«Andijon» klubi 2016 yilgi mavsumning eng omadsiz klubiga aylanib, navbatdagi marotaba Oliy Ligani tark etdi.
Ilk marotaba 2004 yilda elitadan tushib ketgan «Andijon» 2012 yilda ham yana Birinchi Ligaga «quvilgandi». 2013 yil yana Oliy Ligaga qaytgan andijonliklar bir yil o'tib, 2014 yilda ham so'nggi o'rinlarni band etgan va ligada tushib ketishi lozim edi. Ammo O'FFning Oliy Liga klublari sonini 16 taga etkazishi tufayli ligada qoldirilgandi. 2015 yilda esa «Andijon» so'nggi turda Farg'onada «Neftchi»ni mag'lub etib «Oliy»da qolgan bo'lsada, bu yil afsuski yana Oliy Ligani tark etishga majbur bo'ldi. Xo'sh, «Andijon» jamoasining muvaffaqiyatsizligi asl sabablari nimada? Ushbu mavzu yuzasidan klubning sobiq bosh murabbiyi, jurnalistika sohasida qalab tebratgan Azamat Abduraimov «Erudit Sport» gazetasidagi maqolasida javob berishga urindi.
ANDIJONDAGI FAOLIYaT VA ISTE'FO
Afsuski, ajoyib muxlislarga ega «Andijon» klubi navbatdagi marotaba Oliy Ligani tark etdi. Ikki yil avval klubda faoliyat yuritgan murabbiy sifatida men bu jamoaning quyi ligaga tushib ketganligini shunchaki tasodifiy omadsizlik demagan bo'lardim. Har holda «Andijon»ning Oliy Liga va Birinchi Liga o'rtasida tushib-chiqib yurishi bu klub sistemasining noto'g'ri ekanligini anglatadi. Nega ekanligini tushuntiraman.
Men 2013 yilda Andijon viloyat hokimining taklifiga binoan keldim. Jamoada mavsumning ikkinchi qismida ish boshlashganligim, o'shanda klub quyi pog'onalarda borayotganligiga qaramay, yig'in o'tkazish, tarkibni kuchaytirish masalasida hech narsa qila olmasdim. Bunday paytda, jamoani olib qolish juda qiyin edi. Shu bois, kelishuvga ko'ra, «Andijon» quyi ligaga tushib ketgan taqdirda ham, menga klubni yana Oliy Ligaga olib chiqish uchun imkoniyat berilishi haqida kelishilgandi. Shu sabab klubda ish boshlashga rozi bo'lgandim. O'sha yili klub quyi ligaga tushib ketgan bo'lsada, rahbariyat, homiylar barchasini to'g'ri tushunib, ikki qadam qo'yish uchun ham bir qadam ortga yurilishini to'g'ri tushungadilar. Qo'yilgan maqsad esa faqat Oliy Ligaga chiqish emas, klub asosini andijonlik mahalliy futbolchilardan tashkil etish vazifasi ham bor edi. Shunga yarasha jamoani imkonqadar yoshartirib, Oliy Ligaga chiqish vazifasini uddaladik. Mavsum yakunida esa do'stim Mirjalol Qosimovdan iltimos qilib, uning qo'l ostida chempion bo'lgan «Bunyodkor» klubini «Andijon»ga qarshi futbol-shouga taklif etdik. Tadbirga Ozodbek Nazarbekov, Nilufar Usmonova, «DJ Piligrimm», Javohir Zokirov cingari san'atkorlarni taklif etib, andijonlik muxlislarga ajoyib bayram sovg'a qilgan edik. Mavsumni yuqori notada yakunlab, yilni katta ishtiyoq bilan boshlashimiz kerak edi.
Ammo, klub tomonidan futbolchilarga Oliy Ligaga chiqqani uchun va'da qilingan bonuslar, mukofot pullari to'lanmadi. Sababi, bungacha futbolga qiziqqan viloyat hokimi boshqa ishga o'tkazilgandi, yangi rahbariyat esa bu borada muammoni hal etmadi. Ustiga-ustak yilni moliyaviy qiyinchiliklar bilan boshladik. Bu esa tarkibni kuchaytirish imkonini bermasdi. Oqibatda mavsum o'yinlarini quyi ligada vazifani bajargan futbolchilar va Oliy Liga klublaridan chetda qolgan o'yinchilar bilan boshlashga majbur bo'ldim. Bunday paytda futbolchilarni ruhlantirish oson bo'lmasada, yaxshi natija uchun bor imkoniyatimni ishga soldim. Dastlabki turda 18 ming muxlis qo'llab-quvvatlashi ostida «Paxtakor»ga 0:1 hisobida mag'lub bo'lgan bo'lsakda, butun stadion o'yindan keyin ham jamoamizni qo'llab-quvvatladi. Xullas, mavsumni omadsiz boshlaganimizdan keyin natija uchun javobgarlikni o'z bo'ynimga oldim. Jamoaning natijalari uchun tabiiyki, mening ham aybim bor edi. Klubga yangi murabbiylar kelishi va ular davralar oralig'ida tarkibni kuchaytirib, etarlicha tayyorgarlik ko'ra olishlari uchun ham, birinchi davra yakunida klubni o'z arizamga binoan tark etishga qaror qildim.
