“Nasaf” jamoasi navbatdagi 28-tur uchrashuvini “Neftchi” jamoasiga qarshi o'tkazadi. Uchrashuv 4 noyabr juma kuni “G'uzor” markaziy stadionida soat 16:00da boshlanadi. Klub matbuot xizmati ushbu bahs oldidan tomonlar borasida ma'lumotlarni taqdim etdi.
Uchrashuv hakami haqida ma'lumot
FIFA hakami Ravshan Ermatov bu yilgi futbol mavsumida jamoamiz ishtirokidagi beshta uchrashuvda hakamlik qilgan. Shulardan uchtasi milliy chempionat bahslari bo'lsa, qolgan ikkitasi kubok uchrashuvlaridir. Jamoamiz ushbu uchrashuvlarning uchtasida g'alaba, bittasida durang va bir uchrashuvda mag'lub bo'lgan.
Jamoalarning o'zaro natijalari teng
Mazkur jamoalar hozirgacha milliy chempionatimizda 39 marta o'zaro bahs olib borishgan. Bo'lib o'tgan uchrashuvlarda jamoalar 15 martadan g'alaba nashidasini surishgan. Ya'ni har ikkala jamoalarning g'alabalar soni teng. Qolgan 9 uchrashuvda murosa ko'chasi tanlangan. To'plar nisbatida kichik ustunlik jamoamiz tomonida - 50:48.
Ushbu jamoalar ilk marta 1997 yili Qarshida o'zaro bahs olib borishgan. Esingizda bo'lsa, “Nasaf” jamoasi o'z tarixidagi ilk oliy liga uchrashuvini o'z maydonida “Neftchi” jamoasiga qarshi uchrashuv bilan boshlagan edi.
Mazkur jamoalar o'rtasidagi Farg'onada bo'lib o'tgan bu yilgi 13-tur uchrashuvida 2:2 hisobi qayd etilgan. Esingizda bo'lsa, uchrashuvda eng tezkor gol, 1-daqiqada Bobir Abduholiqov tomonidan kiritilgan edi. Ammo maydon egalari birinchi bo'limni o'zidayoq hisobni tenglashtirishgan va ikkinchi bo'limda hisobda oldinga o'tib olib, yana o'z darvozalaridan to'p olib chiqishgan. Maydon egalari shuningdek g'alaba qozonish uchun, o'z imkoniyatidan foydalana olishmagan. Shukurali Po'latov 90+3-daqiqada 11 metrlik jarima to'pini golga aylantira olmagan edi.
Qarshidagi uchrashuvlar haqida
Jamoalar Qarshida bo'lib o'tgan 19 uchrashuvda o'zaro bahs olib borishgan. Bo'lib o'tgan 12 uchrashuvda “Nasaf”ning qo'li balan kelgan, 6 uchrashuvda farg'onaliklar g'alabaga erishgan. Qolgan birgina uchrashuvda durang natija qayd etilgan. Qarshida o'tkazilgan uchrashuvlarda darvozalarga jami 51ta gol kiritilgan. To'plar nisbati 33:18ni tashqil etmoqda. Ustunlik jamoamiz tomonida.
“Nasaf” jamoasi o'z muxlislari oldida ilk marta “Neftchi” jamoasi ustidan 2000 yili tarixiy g'alabaga erishgan. Bu uchrashuv 4:2 hisobida yakunlangan. Uchrashuvdagi jamoamiz gollariga Rustam Abdullaev (26), Bahrom Haydarov (28), Zafar Xolmurodov (56), Murod Ismoilov (86)lar mualliflik qilishgan. “Neftchi” jamoasining ikki golini Akmal Xolmatov va Asad Do'rmonovlar kiritishgan.
“Neftchi” jamoasi so'nggi bor 2012 yili Qarshida g'alabaga erishgan. Jamoalar o'rtasidagi yagona va so'nggi durang 1:1 natijasi, 2001 yili qayd etilgan.
Ro'ziqul Berdiev qo'l ostidagi “Nasaf” jamoamiz farg'onaliklar bilan bo'lgan uchrashuvlarda mag'lubiyatsiz seriyalarini davom ettirib kelishmoqda. R.Berdiev shu paytgacha jamoamizni milliy chempionat uchrashuvlarida “Neftchi”ga qarshi etti marta maydonga olib tushgan, shu uchrashuvlarning beshtasida jamoamizning qo'li baland kelgan va ikki uchrashuv durang natija bilan yakunlangan.
Bo'lajak “Nasaf” – “Neftchi” jamoalari o'rtasidagi uchrashuv bu safar ham murosasiz va kurashlarga boy tarzda kechishini shubha qilmasa ham bo'ladi. Shuningdek, jamoamizning keyingi paytda namoyish etayotgan o'yinlari, mamlakatimiz futbol ishqibozlari o'rtasida ham katta qiziqishga sabab bo'lmoqda.
Jamoalarning turnir jadvalidagi holati
Mazkur jamoalarning turnir jadvalidagi holatiga e'tibor qaratsak, jamoamiz o'tgan 27 uchrashuvda 54 ochko jamg'arib, 3-pog'onani band etib turibdi. “Neftchi” jamoasi esa 31 ochko bilan 11-pog'onada bormoqda.
“Nasaf” o'tgan uchrashuvda raqibiga nisbatan kuchli o'yin namoyish etib, mag'lubiyatga uchradi. “Neftchi” jamoasini o'tgan turda buxoroliklar o'z maydonida “xafa” qilishgan.
“Nasaf” – “Neftchi” jamoalari o'rtasidagi uchrashuv G'uzor shahridagi “G'uzor” markaziy stadionida bo'lib o'tishini yana bir marta eslatib o'tamiz. Uchrashuv soat soat 16:00da boshlanadi.
Mazkur jamoalarning o'rinbosarlari o'rtasidagi uchrashuv esa 3 noyabr payshanba kuni Sputnik qo'rg'onidagi yoshlarimiz qarorgohi maydonida soat 15:00da boshlanadi.
O'zPFL, 28-tur. 04.11.2016
“Nasaf” (Qarshi) – “Neftchi” (Farg'ona)
G'uzor sh., “G'uzor” markaziy stadioni. 16:00da
Bosh hakam: Ravshan Ermatov (Toshkent)
Yordamchi hakamlar: Abduhamidullo Rasulov (Toshkent), Jahongir Saidov (Toshkent).
Zaxira hakami: Akobirxo'ja Shukrullaev (Toshkent)
Nazoratchi: Dmitriy Roman (Toshkent)
O'zPFL vakili: Roman Chernikov.
— deya xabar beradi uff.uz nashri.