“Nasaf” jamoasi bugun Toshkentda ikkita o'rtoqlik uchrashuvi o'tkazdi. O'rtoqlik uchrashuvlari “Paxtakor” va “Obod” jamoalari bilan bo'lib o'tdi. “Paxtakor” jamoasi bilan bo'lgan o'rtoqlik uchrashuvi 2:2 hisobida yakun topdi. Uchrashuvdagi jamoamiz gollarini Ognen Krasich va Doniyor Narzullaevlar kiritishdi.  Ushbu uchrashuvda jamoamiz tarkibida bir qator yosh futbolchilar maydonda harakat qilishdi. Jumladan,  Jo'rabek Mannonov, Akbar Murodov, Navro'z Izatillaev va Akmal Olimovlardir. Ular bugun juda yaxshi o'yin ko'rsatishdi. Tushdan keyin “Bunyodkor” futbol akademiyasi maydonida “Obod” jamoasi bilan bo'lgan o'rtoqlik uchrashuvida jamoamiz 3:1 hisobida g'alaba qozondi.  Bu uchrashuvdagi jamoamiz gollariga Shaxboz Erkinov, Dragan Cheran va Ildar Mamatkazinlar mualliflik qilishdi. Ikkinchi nazorat uchrashuvida ham yuqorida nomlari tilga olingan yosh  futbolchilarimiz qatorida Dilshod Xushbakov ham to'p tepdi. Shunisi diqqatga sazovorki, klubimiz qoshidagi futbol maktabida etishib chiqqan yosh futbolchilarimiz, bugungi uchrashuvda asosiy tarkib o'yinchilarimiz bilan hamjihatlikda harakat qilishdi. Jamoamiz o'yinchilariga bugun qisqa muddatli dam olish e'lon qilindi. Endi “Nasaf” jamoasi 14 noyabr kuni Qarshi shahridagi o'z qarorgohida to'liq yig'iladi. Jamoamiz shu kundan, 18 noyabr kuni “So'g'diyona” jamoasi bilan bo'ladigan o'yinga tayyorgarliklarni davom ettiradi. 
— deya xabar beradi uff.uz nashri.