Samarqandning «Dinamo» klubi bir yillik tanaffusdan so'ng yana oliy ligada ishtirok etadi. O'tgan yili ko'hna shahar jamoasi kuchlilar safini tark etganidan keyin murabbiylar shtabida o'zgarish kuzatilgandi: bosh murabbiy vazifasiga XII Osiyo o'yinlari g'olibi Ilhom Sharipov tayinlandi. «Dinamo» mavsumni ko'tarinki kayfiyatda o'tkazib, chempionat yakunlanishiga uch tur qolgan bir paytda muddatidan avval elita yo'llanmasini qo'lga kiritdi. Klub uchun butun mavsum deyarli raqobatdan xoli tarzda o'tdi. Samarqandlik futbolchilar chempionatning 32 uchrashuvidan 26tasida g'alaba nashidasini surishdi. Ushbu o'yinlarda raqiblar darvozasi 86 bor ishg'ol qilindi. «Dinamo» 82 ochko jamg'argan holda birinchi liga-2016 chempioniga aylandi. Klub rahbariyati mavsum yakunlari bo'yicha bir nechta nominatsiyada eng yaxshilarni aniqlab, ularni taqdirladi. Jumladan, jamoaning tajribali a'zosi Aleksey Nikolaev yilning eng yaxshi futbolchisi deb topildi. Quyi divizionda eng ko'p uchrashuvda maydonga tushgani holda, eng kam gol (19) o'tkazgan Mixail Naumov esa eng yaxshi darvozabon nomiga loyiq ko'rildi. «Dinamo»ning 21 yoshli hujumchisi Amirjon Safarov 23ta gol bilan jamoa to'purari bo'ldi. Biz mavsum yakunlari yuzasidan 1-liganing tengsiz kiperi Mixail Naumovdan intervyu oldik.
- Misha, avvalambor, siz va jamoadoshlaringizni «Dinamo»ning oliy ligaga qaytgani bilan tabriklayman. Bu vazifani qiyinchiliksiz uddaladinglar. Shu fikrga qo'shilasizmi? - Tabrik uchun rahmat. Samarqand ahli yana katta futbol havosidan nafas oladigan bo'ldi. Bu imkoniyatni ularga taqdim eta olganimizdan xursandmiz. Lekin mazkur vazifani qiyinchiliksiz uddaladinglar, degan gapingizga biroz qo'shilmayman. O'tkazilgan o'yinlardan hech biri biz uchun oson kechmadi. To'g'ri, ba'zi uchrashuvlarda yirik hisobda zafar quchdik. Ammo bu natija o'sha o'yinlarning engil o'tganligini anglatmaydi. - Lekin «Dinamo» baribir, raqobatdan xolidek ko'rindi. Aslida ham shundaymi? - Har doim tashqaridan qaraganda shunday taassurot uyg'onadi. Lekin jamoa ichida yurganlar har bir ochko qanday qiyinchiliklar evaziga qo'lga kiritilganini juda yaxshi bilishadi. Qolaversa, raqobatchilaringiz, sizni izma-iz ta'qib etib kelayotgan jamoalar ochko yo'qotishingizni, qoqilishingizni kutishadi. Buni bilish, his qilish juda og'ir. Har bir o'yin biz uchun xuddi so'nggi uchrashuv kabi o'tdi. - Oliy liga yo'llanmasi mahorat va tajriba evaziga qo'lga kiritildimi yoki raqiblar ham qaysidir ma'noda yordam berib yuborishdimi? - Albatta, tajriba o'z so'zini aytdi. Tarkibimizda oliy ligada o'ynagan malakali futbolchilar bor edi. Xususan, Aleksey Nikolaev bir necha yil mobaynida milliy termamiz libosida to'p surgan. Qolaversa, omad ham bizga kulib boqdi. Sportda omadning o'rni yuqori. - Birinchi liga haqidagi fikrlaringiz qanday? - Umumiy xulosa - ijobiy. Yaxshi, kurashuvchan jamoalar