JCh-2018 saralashining hal qiluvchi uchinchi raundi 4-turidan so'ng matbuotda O'zbekiston milliy jamoasi bosh murabbiyi Samvel Babayanning katta intervyusi qatori ayrim sport jurnalistlarining tanqidiy maqolalari chiqdi. Ularni diqqat bilan o'rganish jarayonida bitta masalaga berilgan sub'ektiv baho yuzasidan shaxsiy fikrlarimni bildirishga jazm etdim. Birinchidan, bosh murabbiy himoyasiga qaratilgan fikrlarni bayon qilmoqchiman. Jurnalistlar o'yinga tanlangan tarkibni topish qiyin emasligi va Babayan mudom bir guruh futbolchilarga ishonch bildirayotganini ta'kidlab, tanqidga zo'r berishmoqda. Aytingchi, g'alaba qozongan tarkibni almashtirgan murabbiyni qaerda ko'rgansiz? Bunaqasi hech joyda yo'q. Boz ustiga, Babayanning tarkibga yangi ijrochilarni jalb etmayotgani aytilmoqda. Endi bir eslang, u milliy jamoani qabul qilib olgan payt Eldor Shomurodov, Otabek Shukurov, Javohir Sohibov, Davron Hoshimov kabi yigitlar qaerda edilar? Zaxirada o'tirishgan yoki tarkibdan umuman chetda qolmayotganmidilar? Hozir esa Shomurodov boshlang'ich tarkib futbolchisi, Shukurov, Hoshimov va Sohibov doimo maydonga tushishga shay ishonchli zaxirachilar. Yana Jaloliddin  Masharipov ham shu harakatda. Shuningdek, jamoamizda o'z uslubi yo'qligi, Babayan kelganidan buyon bu borada hech narsa o'zgarmaganini yozishmoqda. Birinchidan, termamizda ruhiy jangovar kayfiyat paydo bo'ldi. Ikkinchidan, o'yinning o'zi nisbatan yig'inchoq ko'rinish oldi. Uchinchidan, futbolchilar o'rtasidagi o'zaro tushunish yaxshilandi va ular tartibliroq harakat qila boshladilar. Oddiy aytganda, ancha qat'iy o'ynash barobarida bo'shashish holatini kamaytirishdi va hakozo. Ikkinchidan, tarkib masalasida gapirmoqchiman. Shubhadan xoli fikrimcha, Aleksandr Lobanov ayni payt yurtimizdagi eng yaxshi darvozabondir. Ehtimol, Ignatiy Nesterov «ramka»da ishonchliroq turar, ammo butun jarima maydoni ichida harakatlanish bobida Sashaga bas kelolmaydi. Ha, menga ham Islom To'xtaxo'jaevning qanot himoyasidagi o'yinlari yoqmaydi. Unda bu chiziqda to'p surish tajribasi yo'qligi sezilyapti. To'g'ri, Islom yaxshi himoyalanadi, biroq orqa chiziqning qanot vakili hujumlarda ham faol qatnashishi kerak. To'xtaxo'jaev esa bunga ulgurmaydi yoki aksincha, ba'zan o'z hududini asossiz tarzda tark etadi. Menimcha, u saviyali stopper va aynan markazda ko'proq naf berishga qodir. Chunonchi, qanot himoya­sidagi o'yin alohida o'rin tutadi. O'ylashimcha, bu joyda Hoshimovdan foydalanish ma'qulroq va qiziqarliroq. Agarda murabbiylar u yoki bu sababga ko'ra, Davron variantini yoqlamasalar, unda qanotga Sanjar Tursunovni jalb etish mumkin. Bilamizki, bu futbolchi qanotda harakatlanish bobida etarli tajribaga ega va yaxshi himoyalanish bilan birga hujumlarga binoyidek qo'shilib turadi. Shuningdek, Fozil Musaevga murojaat qilish uchun ham asoslar yo'q emas. Aytgancha, u qaysidir jihatlari bilan buyuk Kafuni eslatadi. Misol uchun, Vadim Abramov davrida bir qator uchrashuvlarda qanotda harakatlanib, yomon taassurot qoldirmagandi. Umuman olganda, himoyamiz ishonchli, harqalay, boshqa o'yinchilarga deyarli e'tiroz yo'q. Shu