Yurtimiz bo'ylab yog'ib o'tgan qor ayniqsa, yoshlarga o'zgacha quvonch bag'ishladi. Qorbo'ron shukuhi bilan qiy-chuv ko'tarayotgan yoshlarga havas bilan boqayotgan hamkasbimiz hazim kulimsiradi: - Yoshlikka xos qaynoqlik uchun qorbo'ron ayni muddao! Ular uzoq o'ylab o'tirishmaydi. Ana, neki g'ubor bo'lsa, barini qorbo'ron bilan otib yuborishyapti. Bizga o'xshaganlarga qiyin. Alam o'tini qor ham bosolmayapti. - Kuni kecha «Beshiktosh» va «Benfika» o'rtasidagi uchrashuv haqida zavqlanib so'zlayotgandingiz, kayfiyatingiz ham chog' edi. Yana nima bo'ldi? - so'raymiz undan o'zimizni beparvo ko'rsatishga urinib. - Ko'rmaysizmi, reytingda yana pastlab ketibmiz. Kim nima desa mayli, boshqalarni bilmadim, ammo shaxsan menga shu ma'lumot ham ta'sir qiladi... Ha, reytingdagi yuqori o'rin nainki muxlislar, balki futbolchilarning ham kayfiyatini ko'taradi. Yuqori mavqe hamisha alohida hurmat-ehtiromga sazovor. Inson zoti shuning uchun doimo yuksaklikka intiladi. Hatto o'rtamiyona saviyadagi alpinist ham Everestga buyuk orzular timsoli sifatida qaraydi. Shu ma'noda milliy terma jamoamizning reytingdagi o'rni ahamiyatsiz, deb hisoblaydigan murabbiy va futbolchilarga ishonish qiyin. Mahorat o'z yo'liga. Bosh jamoamizga yuksak tuyg'ular yarashadi. Har bir jihatga fidoiylarcha munosabatda bo'ladiganlargina bosh jamoamizga munosibdirlar. Ikki kuchli raqibga imkoniyatni boy berish, reytingda pastlash alami yondirgan olov qorlarni eritadi, tovuqni seskantiradi. Qolaversa, Konfederatsiyalar kubogiga tashlangan qur'a ham iztirob gulxanini yana gurullatdi. - Nimasini aytasiz, Abdulhay Karimov «To'ylariga novvos boqar tog'asi», deb kuylaydi. Oramizda jahon chempionatiga terma jamoamiz bilan birga borish orzusida har biri o'ntalab novvos boqayotgan muxlislar bor, - deya ma'yus chehrali hamkasbimizni qo'llab-quvvatladik. - Bilasiz-ku, Moskva ko'z yoshlariga ishonmaydi. JCh-2018 yo'li mavjud barcha imkoniyatlardan foydalanish demakdir. Menga qolsa, mavjud bo'lmagan imkonlarni ham izlab topardim va ishga solardim! - dedi so'zlarimizdan jonlangan suhbatdoshimiz. O'sha asnoda poytaxtlik futbol muxlisi Azizbekning qo'ng'irog'i suhbatimizni bo'ldi. U ham shu mavzuda mulohaza yuritdi va muammolarga ayni hozir echim topish zarurligini ta'kidladi. Muhtaram muxlis! Yuqoridagi kabi muloqotlarga balki siz ham tez-tez guvoh bo'layotgandirsiz. Ochig'i, bu hol bizni behad hayratlantirmoqda. Nima uchun milliy jamoa mavzusini evrofutbolning qizg'in bahslari ham nari surolmayapti? Zavq zavqqa, alam alamga poydevordir - bu haq gap! Agar terma jamoa­miz g'alabalari zavqi bo'lganida, evrofutboldagi qaynoqlik muhokamasi bugun avjga chiqardi. Ehtimol, shuning uchundir «Chelsi» - «Tottenxem» uchrashuvi, ya'ni Londonning dahshatli derbisi ham yurtimiz muxlislarida kutilganidek qiziqish uyg'otmadi. Yo'q, chinakam muxlislar bahsni o'tkazib yuborishmadi, chiroq o'chishi muammosi ularni yo'ldan qaytarmadi. Lekin munozara olovi avvalgidek lovullamadi, qizg'in tortishuvlar kuzatilmadi. Holbuki, futbol olami chorak asr­dan so'ng nihoyat, «Tottenxem»ning safardagi g'alabasini kutgandi. Maurisio Pochettino alamzada an'anani buzishga tayyorligini bildirdi. Jon Terri esa jamoadoshlariga hech narsa buzilmasligi kerakligini uqtirdi. Bizni esa 3-4-3 sxemasining navbatdagi sinovdan o'tishi ko'proq qiziqtirdi. Bundan tashqari, Son Xyun Minning abjirligiga, Garri Keynning shiddatiga «Chelsi» tarkibidagi 3 nafar himoyachi qanday qarshilik ko'rsatishiga ayricha ahamiyat berdik. Dastlab Antonio Kontening 6ta tur davomida mustahkamlangan «formula»si Pochettino «masala»sini echishga ojizdek tuyuldi. Ketma-ket ikki hujum, uchinchisida gol! Shunda ham «Chelsi» chekinmadi va yana murabbiyning g'alaba musiqasi yangradi. Biz uning qat'iyatiga qoyil qoldik. Konte o'zi shakllantirgan mexanizmning mukammalligiga ishonmoqda va mexanizm ham chakki emasligini isbotlamoqda. Italyan mutaxassisining fikricha, o'z ixtiyoridagi mahoratli futbolchilar imkoniyatidan foydalanish zarurligini ta'kidlaydigan murabbiy adashadi. Mahoratlar birlashuvi har doim jamoani anglatmaydi. Murabbiy avvalo, mexanizmning bir-biriga munosib «qism»larini aniqlashi, keyin esa shu yaxlit mexanizmga mos harakatlanish sxemasini tanlashi darkor. Avval ham aytganmiz, yana takrorlaymiz: Alonso - Matich - Mozes - Kante kvarteti Azar - Kosta - Pedro triosiga uyg'un. Kontening yutug'i - shu uyg'unlikni his qilgani va topgani. U ushbu uyg'unlikning gullab-yashnashi yo'lida boshqa yulduzlarni ranjitishdan cho'chimayapti. Endi bir o'ylab ko'ring: Odil Ahmedov va Igor Sergeevning harakatlari o'zaro uyg'unmi? Bu to'g'rida gapirishning o'ziyoq kishi hafsalasini pir qiladi. Afsuski, Samvel Babayan aslida Odil Ahmedov butunlay boshqa olamligiyu, Igor Sergeev bu olamga begona ekanligi xususida o'ylashni istamayapti. Uning uchun muhimi - Igorning bosh bilan yaxshi o'ynashi. Vaholanki, milliy jamoamiz asosiy hujumchisi nafaqat bosh bilan yaxshi o'ynashi, balki har jihatdan a'lo darajada to'p surishi shart. Tan olaylik, bosh jamoamizning bir qator a'zolarida aynan shu omil etishmaydi. E'tiborlisi, Konte amaldagi uyg'unlikni topish va shakllantirish uchun bir yil sarflamadi. Ya'ni u Samvel Babayandan farqli o'laroq, qisqa muddatda uyg'unlikni ta'minlash uddasidan chiqdi. Pastu-baland qiyos uchun uzr, biroq shunday qiyossiz mulohaza bildirmasak, Samvel Babayandan xijolat tortamiz beixtiyor. Davomi interfutbol.uz saytida.
— deya xabar beradi uff.uz nashri.