Futbol bo'yicha O'zbekiston 25-milliy chempionati Toshkentning «Paxtakor» jamoasi uchun omadsiz keldi. O'tgan yili ajoyib tarzda chempionlik shohsupasiga ko'tarilgan «sherlar» bu mavsum 5-o'rin bilan kifoyalanishdi. To'g'ri, chempionlar tarkibidan Egor Krimets, Aleksandr Merzlyakov, Kaxi Maxaradze, Bahodir Pardaev kabi futbolchilar boshqa klublarga o'tib ketishdi. Aleksandr Lobanov va Igor Sergeev bir davra «Paxtakor» libosida to'p surishdi. Hujumchi davralar oralig'ida Xitoyning «Pekin Guoan» klubiga yo'l olgan bo'lsa, darvozabon aynan ikkinchi davrada Erondan qaytib keldi. Tabiiyki, tarkibdagi bu yo'qotishlar yakunda natijaga o'z ta'sirini o'tkazmay qolmadi. Biz mavsum yakuni yuzasidan O'zbekiston milliy terma jamoasi va «Paxtakor» klubi darvozaboni Aleksandr Lobanovdan intervyu oldik. - Sasha, «Paxtakor» mavsumni 5-o'rinda yakunladi. Chempion jamoaning bunday natija qayd etishi kutilmagan hol bo'ldi. Shunday emasmi? - Ha, fikringizga qo'shilaman. Dahshatli natija ko'rsatdik. Buning uchun esa faqat o'zimizni ayblashimiz kerak. Hamma ayb o'zimizda. Lekin o'ziga yarasha sabablar ham bo'ldiki, buni inkor eta olmaymiz. O'tgan yilgi chempion jamoaning boshlan-g'ich tarkib futbolchilaridan deyarli yarmi klubni tark etgandi. Bu esa o'yinda ham, natijada ham aks etdi. qolaversa, safardagi o'yinlarda juda kam ochko to'pladik. Aksincha, o'z maydonimizda sovrinli o'rinlarni egallagan barcha jamoalarni mag'lubiyatga uchratdik. - Samvel Babayanning «Paxtakor»­­ni tark etishi ham natijaga ta'sir qildimi? - Albatta. Bu ham katta sabablardan biri. Lekin har qanday holatda yakunda kamida «kuchli uchlik»dan joy olishimiz shart edi. - Bu yilgi mavsumdagi qaysi o'yinlarni alam bilan eslaysiz? - Mehmonda «Neftchi», o'z maydonimizda esa «Buxoro» bilan o'tgan o'yinlarda alamli mag'lubiyatni qabul qilib oldik. - Klub rahbariyati mavsum yakunlari bo'yicha yig'ilish o'tkazdimi? qanday fikrlar yangradi? - Ha, yig'ilish bo'lib o'tdi. Tabiiyki, jamoaning mavsumdagi ishtiroki qoniqarsiz deb topildi. Hammaga hayfsan e'lon qilindi. - Har bir futbolchi mavsum yakunida o'zining ishtirokini tahlil qiladi. Aleksandr Lobanovning xulosalari qanday bo'ldi? - Men uchun juda og'ir mavsum bo'ldi. Ikkita chempionatda o'ynashga to'g'ri keldi. Mavsumni Eronda boshlab, o'zimizning oliy ligada yakunladim. Ruhiy tomondan juda ham charchagandim. qolaversa, milliy terma jamoa o'yinlari ham bor edi. Shularni inobatga olib, o'zim uchun ijobiy baho qo'ya olmayman. Xatolarimni bilaman va o'z ustimda ishlashda davom etaman. - Lekin yutuqlaringiz ham bor. Samvel Babayan davrida milliy terma jamoaning birinchi raqamli darvozaboniga aylandingiz... - Ha, bu men uchun plyus bo'ldi. Lekin o'zimdan hech qachon qoniqish hosil qilmaganman. Har doim orzu sari intilishda davom etaman. - Boshqa tomondan, bosim ostida ham qoldingiz. To'g'rimi? - Ha, men shunga sha'ma qilgandim. - Sizning manzilingizga muxlislar va ayrim mutaxassislar, OAV vakillari tomonidan etarlicha tanqidlar yo'llandi. Buni qanday qabul qildingiz? Davomi iff.uz saytida.
— deya xabar beradi uff.uz nashri.