Futbolga oshno tutinmagan kishilarni ham befarq qoldirmaydigan APL uchun joriy mavsum yanada tarovatli, shukuhli o'tmoqda. Hatto terma jamoalarning turli musobaqalardagi ishtiroklari tufayli yuzaga keladigan qisqa tanaffuslar cho'zilib ketgandek tuyuladi. Ayniqsa, ashaddiy muxlislar uchun. Chunki o'sha tanaffuslar suyukli «teleserial»larini uzib qo'yadi. Muxlis uchun esa sevimli jamoasining navbatdagi turda qanday natija qayd etishi, turnir jadvalidagi o'zgarishlar muhimroq. Yorqin kelajak sari olg'a! Agar Angliya chempionati stsenariychilar uchun manba vazifasini o'taganida, bu yil uning muallifi shubhasiz, «Oskar» va «Oltin globus» sovrinlarini «Nobel» mukofotiga qo'shib qo'lga kiritardi. Oldin premer-ligada drama elementlarini uyg'unlashtirgan sarguzasht filmlar ko'proq bo'lardi. Biroq o'tgan mavsum futbolchilar fantastikaga yaqin ertakni namoyish etishdi. Joriy mavsum APL bellashuvlari chinakam trillerni eslatmoqda - turnir g'olibligiga hech bo'lmaganda 6ta jamoa da'vogarlik qilishmoqda. Ularning har biri o'zini chempionlikka munosibroq, deb hisoblaydi, har biri o'ziga yarasha dalillarga ega. Hozirda APL etakchiligi «Liverpul» qo'lida. Rossiyada bu jamoani tez-tez «Spartak»ka qiyoslashadi. To'g'ri, ushbu jamoalar bir xil rangni yoqtirishadi. Ammo o'xshashlikning asosiy sababi bu emas - o'z vaqtida «Liverpul» ham, «Spartak» ham gegemon bo'lishgan, lekin anchadan beri shohsupadan chetda qolib, chempionlik zavqini unutib ulgurishgan. Bu mavsumda har ikki jamoa ham ana shu noxush an'anaga chek qo'yishga yaqin turishibdi. Darvoqe, «qizillar» bosh murabbiy Yurgen Klopp ham bizga jamoaning shonli o'tmishidan qolgan ulug'vor xarobalarga emas, anchayin yoqimli manzara, ya'ni porloq kelajakka e'tibor qaratishni tavsiya etdi. Yilning eng yaxshi jamoasi «Liverpul»ni qayta tug'ilgan jamoa deyishga hali erta - musobaqaning atigi 11-turi ortda qoldi, qizil istehkomning mustahkamligiga hech qanday kafolat yo'q. Klopp jamoasining peshqadam bo'lib olishi tasodif emasligini isbotlay oladigan asoslar etarli. Keling, tahlil doirasini kengroq olaylik: «Liverpul» nafaqat joriy mavsumda, balki butun 2016 yil davomida etakchilikni qo'ldan bermay kelmoqda. «Arsenal» va «Tottenxem»dek azaliy raqiblar ochkolar borasida «qizillar» bilan bir xil natijaga egalar. Lekin to'plar nisbatiga ko'ra, «Liverpul» ulardan o'zib ketgan. Mazkur jihat shundan dalolat beradiki, hozirda «Liverpul» nafaqat qisqa, balki uzoq vaqt davom etadigan musobaqalarda ham har qanday kuchli raqib bilan bellashishga qodir. Endi «Klopp yangi jamoani shakllantirmoqda», «O'zaro hamjihatlikka erishish uchun futbolchilarga muayyan vaqt kerak» qabilidagi bahonalarga umuman o'rin qolmaydi. Puxta poydevor allaqachon qad rost­lagan, «qizil mashina»ning shiddatli harakatida nosozlik alomatlari yo'q. Bir yoqadan bosh chiqarib... «Uotford»ga qarshi bahsdan chinakam zavq olgan «Enfild» muxlislari hatto quyushqondan chiqib ketib, qitmirlarga xos qo'shiq kuylashdi: «Agarda Suares tarkibda bo'lganida, hozir zaxirada o'tirardi». Albatta, bu hazil, urugvaylik hujumchi «Liverpul»­ning qudratini yanada oshirardi. Har qanday hazilda oz bo'lsada haqiqat bor. Ko'p yillik etakchisidan judo bo'lish har qanday jamoa uchun