Mana, OFK miqyosidagi JCh-2018 saralashi uchinchi bosqichi 1-davrasi yakuniga ham yaqin keldik. Tan olish kerak, bu safargi saralash bahslari taktik kurashlarga boy o'tyapti. Natijada ko'proq hujumga intilgan jamoalar vakillari  kontsentratsiyani oxirigacha saqlab qololmayaptilar. 5-turda Xitoy va Iroq terma jamoalari yangi bosh murabbiy qo'l ostida nimalarga ulgurishganini kuzatamiz, nasib qilsa. Saudiya Arabistoni termasiga 2ta penalti tufayli yutqazgan iroqliklar yaponlarga qarshi bahsning qo'shimcha daqiqalarida gol qo'yib yuborib, durangni qo'ldan chiqargandilar. Ular bu safar o'zlariga teng raqib - BAA termasiga ro'baro' bo'lishadi. Umuman, barcha jamoalar uchun diqqatni bir joyga jamlab o'ynash vaqti keldi. «A» guruhi XITOY - QATAR Kunming. «Tuodong» stadioni. So'nggi o'zaro o'yin. 2016 yil 29 mart. JCh-2018 saralashi. Xitoy - Qatar - 2:0. Gollar: Xuang Boven (26), Vu Ley (88). Ikki jamoa shu paytgacha jami 16 marta o'zaro uchrashgan. Shu o'yinlarning 7tasi xitoyliklar va 5tasi qatarliklar foydasiga hal bo'lgan, yana 4ta to'qnashuvda durang qayd etilgan. Xitoy va Qatar termalari ilk marta 1978 yilning 9 dekabrida Osiyo o'yinlarida to'qnash kelishgan va Chin yurti vakillari ustun chiqishgan - 3:0. Mundial yo'lidagi to'qnashuvlarni alohida olsak, JCh-90, JCh-98, JCh-2002, JCh-2010 va JCh-2018 saralashi doirasidagi o'zaro o'yinlarning 2tasida Xitoy termasi g'alaba qozongan. Umuman, bu ikki jamoaning mundial yo'lidagi o'zaro o'yinlarida atigi 1 marta nursiz durang (0:0) kuzatilgan. Xitoy termasining yangi bosh murabbiyi Marchello Lippi garchi jamoani mundialga olib chiqish mumkinligini aytayotgan bo'lsada, bu ish juda-juda mushkul. Bemalol taxmin qilish mumkinki, Kunming shahrida bo'ladigan o'yin shiddatli kechadi. Zero, xitoyliklarda ham, qatarliklarda ham yo'qotadigan narsaning o'zi qolmagan. To'g'ri, Qatar terma jamoasi diskvalifikatsiyalar sabab, optimal tarkibga tayanolmaydi. Shunday ekan, mehmonlarda imkoniyat biroz pastroq. Aytish joiz, ushbu o'yinda mag'lubiyatga uchragan jamoa uchun Rossiya-2018 eshiklari yopiladi, hisob. IF taxmini: 50 foiz (Xitoy termasi g'alaba qozonadi) - 25 foiz (durang bo'ladi) - 25 foiz (Qatar termasi g'alaba qozonadi). SURIYa - ERON Paroy (Malayziya). «Tuanku Abdulrahmon» stadioni. So'nggi o'zaro uchrashuv. 2008 yil 14 iyun. JCh-2010 saralashi. Suriya - Eron - 0:2. Gollar: G'ulomrizo Rizoi (64), Muhsin Xalili (90+5). Ikki jamoaning o'zaro o'yinlari soni 26ta. Statistika bo'yicha forslar yaqqol ustun - 14ta g'alaba. Qolgan 12ta uchrashuvning 11tasida kuchlar teng kelgan. Demak, Suriya termasi shu kungacha eronliklarni atigi 1 marta enggan, xolos. Eron - Suriya ko'rinishidagi ilk to'qnashuv 1973 yili JCh-74 saralashi (Osiyo va Okeaniya mintaqasi) doirasida kuzatilgan va unda forslar yagona gol evaziga g'alaba qozonishgan. Mundial yo'lidagi o'yinlarga kelsak, 1974, 1978, 1998 va 2010 yillardagi JCh saralashida Eron termasi 5 marta g'alaba qozongan. Lekin forslar bu o'yinlarda 2tadan ortiq gol urolmaganlar. Ikki jamoa so'nggi marta Damashqda rasmiy o'yin doirasida ro'baro' bo'lgandi. O'shanda suriyaliklarni Muhammad Kvid boshqargan bo'lsa, forslarga Ali Dai ustozlik qilgan. Suriya termasining raqiblarni Malayziyada qabul qilayotgani barcha uchun qo'shimcha muammo tug'diryapti. Xususan, suriyaliklar bilan to'qnash keladigan jamoalar o'yinga tayyorgarlik jarayonida sparring-raqib topishga qiynalishyapti. Bunga Eron termasi yaqqol misol. Zero, forslar Iroq termasi bilan o'rtoqlik o'yini tashkil etishni rejalashtirgandilar, biroq joy masalasida kelisholmadilar. Umuman, Suriya termasi «A» guruhi peshqadamiga yaxshigina qarshilik ko'rsatsa, ajabmas. Chunonchi, eronliklar bo'lajak bahsda Ehson Hojisafi va Sardor Azmun kabi etakchilar xizmatidan foydala olishmaydi. Xullas, Karlush Keyrushning hujumda Mehdi Taremi - Rizo Gujannajot juftligiga ishonishi kutilyapti. Davomi interfutbol.uz saytida.
— deya xabar beradi uff.uz nashri.