o'rinda mavzudan biroz chetga chiqsak. «Bunyodkor»dagi yosh hujumchi Zahibillo O'rinboevning oldingi chiziqda o'ynash istiqboli uncha baland emas, menimcha. Bitta misol: «Spartak» klubi va Rossiya terma jamoasi sobiq futbolchisi Yuriy Nikiforov barchasini hujumchi sifatida boshlagan, hattoki, sobiq ittifoq o'smirlar terma jamoasining eng yaxshi forvardi, deb topilgandi. Aytgancha, o'sha terma jamoa Mirjalol Qosimov sardorligi ostida o'ynagan va jahon chempioni bo'lgandi. Biroq kattalar futboliga o'tish jarayonida Nikoforovni markaziy himoyaga surishgan va u keyinchalik ajo­yib stopper sifatida gavdalangan. O'ylashimcha, Sergey Lushan ham O'rinboevni markiziy himoyada bir sinab ko'rsa, orqa pozitsiya uchun yaxshigina ijrochi kashf etishi mumkin. Ayni payt o'rta chiziq vakillariga e'tirozlarim ko'p, ayniqsa, Sardor Rashidovga. Milliy jamoani sentyabrning ilk kunlaridan hal qiluvchi uchrashuvlar kutib turgan payt futboldan naq 70 kun dam olish (Babayanning so'zi) mumkinmi? Sardor iyul oyidayoq mashg'ulotlarni tig'iz tartibda boshlashi maqsadga muvofiq edi, loaqal «Bunyodkor»da. Menimcha, Lushan bunga qarshilik qilmasdi. Umuman, Rashidovning Qatarga yo'l olishi uning o'sishdan to'xtab qolishiga olib keldi, nazarimda. Bunda hayratlanadigan tomoni yo'q, axir u erdagi futbol saviyasi Evropadagiga nisbatan ancha past. Tushunaman, Sardorni shartnomaning moliyaviy bandlari ko'proq qiziqtirgan, biroq  futbolchi sifatida istiqbolli o'sishdan qolgani masalaning minus tomoni, albatta. Agar ishlar shunday davom etsa, Sardor yaqin orada asosiy tarkibdagi o'rnini ham yo'qotishi hech gap emas. Harqalay, Masharipovdagi o'sish, Marat Bikmaevning barqaror o'ynayotgani va Vagiz Galiulinning tobora sport formasiga kirayotganini inobatga olsak, Rashidov oldida shunday xavf mavjud. Shukurov bo'yicha ham savollar bor. Bu yigitning hujumchi ortida harakatlangan o'yinlarda o'zini qulay sezayotgani shundoq ko'rinib turibdi. Shu ma'noda aytsak, uning goh tayanch zonasiga, goh himoya markaziga ko'chirilishi iqtidorli dispetcherni yo'qotishga olib kelishi mumkin. Misol tariqasida Vladimir Kozakni eslataman. Aslida u Odil Ahmedov darajasidagi kuchli «to'lqinkesar» bo'lib etishish salohiyatiga ega edi. Afsuski, murabbiylar Kozakning pozitsiyasini almashtirishdan charchashmadi - bir qarasangiz, markaziy himoyaga qo'yishdi, boshqa safar qanotga yoki qanot xavbeki nuqtasiga. Oqibatda futbolchi ushbu pozitsiyalarning birortasida o'ynash xususiyatini shakllantirolmadi, boz ustiga, o'z joyida to'p surish ko'nikmasini ham yo'qotdi. Hattoki, buyuk Valeriy Lobanovskiy ham universallikka qarshi bo'lgan. U buni g'oz holatiga o'xshatardi. Ya'ni ikki oyoqda yura oladi, ammo odamlardek emas, uchishni biladi, ammo qaldirg'ochdek emas, suzishni eplaydi, ammo baliqdek emas. Xullas, Lobanovskiyning aqidasiga ko'ra, o'yinchi avvalo, o'z pozitsiya bo'yicha chin professor bo'lishi kerak. Boshqa nuqtalarda to'p surishni esa, faqat o'z pozitsiyasida maksimal darajaga chiqqanidan keyingina o'zlashtirishi mumkin...... Davomi "InterFUTBOL" gazetasida.
— deya xabar beradi uff.uz nashri.