Afg'onistonlik Murtazo Ahmadining sarguzashti Sir emaski, farzand uchun er yuzida ota-onadan ko'ra mehribonroq zot mavjud emas. Zurriyodimizning orzu-istagini ro'yobga chiqarish uchun kerak bo'lsa, osmondagi oyni olib berishga ham urinib ko'ramiz. Ularning fantaziyasi esa chegara bilmaydi. Quyidagi ertaknamo voqea faqat bolalarga xos samimiy tilak tufayli yuz berdi. Mazkur maqola bilan tanishgach, bolalarni bejizga farishta bilan tenglashtirishmaganiga amin bo'lasiz. Hammasi oddiygina bir fotosuratdan boshlandi. Unga o'xshagan tasvirlar ijtimoiy tarmoqlarda tiqilib yotibdi. Gavdasiga mos bo'lmagan katta shalvor (balki akasidan merosdir) hamda siyqasi chiqqan rezina etikni kiyib olgan bolakay eski futbolkaga yozilgan «Messi» iborasini viqor bilan namoyish etayotgani tez-tez uchraydigan hol. Aslida bu surat ham e'tibordan chetda qolishi hech gap emasdi, agarda uning qanday matodan tikilganiga, zukko mijozlarning nigohlari tushmaganida. Diqqat bilan qaraganda, futbolkaning tsellofan xaltadan tayyorlangani, undagi raqam va familiya ruchka yoki flomaster yordamida yordamida qo'l bilan yozilgani oydinlashadi. Aslida ushbu to'lqinlantiruvchi jihatlar ham na suratkashga va na mitti «model»ga hech qanday mashhurlik va'da qilmagandi. Lekin internetdek oxir zamon mo''jizasi - qudratli kuch. U ba'zan shunday hunarlarni ko'rsatadiki, hayratdan qotib qolasan kishi... Kimdir shu oddiy suratni ijtimoiy tarmoqqa joyladi, boshqasi kengroq yoyishga harakat qildi. Qarabsizki, qisqa vaqt ichida mitti muxlisning surati butun dunyoni egalladi. Kashfiyotga o'ch jurnalistlar o'sha zahoti qahramonimizning shaxsini aniqlashga kirishdilar - kim o'zi, u? Albatta, ayrim chigalliklarga ham yo'l qo'yildi. Masalan, «Kurdiston 24» telekanalining tasvirga olish guruhi Messining yosh muxlisini Iroqning Doxuk shahridan topishdi (birinchi bo'lib kashf etishning gashti o'zgacha-da, baribir). Ma'lum bo'lishicha, ular yanglishgan ekanlar. O'xshash, lekin u emas. Nihoyat kasbdoshlarimiz antiqa futbolkaning haqiqiy egasini Afg'onistonning G'azna proventsiyasidagi tog'li Jagori uezdidan topishdi. Xullas, 5 yoshli Murtazo Ahmadi hali o'qish va yozishni o'rganmasdan turib butun dunyoga ovoza bo'ldi. Bolakayning tarixi har qanday bag'ritosh insonda ham o'ziga nisbatan mehr-shafqat uyg'ota olishiga shubha yo'q. Argentinalik dahoning ashaddiy muxlisi bir kuni otasini qiyin ahvolga solib qo'ydi: «Dadajon, meni Messi bilan tanishtirib qo'yi-ingg!» Bolakaydagi samimiylik va soddalikdan otaning peshonasi tirishdi: «Eh bolajonime, biz qaerdamiz-u, Messi qaerda?». Darhaqiqat, Jagori bilan Barselonani 7000 km.dan ko'proq masofa ajratib turadi. Mur­g'ak qalb uchun buning nima ahamiyati bor?! Tabiiyki, ilojsiz qolgan otaning ma'yus javobi Murtazoni qoniqtirmadi. Ushalmas orzudek tuyulgan ertakning haqiqatga aylanishiga bolakayning akasi - Humoyun sababchi bo'ldi. Mashhur futbolkani ham u tayyorlagan, keyin ukasiga kiydirib, Argentina terma jamoasining mitti a'zosi suratini «Feysbuk»ka joylagan. Ertakning haqiqatga aylangan hayratomuz jarayoni ijtimoiy tarmoq «hazratlari»ning aralashuvi bilan nihoyasiga etdi. Afg'onistonlik mitti muxlis haqidagi xabar nihoyat, kerakli manzilga, o'z sohibiga etib bordi. U Leoni to'lqinlantirib (axir u ham 2 o'g'lonning otasi) yubordi. Messi Argentina terma jamoasi hamda «Barselona»dagi futbolkalarini zudlik bilan Afg'onistonga jo'natdi. Albatta, tsellofandan tayyorlangan emas, haqiqiy liboslarni. Qo'shimchasiga, ular esdalik yozuv va dastxatlar bilan bezaldi. Davomi iff.uz saytida.
— deya xabar beradi uff.uz nashri.