etarli. Lekin echimini kutayotgan muammolar ham bisyor. Birinchi navbatda, talabga javob bermaydigan stadion va maydonlarning saqlanib qolayotgani ko'ngilni xira qiladi. Agar bu muammo bartaraf etilsa, quyi diviziondan ham iste'dodli yosh futbolchilar etishib chiqishadi. Aks holda, liganing nufuzi oshmaydi. - Hakamlik masalasi qanday? - Shaxsiy fikrimni aytaman, bu yil hakamlik yaxshi saviyada o'tdi. Referilarga deyarli e'tirozlar bo'lmadi. - Adashmasam, 1-ligada ilk bor to'liq mavsum o'tkazdingiz? - Xuddi shunday. 1-ligada avval ham o'ynaganman. Lekin ilk bor to'liq mavsum o'tkazdim. Oldin «Oq-tepa» jamoasi safida yarim yil to'p surgandim. Birinchi marta klubim bilan elita yo'llanmasini qo'lga kiritdim (kuladi). - Jamoa bosh murabbiyi Ilhom Sharipov haqida qanday fikrdasiz? - Ilhom aka bilimli mutaxassis. Futbolchilar bilan qanday muloqot qilish, ularning ko'ngliga qay tarzda yo'l topishni juda yaxshi biladi. Mashg'ulotlarni ham qiziqarli tarzda olib boradi. - Kelgusidagi rejalar qanday? - Ta'til davom etmoqda. 15 dekabrdan yangi mavsumga tayyorgarlikni boshlaymiz. Ilk yig'in Samarqand shahrida tashkil etiladi. Oliy ligaga shunchaki bir mavsum o'ynab, yana ortga qaytish uchun chiqmadik. Klub oldiga jiddiy vazifalar qo'yilgan. Elitada ham yuqori o'rinlar uchun kurashamiz. - Hozirgi tarkib bilan bu maqsadni amalga oshirish mumkinmi? Kuchli raqobatga tayyormisizlar? - Albatta, tayyormiz. Hali o'zgarishlar bo'ladi. Ayrim chiziqlar kuchaytiriladi. Hozirgi tarkibimiz ham yomon emas. Yuqorida aytganimdek, safimizda oliy ligada to'p surgan tajribali futbolchilar etarli. O'tgan yili 1-liga g'olibi bo'lgan «Obod» quyi divizion klubi nimalarga qodir ekanligini amalda isbotladi. Ular mavsumni yaxshi o'tkazishdi, deb ayta olaman. Jamoa hujumchisi Shohruz Norxonov yosh bo'lishiga qaramay, chempionat to'purarlari qatoridan joy egalladi. Umuman, «Dinamo» oliy ligada birinchi marta o'ynamayapti. Bu borada katta tajriba to'plagan. Ishonchim komil, jamoamiz autsayderlar qatorida bo'lmaydi. - Oliy liga o'yinlarini kuzatib bordingizmi? - Nafaqat kuzatib bordim, balki ayrim o'yinlarni bevosita stadiondan tomosha qildim. Turli saytlardagi xabarlarni o'qib turaman, gazetalardagi yangiliklar bilan tanishaman. Bu yil «Lokomotiv» mamlakat chempionligi va kubokni haqli ravishda qo'lga kiritdi. «Temiryo'lchilar»ning boshqa klublardan kuchli ekanliklari bilinib turdi. Lekin kubok finalida «Nasaf» g'alaba qozonishi kerak edi. Ularda yaxshigina imkoniyat yuzaga kelgandi. O'z navbatida, yuqorida aytganimdek, «Obod»ning ishtiroki ham menga yoqdi. Debyutant bo'lishiga qaramay, nomdor raqiblardan hayiqmay harakat qildi. Sovrindor jamoalardan ochko tortib olishga erishdi. So'nggi turda «Paxtakor» maydonida durang o'ynadi. - Ko'pchilikning fikricha, «Nasaf»ga chempionlik ruhiyati etishmaydi. Vaholanki, Qarshi klubi moliyaviy tomonlama, qulay