The Telegraph nashri muxbiri bilan bo'lgan suhbatda «Torino» klubi va Angliya terma jamoasining darvozaboni Italiyaga ko'chib o'tish uning faoliyatiga qanday ta'sir ko'rsatgani xususida o'rtoqlashdi. Jo Xart uchun qandaydir o'zgarishlarni amalga oshirish davri kelib qolgandi. Nafaqat jamoasini, balki futbolga bo'lgan munosabatini ham qaytadan ko'rib chiqishi lozim edi. Anchayin dimog'dor, ba'zan aktyorlik xislatlaridan xoli bo'lmagan tabiati Angliya terma jamoasining o'yinlarida, ayniqsa, Islandiyaga qarshi bahsda salbiy ta'sirini ko'rsatgandi. «Men doimo qandaydir yangilikni o'rganishga, har qanday sharoitga moslashishga harakat qilaman. Evropada bor mahoratimni namo­yish etolmaganimni tan olaman. Xatti-harakatlarimni sinchiklab o'rganib chiqishim, qaysidir jihatlarini o'zgartirish borasida kerakli kishilardan maslahat olishim lozim. Aynan shu masalada Garet Sautgeyt bilan gaplashib oldim», - deydi «Torino» posboni. «Menda o'yinga bo'lgan ishtiyoq, kuch-quvvat etarli. Keragidan ko'proq bo'lsa ham, ajabmas. Doimiy ravishda mukammallikka, yanada mahoratliroq bo'lishga intilaman. Xatolardan tegishli xulosalar chiqarish, ularni bartaraf etish hali hech kimga zarar keltirmagan». «O'ta xotirjam, aqlu-hushini yig'ib olgan paytlarda Joning sport formasi a'lo darajada bo'ladi», - degandi Sautgeyt Sloveniya bilan qayd etilgan nursiz durangdan keyin. O'shanda Xart bir necha marta jamoani muqarrar gollardan saqlab qolib, «uch sherlar»ga qimmatli ochkoni taqdim etgandi. «Maydonda o'zini harakatchan tutish, ehtiroslar va o'z yurti bilan faxrlanish tuyg'ularini namoyish etishda salbiy jihatlari yo'q. Ammo ularni turlicha talqin qilish mumkin. Bu borada uzoq mulohaza yuritdim. Umid qilamanki, bu izlanishlarim kerakli manfaatni beradi», - deydi Xart. «Manchesterda hech qachon meni mashg'ulotlardan chetlatishmagan. Shunchaki vaqti kelib men jamoadan ajralib qoldim. Bunday vaziyatlarda inson o'zini tuta bilishi lozim. Boshqa jamoadan ish topishim kerakligini aytishdi. «Torino» safiga o'tish imkoniyati paydo bo'lgach, bu erga keldim». Darvoqe, ijara shartnomasi o'ta shoshilinch tarzda rasmiylashtirildi. Xartning ta'kidlashicha, unda variantlar deyarli yo'q edi. qolaversa, transfer darchasining yopilishiga juda oz vaqt qolgandi. Shu sababli darvozabon taklifni o'ylab ham o'tirmay qabul qildi. Buni qarangki, Italiyada Jo ishonchli o'yinlar ko'rsatib, yana Angliya terma jamoasi tarkibiga qaytdi. «Astoydil ter to'kishimga to'g'ri keldi. Etarli tajriba bor, ammo yuksak saviyani yo'qotib qo'ymasam bas. Doimo shunga intilaman. Albatta, har qanday futbolchining faoliyati davomida omadsizliklar yuz berishi muqarrar. Biroq men uzoq vaqt davomida yuqori sport formasida qolishni, ko'proq maydonga tushishni istayman. Klubda ham, terma jamoada ham». Davomi "InterFUTBOL" gazetasida.
— deya xabar beradi uff.uz nashri.