Tajribali jurnalist Alisher Nikimbaev O'zbekiston yoshlar terma jamoasining Osiyo chempionatidagi ishtiroki haqida fikr bildirarkan, avvalgi jamoalar qayd etgan natijalar bilan taqqoslab, Jasur Abduraimov shogirdlari Tokioda 2020 yilda bo'ladigan Olimpiadaga chiqishiga ishonishini aytdi.
- London-2012  uchun kurashgan Olimpiya terma jamoasi 1989-90 yilda tug'ilgan futbolchilardan tashkil topgan edi. Ular 2009 yilda bo'lgan yoshlar o'rtasidagi jahon chempionatida ishtirok etishgan.
Natija - bu jamoa Olimpiadaga chiqa olmadi.
Rio-2016 uchun kurashgan Olimpiya terma jamoasining asosi esa 1993-96 yilda tug'ilgan futbolchilardan iborat bo'ldi va ular 2013 va 2013 yillarda o'tkazilgan yoshlar o'rtasidagi jahon chempionatlarida ishtirok etishdi. Qo'shimchasiga o'smirlar o'rtasida 2011 va 2013 yillarda o'tkazilgan mundiallarda ham to'p surishgan.
Natija - bu jamoa ham Olimpiadaga chiqa olmadi.
Endi Tokio-2020 uchun kurashadigan Olimpiya terma jamoasi tashkil etiladi va uning asosini 1997-2000 yilda tug'ilgan futbolchilar tashkil etishi lozim. Bu futbolchilar endi jahon chempionatida ishtirok eta olmasalar kerak (garchi 1999 yilda tug'ilgan futbolchilarga umid bor bo'lsa-da).
Shunga qaramay aynan shu jamoa Olimpiadaga bora olishiga shaxsan o'zim ishonmoqdaman. Muhimi - avvalgi xatolarni takrorlamasak bo'lgani, - deydi Nikimbaev.
— deya xabar beradi uff.uz nashri.