Bizning oliy ligada o'ziga xos bir jihat bor - odatda, chempionlikdan ko'ra elitada jon saqlash uchun kurash qiziqarliroq kechadi. To'g'ri, bronza medallarini qo'lga kiritishni istayotgan klublarning shashti ham anchagina baland, ammo baribir, kuchlilar safida qolish uchun boradigan kurashga teng keladigani bo'lmasa kerak. Garchi mavsum boshida «Sho'rtan» va «Obod» yaqqol autsayderga o'xshashgan va bu yil quyi ligaga tushib ketishga asosiy da'vogardek ko'ringan bo'lsalar-da, keyinchalik vaziyat ancha o'zgarib ketdi. Mana endi, mavsum yakunlanishiga ikki tur qolganida, oz emas, ko'p emas, naq to'rt klub birinchi ligada o'ynashga «da'vogar» bo'lib turishibdi. KIM KETADI? Chempion nomi deyarli aniq bo'lib ulgurgan, kumush medal egasi ham tabriklarni qabul qilishga hozirlanayotgan bugungi kunda oliy ligada qoladigan jamoani bilishga qiziqish ancha kuchliroq bo'lmoqda. Sababi aniq, bu kurashda g'olib chiqadigan va mag'lubiyatga uchraydiganlar nomini oldindan aniq ayta olmaysiz. Xo'sh, qaysi klub elitadan tushib ketadi - «Andijon»mi, «Navbahor»mi, «Obod»mi yoki «Qo'qon-1912»? Bu savolga eng bilag'on odam ham javob berishga ikkilansa kerak. Kuchlilar safida qolish uchun kurash turdan-turga kuchayib bormoqda. Bu holatning o'ziga xos jihatlari ham anchagina. Xabaringiz bor, o'tgan yildan e'tiboran oliy liga vakillaridan faqat bittasi to'g'ridan-to'g'ri quyi ligaga tushib ketishi yo'lga qo'yildi. 15-o'rin egasi esa birinchi ligada ikkinchi pog'onani egallagan klub bilan «pley-off»da kuch sinashishi ko'zda tutilgan. Qaysidir ma'noda, ushbu qoida elitada qolish uchun borayotgan kurashni engillashtirishi lozimdek. Ammo yaqqol autsayderi bo'lmagan chempionatda boshqalardan ortda qolish qaysi jamoaga yoqadi? Shuni inobatga olgan holda, so'nggi ikki turda eng shiddatli o'yinlarni tomosha qilishga tayyorlanavering - jon saqlash uchun kurash intrigasi oxirigacha saqlanib qoladi. Bu kurashda hammaning imkoniyati teng, deb ayta olmaymiz. Keling, turnir jadvalining oxirgi o'rinlarini egallab turgan jamoalar imkoniyatini chamalab ko'rsak. Ehtimol, quyida keltiriladigan fikrlar sizning ham xayolingizga kelgandir, balki ularga qo'shilmassiz. Shunga qaramay, autsayderlar masalasida nima o'ylayotganimizni baribir, siz bilan baham ko'rmoqchimiz. «ANDIJON» Ayni vaqtda oliy ligadan tushib ketishga asosiy nomzod sifatida «Andijon»ni ko'rsatsak, klubning eng ashaddiy muxlislari ham xafa bo'lishmasa kerak. Chunki jamoa mavsumni shu qadar yomon o'tkazmoqda-ki, oqibatda 28 uchrashuvda 19 ochko to'pladi, xolos. Bu esa «Andijon»dek klubga yarashmasligi aniq. Qiziq tomoni shundaki, oliy liga taqvimiga nazar tashlasak, elitada qolish uchun eng yaxshi imkoniyat ham, eng yomoni ham aynan «Andijon»da saqlanib turibdi. Chunki klub so'nggi ikki turda musobaqa jadvalidagi bevosita raqiblariga qarshi maydonga tushadi - avval safarda «Obod» bilan kuch sinashadi, keyin esa o'z uyida «Navbahor»ni qabul qiladi. Aynan mana uchrashuvlar jamoa taqdirini hal qilib berishi lozim. «Andijon» so'nggi turlarda iroda kuchini namoyish qilib, o'ta og'ir ikki o'yinda g'alabaga erishsa, nafaqat oliy ligada qoladi, balki muxlislari nazdida avvalgi obro'yini ham tiklab olishi mumkin. Aks holda... Bu yog'ini davom ettirishni istamadik. Chunki o'zingiz ham «Andijon» muvaffaqiyatga erisha olmagan taqdirda vaziyat qanday tus olishini juda yaxshi bilasiz. Hozirgi holatda biz qo'shimcha qilish mumkin bo'lgan yagona statistika - andijonliklar birinchi davrada «Obod» va «Navbahor»ga qarshi kechgan har ikki bahsda ham uch ochkodan mosuvo bo'lganlar. «Andijon» mavsumning dast­labki yarmida «Obod»dan o'z maydonida 0:1 hisobida mag'lubiyatga uchragan va «Navbahor»ga qarshi safarda kechgan o'yinda 0:2 ko'rinishida imkoniyatni boy bergan. Albatta, bu statistika «Andijon» muxlislarini xursand qilmasligi aniq, ammo kutaylik-chi, balki biror o'zgarish ro'y berar. Axir buni futbol deydilar, millionlar o'yini aynan shunday jihatlari bilan qiziq. «NAVBAHOR» O'z navbatida, «Navbahor» uchun ham elitada qolish oson bo'lmasligi turgan gap. Binobarin, namanganliklarning ayni vaqtda 15-pog'onani saqlab qolishayotgani - oliy ligada qolish degani emas. Chunki bu o'rin faqat birinchi divizionda ikkinchi pog'onani egallagan klub bilan «pley-off»da maydonga tushish imkonini beradi, xolos. Mazkur bahsda qanday voqealar ro'y berishi mumkinligini esa, hech kim bilmaydi. Qiziq tomoni, agar «Navbahor» 15-o'rinda qolsa, o'tish bahsida «Norin»ga qarshi maydonga tushishi lozim bo'ladi. Boisi ushbu klub quyi ligada ikkinchi pog'onani naqd qilib ulgurdi va endi «pley-off»dagi raqibini kutmoqda. Bir viloyatning ikki jamoasi oliy liga yo'llanmasi uchun kurashsa, ancha qiziq bo'lishi turgan gap. Ammo «Navbahor» 15-o'rinni saqlash tugul musobaqa jadvalining eng quyi qismiga tushib ketmaslik uchun ham ancha ter to'kishi lozim. Chunki unga qarshi o'ynaydigan klublar anoyi emaslar. Bundan avvalgi bo'limda «Andijon» va «Navbahor» o'rtasida kechadigan o'ta muhim bahs haqida gapirib o'tdik. Ushbu uchrashuvdan tashqari «lochinlar» yana bir o'ta qiyin sinovdan o'tishlari lozim. Namanganliklar 29-turda kumush medal sohibiga aylanishi kutilayotgan «Bunyodkor»ga qarshi maydonga tushadilar. Bu esa vaziyatni ancha chigallashtirishi tayin. Davomi interfutbol.uz saytida.
— deya xabar beradi uff.uz nashri.