Germaniya termasining ikki etuk himoyachisi haqida Gari Linekerning Germaniya termasi haqida aytgan mashhur so'zlari hammaning yodida: «Futbol - 22 kishi o'ynaydigan oddiy o'yin bo'lib, 90 daqiqa davom etadi va yakunda nemislar g'alaba qozonishadi». qizig'i, joriy yilning 26 mart kuni Angliya milliy jamoasi germaniyaliklar darvozasiga so'nggi daqiqada gol urib, g'alaba qozongach, Lineker o'z so'zlariga quyidagicha o'zgartirish kiritdi: «Futbol - 22 kishi o'ynaydigan oddiy o'yin bo'lib, 90 daqiqa davom etadi va yakunda nemislar ikkita golli ustunlikni yo'qqa chiqarishadi». Xullas, bugun Germaniya termasining ikki himoyachisi - Jerom Boateng va Mats Xummels haqida gapiramiz. Ortiqcha tahlil o'tkazmaymiz, shunchaki ushbu futbolchilar bilan bog'liq aniq ma'lumotlarga tayanamiz. Jerom Boateng Boateng faoliyatini «Tennis Borussiya Berlin»ning yoshlar jamoasida boshlagan. 2002 yilning 1 iyulida o'sishga erishib, «Gerta» klubi safiga qo'shiladi. O'shanda uning yoshi 13da edi. Yigitcha «Tennis Borussiya Berlin»ga qaytishni xayoliga ham keltirmay, mashg'ulotlarda astoydil ter to'kdi. Katta mehnat, tabiiy iqtidor Boatengni tarkibdagi eng mahoratli futbolchilardan biriga aylantirdi. 2007 yilning 31 yanvarida u «Gannover»ga qarshi bahsda debyutini nishonladi. Endigina 18 yoshga to'lganiga qaramay, Jerom asosiy tarkibga muqim joylasha oldi. Germaniyada bu odatiy hol va mahalliy top-klublar iste'dodli o'yinchini qo'lga kiritishga jiddiy kirishishdi. Mish-mishlarda Boatengning Gamburgga jo'nashi gapirildi. Yosh futbolchining oldida ikkita yo'l bor edi: o'rtamiyona jamoada barqarorlikka erishish yoki kuchliroq klubda raqobatni engish. Jerom ikkinchisini tanladi va adashmadi. Boateng Gamburgga 2007 yilning 22 avgustida ko'chib o'tdi. Yangi klubi uning uchun 1,1 million evroga yaqin pul to'ladi. Himoyachi bu shaharda ikki yil muvaffaqiyatli to'p surdi. 2008|2009 yillar mavsumi Jerom uchun esda qolarli tarzda kechdi. «Gamburg» so'nggi turlargacha mamlakat chempionligi uchun kurashdi, shuningdek, Evropa Ligasi yarim finaliga chiqdi. Hozirda jar yoqasiga kelib qolgan klub uchun ajoyib natija. 2010 yilning 5 may kuni Angliya­ning «Manchester Siti» klubi 10,4 mln. funt sterling evaziga Boateng bilan besh yillik shartnoma imzoladi. Bu jamoadagi debyuti 2010 yilning 25 sentyabriga to'g'ri kelib, o'shanda «shaharliklar» «Chelsi»ga qarshi bahs yuritishdi. «Siti» 1:0 hisobida g'alabaga erishdi, Jerom esa ikkinchi bo'limda zaxiradan maydonga tushdi. Asosiy tarkibdagi ilk o'yini esa Evropa Ligasi doirasidagi «Yuventus» bilan bahsga to'g'ri keldi. Mazkur uchrashuvda tomonlar murosa ko'chasini tanlashdi - 1:1. Bir mavsum Manchesterda to'p surgan yosh himoyachi Angliya kubogini qo'lga kiritdi, vaholanki, ushbu musobaqa finalida «zayavka»dan o'rin olmagandi. Ma'lum muddat ettinchi osmonda uchib yurgan yigitcha shu tariqa biroz pastlab, Germaniyaga qaytish tadorigini ko'rdi. Bu haqda rahbariyatga aytgach, 2011 yilning 14 iyulida «Bavariya» «Man.Siti» bilan Boa­tengning transferi bo'yicha kelishuvga erishdi. Myunxenliklar buning uchun 14 million evroning bahridan kechishdi. Oradan 13 kun o'tib, Jerom yangi jamoasidagi ilk o'yinini o'tkazdi: «Audi» kubogi doirasidagi «Milan»­ga qarshi bahsda Rafinyaning o'rniga zaxiradan tushdi. Bundesligadagi debyutini esa o'sha yilning 6 avgust kuni «Borussiya» Dortmund bilan o'yinda nishonladi. Boateng va klubning yana bir yangi o'yinchisi Manuel Noyerning xatosidan so'ng De Kamargo uchrashuvda «qovog'arilar»ning g'alabasini ta'minlagan yagona golga mualliflik qildi. «Bavariya» o'sha mavsum Germaniya chempionatida ikkinchi o'rinni egalladi, mamlakat kubogi va EChL finallarida yutqazdi. Jerom har ikki o'yinda qatnashdi. 2012|2013 yillar mavsumida Boateng asosiy tarkibdagi o'rnini yanada mustahkamlab, jamoasi muvaffaqiyatlariga munosib ulush qo'shdi. «Bavariya» «trebl» qayd etdi: bundesliga chempioni, Germaniya kubogi sohibi va EChL g'olibi. qahramonimiz o'zining bundesligadagi ilk golini 2013 yilning 9 mart kuni «Fortuna»ga qarshi kechgan bahsda urdi va yakunda jamoasi g'alabasini ta'minladi. O'yin 3:2 hisobida myunxenliklar foydasiga hal bo'ldi. Jeromning Germaniya termasidagi debyuti 2009 yilning 10 oktyabriga to'g'ri kelib, Rossiya milliy jamoasi bilan o'yinda qizil kartochka olgandi. 2014 yilning 13 iyulida Boateng jahon chempionligini nishonladi: nemislar JCh finalida Argentina termasini 1:0 hisobida engishdi. Jerom esa mazkur bahsdagi yakkakurashlarning 83 foizida ustunlikka erishib, g'alabaning qo'lga kiritilishida muhim rol o'ynadi. Aksariyat sport nashrlari Boatengni finalning eng yaxshi o'yinchisi sifatida tanlagan bo'lishsada, rasman bu nom Mario Gyottsega nasib qildi. Jerom termadagi ilk golini 2016 yilning 26 iyun kuni Slovakiya darvozasiga urdi. O'sha o'yin germaniyaliklarning 3:0 hisobidagi g'alabasi bilan yakun topdi. Davomi Interfutbol.uz saytida.
— deya xabar beradi uff.uz nashri.