar kubok bahslari bo'lmaganida, dortmundlik muxlislar qalbidagi ichki iztirob voqelikka nisbatan noo'rin adolatsiz kayfiyatni shakllantirardi, ehtimol.  Angliya kubogi finali esa APL sovrindorlari ishtirokisiz o'tdiki, mazkur holat ham muxlislarda ing­liz futboliga qiziqish tuyg'usini yanada kuchaytirdi. Ayni chog'da kubok sohibi bo'lish - sovrindorlar safidan o'rin ololmagan «MYu» va uning tanqidlardan bezigan ustozi Lui van Gal uchun qaysidir ma'noda tasallidir. Shu tasalli ta'sirida «MYu» yana yangi marralar sari boraveradi, Lui van Gal muxlislar ko'ziga tik boqaveradi. Kubok bahslarisiz bu kabi g'alati haqiqatlarni qaror toptirish mushkul. Ochig'i, finalchi - «Kristal Pe­les»ga ham ofarin aytmoq joiz. Jamoa so'nggi hushtak chalinishi arafasida tayyor g'alabani qo'ldan boy berdi. Alan Pardyu shogirdlarini har qancha olg'a undamasin, «MYu» baribir, g'oliblik so'zini aytdi. Qolaversa, «overtaym»ning so'nggi lahzalarida David de Xea shunday jonbozlik va qahramonlik  ko'rsatdiki, uning ajo­yib harakatlarisiz «MYu» qiyin ahvolda qolishi tayin edi. Ushbu darvozabonning yakunlangan mavsumda EL ramziy termasiga kiritilishi futboldagi yana bir haqiqatning tantanasidir. «Kristal Pelas» esa finalchi va ingliz futbolining noodatiy namoyishi vakili sifatida muxlislar hurmatini qozondi. Ha, chempionlik unvonisiz ham shunday hurmatga erishish mumkin futbolda. Yo'q, nainki futbol, balki sportning boshqa turlarida ham muxlislar muhabbatiga sazovor bo'lish imkoni hamisha mavjud. Shu jumladan, xokkeyda ham. Ana, ayni shu mulohazalar yozilayotgan bir pallada Rossiya terma jamoasi amerikalik xokkeychilarni 7:2 hisobida mag'lubiyatga uchratdi. Tabiiyki, rus xokkeyi ixlosmandlari bundan benihoya shodlanishdi. Chunki an'anaviy va printsipial raqibni 3-o'rin uchun bahsda engish ular uchun hayot-mamot jangi hisoblanardi. Hattoki, xokkey bo'yicha jahon chempionati Rossiyada bo'lib o'tgani, mezbonlarning yarim finalda Finlyandiya termasiga imkoniyatni boy berishgani ham shu g'alaba ta'sirida bir muddat unutildi. Umuman olganda, tinimsiz davom etayotgan doping mojarolaridan toliqqan Rossiya sporti shu yutuq tufayli qaddini biroz tikladi. Mazkur qad rostlashda boshqa bir kichik yangilikning ham munosib hissasi bor, fikrimizcha. Gap shundaki, «Shalke» klubi a'zosi Roman Noyshtedter nihoyat, Rossiya terma jamoasidan taklif oldi va Evro-2016ga boradigan tarkibga qo'shildi. Etiborlisi, u Leonid Slutskiy qo'l ostidagi yagona ligionerdir. Rossiya futboliga oid yangilik shu bilan tugamaydi. Biz bu o'rinda «Rostov» erishgan ulkan yutuqni nazarda tutmoqdamiz. Moskva «Dinamo»sining premer-ligadan tushib ketishi esa, muxlislar uchun aks xabardir. «Rostov» endi yangi mavsumda EChLda ishtirok etadi va bu Qurbon Berdiev fenomenining yangi muhim g'alabasidir. To'g'ri, «Rostov»ga «Lester» kabi chempionlik nasib etmadi, lekin uning «Zenit» «Krasnodar», «Spartak», «Lokomotiv» singari Rossiyaning grand klublarini ortda qoldirgani tahsinga loyiq. Birgina «Zenit» tarkibini eslashning o'ziyoq Qurbon Berdiev naqadar ulkan yutuqni qo'lga kiritganini ko'rsatadi. Klau­dio Ranerining uchinchi darajali «Italiya respublikasi oldidagi xizmatlari uchun» ordeni bilan taqdirlanishi esa, Qurbon Berdiev ham shunday ehtiromga munosib, degan taassurot uyg'otadi kishida. Bu murabbiy avval «Rubin», mana endi «Rostov»dek o'rtamiyona klubda ishlab, evroarenaga chiqdiki, uning bunday qat'iyati va izlanishlari bizning murabbiylar uchun ibrat ko'zgusidir. Murabbiylarimiz shu ibrat ko'zgusiga o'zlarini solsalar, qayta taftish qilsalar foydadan xoli bo'lmasdi. Negaki, ularning ko'plari qo'l ostilarida mahoratli futbolchilar to'p surmasligidan nolishadi odatda. Holbuki, g'alabalar aslida mahoratli futbolchilar emas, balki murabbiyning qat'iyati va izlanishlaridan boshlanishini Qurbon Berdiev bir necha bor isbotlab berdi millionlar o'yini olamiga. Xullas, evrofutboldagi yangiliklar, kubok bahslari bizni yuqoridagi kabi mulohazalarga chorladi. Eng ajablanarlisi, evrofutbolning ikkinchi darajali musobaqasi bo'lmish EL finalida ikki chempionatning sovrinsiz qolgan klublari kuch sinashishdi. Mantiq va darajaga muvofiq, ishtirok bu. Futbolning hayratlanarli adolati ham shu! Davomi InterFUTBOL gazetasi blogida
— deya xabar beradi uff.uz nashri.