sharoitlar yaratib berilishi jihatidan mamlakatimizning eng etakchi jamoalaridan biri hisoblanadi. Lekin klub bronza medali bilan cheklanib qolyapti. O'z vaqtida «ajdarlar» safida to'p surgan futbolchi sifatida bu boradagi fikringiz qanday? - Menimcha, «Nasaf»ga omad etishmayapti. Bu jamoada boshqa hamma narsa bor. Yaxshi murabbiy ishlayapti, tarkib kuchli. Jamoaning bazasiga, u erdagi sharoitlarga esa gap yo'q. - Yuqorida «Nasaf» kubokni qo'lga kiritishi kerak edi, dedingiz. Nimaga asoslangan holda bunday fikr bildirdingiz? - «Nasaf» raqibdan biroz xavfsiragan holda harakat qilgandek taassurot qoldirdi. O'z o'rnida «Lokomotiv» futbolchilari ham o'ta ehtiyotkorlik bilan o'ynashdi. Lekin bu - futbol. Unda oldindan bashorat qilib bo'lmaydi. O'yin avvalida o'tkazib yuborilgan gol barcha masalaga oydinlik kiritdi. Bitta xato «ajdarlar»ni kubokdan mahrum etdi. Xatoga yo'l qo'ymaydigan jamoa ham, futbolchi ham yo'q. - Faoliyatingizni yakunlamoqchi emasmisiz? - Yo'q, albatta. Hali o'zimni ko'rsatish uchun etarli kuchga egaman. Kichik tanaffusdan so'ng yana oliy ligada o'ynashimdan xursandman. - Lekin baribir, futboldan keyin nima qilish haqida o'ylayotgan bo'lsangiz kerak? - O'zimni millionlar o'yinidan yiroqda his qila olmayman. Futbolchilik faoliyatim yakunlanganidan keyin o'zimni murabbiylikda sinab ko'rmoqchiman. Boshqa sohada ishlashim tasavvurimga sig'maydi. - Umuman, faoliyatingiz qay tarzda boshlangan? Nima uchun aynan millionlar o'yinini tanlagansiz yoki futbol sizni tanlaganmi? - Menimcha, gapingizning ikkinchi qismi to'g'riroq bo'lsa kerak. Men sportchilar oilasida dunyoga kelganman. Bunday muhitda o'sgan bola sportdan boshqa sohani tanlamasa kerak. Akam Aleksandr Naumov velosport bilan professional tarzda shug'ullangan. Hatto, velotrek yo'nalishida jahon chempioniga aylangan. Otam Konstantin Naumov esa futbolchi bo'lgan. Hujum chizig'ida to'p surgan. Ko'plab musobaqalarda zafar quchgan. Uyda shaxsiy javonida bir nechta medal va kuboklari bor. Jamoasi to'purarligini qo'lga kiritgan. Lekin ma'lum sabablarga ko'ra futbolni tashlashiga to'g'ri kelgan. Xullas, qiziqish menga aynan otamdan o'tgan. - U holda birinchi murabbiyingiz va tanqidchingiz aynan otangiz bo'lsalar kerak? - Xuddi shunday. Millionlar o'yinining ilk sir-asrorlarini Termiz shahrida o'rganganman. Murabbiyim Ravshan Annaev bo'lganlar. «Surxon» jamoasi tarbiyalanuvchisiman. - Odatda, aksariyat bolalar hujumchi bo'lishni istashadi. Lekin siz darvozabonlikni tanlagansiz. Bunga etarli sabablar bormidi? - Bilasizmi, faoliyatimni hujumchi sifatida boshlaganman. Lekin kunlarning birida darvozabon bo'lish istagi tug'ildi. Bu haqda ustozimga aytdim. O'zimni yangi pozitsiyada sinab ko'rdim. Harakatlarim murabbiyga ma'qul keldi va o'shandan beri kiper sifatida o'ynab kelyapman. Davomi Interfutbol.uz saytida.
— deya xabar beradi uff.uz nashri.