O'zbekiston terma jamoasining o'rtoqlik o'yini o'tkazishi haqidagi xabar har kuni ham chiqavermaydi. O'tgan hafta mana shunday kamyob hodisalardan biri ro'y berdi - yanvarda Gruziya, fevralda esa Armaniston terma jamoalari bilan o'rtoqlik o'yinlari o'tkazilarkan. Biroq yangilikdan xursand bo'lishga shoshilmang, chunki uchrashuv xorijda o'tkazilishi rejalashtirilgan. Shunday ekan, uni jonli tomosha qilish ko'pchilikka nasib etmasa kerak. Mabodo, atayin safarga otlanmasangiz, albatta... O'YINLAR HAQIDA Bu yangilikning o'ziga xos jihatlari bir talay. Aytishlaricha, Terma jamoalar markazi tomonidan ko'p federatsiyalarga o'rtoqlik o'yini bo'yicha taklif yo'llangan, ammo shundan faqat Armaniston va Gruziya ijobiy javob qaytarishgan. Aksariyat terma jamoalar ikki-uch yillik rejani avvaldan tuzib qo'yadilar, biz esa ikki oy qolganda bir yo'la elliktalab taklif yo'llashga odatlanganmiz. Samvel Babayanning aytishicha, Armaniston termasiga qarshi kechadigan uchrashuvga legionerlar jalb etilmaydi va oliy ligada to'p suradigan o'yinchilar sinovdan o'tkaziladi. Bir so'z bilan aytganda, yana o'sha eski uslubda ishlashda davom etamiz - o'rtoqlik o'yinida boshqa futbolchilar to'p surishadi, rasmiy bahsda esa boshqalar. Bu holat biz uchun yangilik emas. Bir vaqtlari Vadim Abramov ham shunday yo'l tutgan, Mirjalol qosimov ham. Endi Samvel Babayan ularning izidan ketmoqda. Hozir bu uslub qay darajada noto'g'riligi haqida gapirmoqchi emasmiz, so'zni yana behuda havoga sovurishdan nima naf? O'zbekiston terma jamoasi Samvel Babayan qo'l ostida 13ta rasmiy o'yin o'tkazdi. Ammo bu davr mobaynida tarkib borasida ba'zi muammolar echilmay qolmoqda. Tarkib esa nafaqat raqib, balki oddiy muxlis uchun ham oldindan ma'lum bo'lib ulgurgan. Asosan legionerlar va «Paxtakor» futbolchilariga ishonch bildiradigan Samvel Babayan topgan yangi nomlar ham asosan mana shu davradan chiqmoqda. Masalan, Vadim Afonin legionerlar sirasiga kirsa, oxirgi o'yinlarda o'ng qanotdan muqim o'rin olgan Davron Hoshimov «Paxtakor» futbolchisi hisoblanadi. Bu esa terma jamoaning keng imkoniyatlarini biroz toraytirishi turgan gap. Baxtimizga ushbu masalada o'zgarishlar qilish uchun bizda hali etarlicha vaqt bor va umid qilamizki, o'rtoqlik o'yinlarida vaziyat ijobiy ko'rinish oladi. Axir Terma jamoalar markazi Gruziya va Armaniston termalariga qarshi kechadigan o'yin bilan cheklanib qolmay, yana o'rtoqlik uchrashuvlari tashkil etsa kerak?! Bu esa o'z navbatida, darvozada Aleksandr Lobanov, hujumda Igor Sergeevdan boshqa nomzodlar ham borligini isbotlab bergan bo'lardi, balki. Xo'sh, kelgusi o'yinlarda kimlarni maydonda ko'rishni istaymiz? Keling, hozir shu haqda biroz mulohaza yuritsak... Davomi Interfutbol.uz saytida.
— deya xabar beradi uff.uz nashri.