Ushbu hafta ayrim jamoalarimiz yangi mavsumga tayyorgarlikning ilk bosqichini boshlashadi. Lekin aksariyat klublarimiz 20 dekabrdan mashg'ulotlarga kirishishadi. Bu jamoalar orasida «Lokomotiv» ham bor. Yakunlangan mavsumda «oltin dubl» qayd etgan «temiryo'lchilar»ning kelasi yildan ham umidlari katta. Ayni payt futbolchilar hordiq chiqarishyapti. «Lokomotiv»ning etakchi o'yinchilari o'z oilalari bilan xorij mamlakatlarida ta'tilni maroqli o'tkazishyapti. «Yaxshi dam - mehnatga hamdam», deb bejiz aytishmaydi. Biz shu kunlarda Tailandda bo'lib turgan «Lokomotiv» etakchisi Server Jeparov bilan bog'lanib, undan mavsum yakunlari yuzasidan intervyu oldik. Ma'lumot uchun, yarim himoyachi o'tgan mavsum barcha musobaqalarda jami 34ta rasmiy o'yinda maydonga tushdi. Bu uchrashuvlarning 23tasi oliy liga doirasida bo'ldi. Taqqoslash uchun, jami rasmiy o'yinlar soni 47ta edi. Server ana shu 34ta uchrashuvda maydonda 2473 daqiqa  harakat qildi. Raqiblar darvozasiga 8ta gol urib, 6 bor hakamlar tomonidan ogohlantirildi. - Server, avvalo, «oltin dubl» bilan sizni tabriklayman. Javoningizda ko'plab medallar bor. Ular orasida «oltin»i ko'proq. Bu yilgi chempionlik va kubok avvalgilaridan nimasi bilan farq qildi? Qaysi jihatlari sizga qadrliroq? - Tabrik uchun rahmat. Joriy yilgi oltin medal men uchun ancha qadrli bo'ldi. Boisi, 5 yillik tanaffusdan so'ng O'zbekiston chempionatiga qaytib, chempionlikka erishdim. Bu qaytish omadli bo'lib chiqdi. - O'tgan 5 yil ichida oliy ligamizda nimalar o'zgaribdi? - Birinchi galda stadion va maydonlar ijobiy tomonga o'zgargan. Zamonaviy va ko'rkam stadionlar bunyod etildi. Bu kishini quvontiradi. Lekin dilni xira qiladigan holatlar ham yo'q emas. U ham bo'lsa chimning holati. Bunday maydonda futbol o'ynashning sira ham iloji yo'q. Chim deyishga ham til bormaydi. Bu sharoitda o'ynaganda birinchi galda raqib bilan emas, aksincha, maydon bilan kurashiladi. Keyin jarohat orttirib olish xavfi yuqori bo'ladi. Oddiy vaziyatda, ya'ni to'p uchun kurashmasdan turib ham jarohat olish hech gap emas. Tabiiyki, bunday maydonda chiroyli futbol bo'lmaydi. Raqobat esa deyarli o'sha-o'sha. Hozirda 5 yil oldin bo'lgani kabi 2-4ta jamoa sovrinli o'rinlar uchun kurash olib boryapti. Aytishingiz mumkin, bu yildan «Buxoro», «Qizilqum», «Metallurg» kabi klublar kurashga qo'shildi-ku, deb. To'g'ri, mazkur fikrni ham oqlash mumkin. Lekin shuning barobarida «Neftchi», «Olmaliq», «Navbahor» kabi jamoalar o'rtamiyona klubga aylanib qoldi. Turnir jadvaliga qarab, bu klublarning hozirgi egallab turgan o'rinlarini ko'rishingiz mumkin. Hattoki, «Navbahor» oliy ligada jon saqlab qolish uchun «o'tish o'yini»da ishtirok etdi. - Salbiy jihatlarni sanaganingizda muxlislar tashrifi yodingizdan ko'tarildimi? - Ha, bu holat ham quvonarli darajada emas. 2008-2009 yilgi mavsumda muxlislar soni kishi ko'zini quvontirardi. Derbi maqomidagi o'yinlarda stadion muxlislar bilan to'lardi. «Bunyodkor» tarkibida Rivaldo o'ynagan yillari jamoamizning har bir o'yiniga minglab muxlislar tashrif buyurishardi. Ayniqsa, mehmondagi uchrashuvlarda stadionda bo'sh joy qolmasdi. - Futbolchilarning mahoratida o'zgarish sezdingizmi? - Bundan 5 yil avval birga o'ynagan o'yinchilardan xorij klublariga transfer qilinganlari o'z saviyalarini ushlab qolishdi. Bu ham bo'lsa mahorat evaziga. Nima demoqchi ekanligimni tushundingiz, deb o'ylayman. - Tashqaridan qaraganda, tarkib va klubdagi sharoitlarni ko'rib, «Lokomotiv» bu yil oson chempionlikka erishibdi, degan fikrga kelinadi. Aslida ham shundaymi? Davomi iff.uz saytida
— deya xabar beradi uff.uz nashri.