ham og'riqli kechadi. Ammo «Liverpul» haddan tashqari og'ir kunlarni boshdan kechirdi. Suaressiz risoladagidek o'yin ko'rsatish uchun 1,5 yil sarflandi. Albatta, boshqa chiziqlar qatori himoya ham o'ta ishonchsiz harakatlandi. E'tibor bersangiz, o'z darvozasidan to'p olib chiqish borasida «qizillar» hozir ham o'rtamiyona jamoalar qatoridalar. Lekin hujum chizig'i tobora gurkiramoqda. Aniqrog'i, «Liverpul» raqiblar darvozasini zabt etish borasida etakchi. Shuningdek, xavfli vaziyatlarni yuzaga keltirish va aniq zarbalar soni bo'yicha ham ularga teng jamoa yo'q. «qizillar»ning eng muhim ustunliklari xavfli zarbalar qaysi tomondan berilishining noma'lumligida - avvallari faqat birgina «tishlog'ich» nomi zikr etilgan bo'lsa, hozirda jamoaning barcha o'yinchilari «tishlog'ich»ga aylanishgan. «Liverpul»ning umumiy gollari 10 nafar futbolchi tomonidan amalga oshirilgan. Bu borada ham jamoa APLda yaqqol etakchi. qisqasi, Klopp sof hujumchidan foydalanish uslubini rad etmoqda, voqelik esa germaniyalik mutaxassisning haq ekanligini ko'rsatib turibdi. Quturganlar toliqishmaydi «Liverpul»ning yana bir ustunligi - tinib-tinchimaslik va uzoq vaqt davomida yuqori sur'atda harakatlanish. Albatta, bu katta kuch talab qiladi, o'ta toliqarli jarayon, u jarohatlarga va qimmatli ochkolarning boy berilishiga olib kelishi mumkin. Jismoniy tayyorgarlik sohasida taniqli mutaxassis Raymond Verxeyli Yurgen Kloppni o'z shogird­larini ayamasdan qiynashda ayblab, «Liverpul» o'yinlari ikkinchi davrada susayib ketishini taxmin qilmoqda. Raqib jamoa mutaxassislari ham shunday fikrdalar. Mantiqan olganda, jamoa butun mavsum davomida yuqori sur'atni ta'minlay olmasligi mumkin. Statistikaga asoslanadigan bo'lsak, manzara batamom aksincha - Klopp «Borussiya» D.ni ham shunday ter to'kishga majbur etardi, jamoa esa turdan-turga samaraliroq to'p surardi. Albatta, murabbiyning ortiqcha yuklamalarini «Liverpul» umuman his etmayapti, desak xato bo'lar. Futbolchilar qaysidir bellashuvlarda talab darajasida o'ynay olmagan hollar uchrab turadi. Bu salbiy holat butun mavsumga tegishli emas. Germaniyalik mutaxassisning nechog'li haqligini quyidagi ko'rsatkichlar ham ko'rsatib turibdi. Jadvaldagi ko'rsatkichlarga e'tibor qaratilsa, Klopp davrida etti mavsumning beshtasida jamoa birinchi davraga nisbatan ikkinchisida samaraliroq to'p surgan. Ochkolar o'rtasidagi tafovut anchagina - 14 foiz. To'g'ri, Angliya jamoalari Germaniyadagilardan ko'proq uchrashuvlarda ishtirok etishadi. Biroq «Liverpul»ning xalqaro musobaqalarda qatnashmayotgani jamoaning ichki chempionatda g'olib chiqishi uchun katta ustunlik beradi. Og'ir damlar ortda qoldimi? Shiddatli tezlanishga erishish uchun har qanday lokomotiv avvalo, sifatli relsga ehtiyoj sezadi. Bu borada «Liverpul» ajoyib imkoniyatga ega: «Arsenal», «Chelsi» va «Tottenxem»dek asosiy da'vogarlar bilan safarda kuch sinashdi, uyda faqat «MYu» bilan bellashdi. Yilning oxirgi bellashuviga qadar Klopp shogirdlari o'rtacha murakkablikdagi ikki to'siq - «Sautgempton» va «Everton»dan muvaffaqiyatli o'tishlari talab etiladi. Mazkur g'ovlar yuqorida zikr etilgan grand­lar uchligi oldida hech narsa emas. Davomi interfutbol.uz saytida.
— deya xabar beradi uff.uz nashri.