BU TASODIY OMADSIZLIK EMAS
O'shanda klubning muvaffaqiyatsizligiga meni ayblaganlar juda ko'p bo'ldi, balki tajribasizlik qilgandirman, ammo mendan keyin taklif etilgan ukrainalik Sergey Shevchenko ham, Orif Mamatkazin ham, Edgar Gess ham klubga yordam bera olmadi. Natijada o'sha yili «Andijon» O'FF qaroriga ko'ra, ligadagi klublar soni 16 taga etkazilgani uchun ligada olib qolindi.
Ushbu qarordan keyin «Andijon» xatolardan to'g'ri xulosa chiqarishi va 2015 yilgi mavsumni yaxshi boshlashi kerak edi. Ammo Edgar Gess qo'l ostida jamoa yana mavsumni omadsiz boshladi va yana murabbiylar almashinuvi boshlandi. Birin-ketin murabbiylar o'zgarishi ham jamoa natijalariga ijobiy ta'sir qilgani yo'q. Sababi klubning boshqaruv tizimida futboldan uzoq kishilar tayinlanishi salbiy oqibatlarga olib kelayapti. O'tgan yili Sergey Kovshov qo'l ostida jamoa zo'rg'a elitada olib qolindi, joriy yil boshida esa klubga Baxtiyor Ashurmatov bosh murabbiy etib tayinlandi. Afsuski, unga ham ko'p ishlashga imkoniyat berilmadi va yana navbatdagi iste'fodan so'ng Orif Mamatkazin bosh murabbiy sifatida natijaga javobgar bo'ldi.
Mahalliy mutaxassisga ham mavsum yakuniga to'rt qolganda «chiqish eshiklari» ko'rsatildi. Yakunda esa tushunarsiz tarzda klub bosh direktori natija uchun javobgar etib tayinlandi, ammo oxir-oqibat «Andijon» quyi ligaga ravona bo'ldi. Jamoa 4-5 yildan buyon ligalar orasida «sarson» bo'layotgan ekan, bu nimani anglatadi? Bu jamoa muvaffaqiyatsizligiga sabab faqat murabbiylar – Abduraimov, Ashurmatov yoki Gess emas, klubning umumiy sistemasi talabga javob bermasligini anglatadi. Andijon viloyat futbol federatsiyasi klubni etarlicha qo'llab-quvvatlayaptimi? Nega natija talab qilinadi-yu, ammo murabbiyga hech bo'lmasa bir yil ishlash uchun imkoniyat berilmaydi? Har mavsum uchtalab murabbiylar o'zgaraversa, na futbolchi va na murabbiy klubga hech qanday yordam bera olishmaydi. Tassavur qiling, bugun bitta murabbiy futbolchiga bir narsani o'rgatsa, ertaga yangisi kelib boshqa mashqni talab qilsa unda o'sish bo'ladimi? Ustiga-ustak murabbiylar o'zlari istagan futbolchilar bilan kelib-ketaversa, klub yanada og'ir ahvolda qolib ketaveradi.
Ya'ni, muvaffaqiyatsiz natijalarga sabablar bir nechtani tashkil etadi. Birinchidan klubda futboldan uzoq rahbarlar tayinlanishi, ikkinchidan murabbiylarga etarlicha imkoniyat berilmay, ketma-ket iste'folar, uchinchidan esa tarkibda har yili 10 dan ortiq futbolchilarning kelib-ketib o'zgarishi, to'rtinchidan klubda moliyaviy holat etarlicha emasligi deb o'ylayman. Zero, men klubni tark etganimdan buyon tarkib ikki martalab ham o'zgarib natija yomonligicha qolmoqda.
O'ylaymanki, bundan buyon «Andijon»ga qaysi murabbiy taklif etilsada, natijaga birgina uning o'zi emas, o'sha murabbiyni taklif etgan rahbar ham javobgar bo'lishi kerak. Chunki o'shanda mas'uliyat hissi rahbariyatda ham, murabbiyda ham bo'ladi. Men klubda faoliyat yuritgan payt, murabbiylikdan tashqari, klub qarorgohining ta'mirlanishi, tashkiliy ishlar bilan shug'ullanish, klub moliyaviy ta'minoti uchun majlislar ishtirok etish bilan ovora bo'lib yurardim. Bunday ishlar esa murabbiylar gardanida bo'lmasligi kerak. Klubda barcha o'z ishiga professional tarzda yondashishi va moliyaviy ta'minot ham barqaror bo'lishi lozim.
Klubga Andijon futbolini ipidan-ignasigacha biladigan jonkuyar rahbar tayinlanishi lozim. Bunday shaxslar esa Andijonda ko'p. Ulardan biri Zafar aka Zulunovdir. U Birinchi Ligadagi «UzDongJu» klubi prezidentidir. Andijon futboli uchun borini beradigan jonkuyar. Aynan uning rahbarligida 2013 yil «Andijon»ni Oliy Ligaga qaytargan edik. Aynan Zulunovdek futbolni yaxshi tushunadigan mutassadilar boshqaruvida Andijon futboli oldingi mavqeini tiklay olishiga va barqaror poydevor qo'yilishiga ishonaman. Zero, futbolsevar Andijon xalqi o'zbek futbolida o'z o'rniga ega bo'lgan munosib jamoaga ega bo'lishi shart. Azamat ABDURAIMOV, «Erudit Sport» gazetasidan Manba: erudit-sport.uz
— deya xabar beradi uff.uz nashri.