Bugun tayyorlov guruhlari – 1998/1999 yillar, O'zbekiston Birinchiligining final uchrashuvi bo'lib o'tdi. Unda “Nasaf” jamoasi “Lokomotiv” jamoasi bilan bahs olib bordi. Uchrashuv juda qiziqarli va keskin kurashlar ostida kechdi. Har ikkala jamoa ham bugun faqat g'alaba uchun maydonga tushgani ko'rinib turdi. Raqiblariga nisbati aniq va mazmunli o'yin ko'rsatgan Nurali Sultonov shogirdlarining ustunligi maydonning har bir nuqtasiga sezilib turdi. Albatta hisob ham ularning ko'rsatgan o'yiniga munosib bo'ldi. Murabbiylarimizning yosh futbolchilarimizda hozirdan iroda va  xarakterni shaklllantirishga va har qanday raqib bilan kurasha olish xususiyatlarini singdirayotgani hamda bu borada olib borayotgan ishlari yaqqol namoyon bo'la boshladi. Bunga misol tariqasida yosh futbolchilarimizning bugungi uchrashuvda ham 90 daqiqa mobaynida bir xil suratda o'yin namoyish etishini aytish mumkin. Bugungi final uchrashuvida ham murabbiylarimizning mehnati va  yosh futbolchilarimizning g'alabaga bo'lgan ishtiyoqi o'z natijasini ko'rsatdi. Futbolchilarimiz raqibini 3:0 hisobida mag'lubiyatga uchratishdi. Uchrashuvdagi jamoamiz gollariga Xudoyorxon Sagdullaev, Islom Kenjaboev (penaltidan) va  Sirojiddin  Ettiboevlar mualliflik qilishdi. “Lokomotiv” jamoasi futbolchilari bu gollarga bitta ham javob qaytara olishmadi. Shunday qilib, 1998/1999 yillarda tavallud topgan futbolchilarimizdan iborat jamoamiz Respublika Birinchiligi g'olibi bo'lishdi! Demak, bu guruhda o'rinlar quyidagicha taqsimlandi: 1-o'rin. “Nasaf” (Qarshi) 2-o'rin. “Lokomotiv” (Toshkent) 3-o'rin. “Neftchi” (Farg'ona) 4-o'rin. “Bunyodkor” (Toshkent) Bugun musobaqa g'oliblarini taqdirlash marosimi ham o'tkazildi. Taqdirlash marosimida O'bekiston PFL sport bo'limi boshlig'i o'rinbosari Roman Mixaylovich Chernikov, “Nasaf” PFK bosh menedjeri Sh.Yarulin, “Nasaf” PFK sport direktori V.Ni, “Nasaf” jamoasi bosh murabbiyi R.Berdievlar ham ishtirok etishdi. Ular tomonidan musobaqa g'oliblariga medal va diplomlar hamda maxsus kuboklar topshirildi. Shu bilan Oliy va birinchi liga klublarining tayyorlov guruhlari o'rtasida o'tkazilgan O'zbekiston Birinchiligi musobaqasiga yakuniga etdi. Klubimiz rahbariyati nomidan musobaqa tashkilotchilariga, musobaqada ishtirok etgan jamoalarga, stadionlarimizga tashrif buyurib, o'z sevikli jamoalarini qo'llab-quvvatlagan futbol muxlislariga kattadan-katta tashakkurlar bildirib qolamiz. Eslatib o'tamiz, 2000/2001 yillarda tavallud topgan “Nasaf” futbolchilari “Bunyodkor”dagi tengdoshlarini mag'lubiyatga uchratib, O'zbekiston Birinchiligida g'olib bo'lgandi.
— deya xabar beradi uff.uz nashri.