O'zbek futbolining afsonalari haqida so'z ketganda benihoya barchamiz An, Fyodorov, Azizxo'jaev, Isoqov, Shkvirin, Qosimov va boshqalarni ko'z oldimizdan o'tkazamiz. Ular darhaqiqat o'zbek futbolining afsonalari hisoblanishadi.
Afsuski, ulardan ayrimlari hozirda bizning oramizda emaslar. Lekin, ular qoldirgan iz o'zbek futbolining tarixidan hech qachon yo'qolib ketmaydi va unutilmaydi.
O'zbek xalqida yaxshi an'analar bor. Insonlarni xotirlab, ularning ruhini shod qilish maqsadida ko'plab tadbirlar uyushtirilib kelinadi.
Mana, bugun ham Toshkentdagi “Chig'atoy” futbol maktabida O'zbekistonda xizmat ko'rsatgan sport ustasi, "Shuhrat" medali sohibi - Akmal Azizxo'jaev xotirasiga bag'ishlangan xotira musobaqasi bo'lib o'tdi.
Unda 2007 yilda ham 2008 yillarda tug'ilgan bolalar o'rtasida katta futbol o'yinlari bo'lib o'tdi.
Jamoalar ikki - "A" va "V" guruhilariga bo'linishdi.
"A" guruhida "Spartak", BO'SM-2, "Lokomotiv" va "Chilonzor" jamoalari o'zaro kurash olib borishdi.
"V" guruhida bo'lsa "Paxtakor", "Bunyodkor", "Spartak"-2 va BO'SM-3 jamoalari bellashuvlarga kirishdilar.
Qiziqarli kechgan bahslarda "Spartak", "Paxtakor", "Bunyodkor" va BO'SM-2 jamoalari yarim finalgacha etib kelishdi.
Yarim finalda "Spartak" "Paxtakor"ni 2:1 hisobda engan bo'lsa, "Bunyodkor" BO'SM-2 jamoasi shu hisobda mag'lubiyatga uchratdi.
Finalda "Spartak" hamda "Bunyodkor" bolalari maydonga chiqishdi. Shiddatlik kechgan o'yin 4:0 hisobi qayd etilib, "Spartak" jamoasining g'alabasi bilan yakunlandi.
Shu tariqa "Spartak" futbolchilari "Akmal Azizxo'jaev" xotirasiga bag'ishlangan xotira musobaqasining bosh sovrinini qo'lga kiritdi.            
— deya xabar beradi uff.uz nashri.