2016 yilgi O'zbekiston vitse-chempioni Toshkentning «Bun-yodkor» jamoasi yangi mavsumga tayyorgarlikni davom ettirmoqda. «Qaldirg'ochlar» ilk yig'inni o'z bazalarida o'tkazishayotgan bo'lsa, yanvarda mashg'ulotlar BAAning Dubay shahriga ko'chadi. Tabiiyki, taraddud paytida nazorat uchrashuvlariga ham e'tibor qaratiladi. «Bunyodkor»ning o'ynovchi-murabbiyi Xayrulla Karimov bizga bergan intervyusida tayyorgarlik jarayoni haqida so'z yuritdi. - Xayrulla aka, avvalo, «Olmaliq»qa qarshi kechgan nazorat o'yini xususida fikr bildirsangiz... - Bunday o'yinlarda futbolchilarning holatiga baho bera olmaysiz. Chunki murakkab kechgan mavsum charchoqlari hali-hamon saqlanib qolyapti. Jamoamiz bu yil uchta musobaqada ishtirok etdi. Shu bois, dastlabki yig'inda asosiy e'tibor jismoniy holatni tiklashga qaratiladi. To'g'ri, nazorat bahslari ham o'tkaziladi, lekin unda murabbiylar shtabi asosan tarkibga jalb etilgan yangi futbolchilar va yangi taktikalarni sinab ko'rishga e'tibor qaratishadi. Shunday bo'lsada, baribir, ilk o'yinda g'alaba qozonish yoqimli, yigitlar juda yaxshi taassurot qoldirishdi. - Mazkur bahsda o'tgan mavsum yoshlar ligasida to'p surgan futbolchilar ham o'ynashdi. Ularning harakatlarini qanday baholaysiz? - «Bunyodkor»ning ustuvor vazifalaridan biri akademiya tarbiyalanuvchilariga e'tibor qaratish, asosiy tarkibni o'zimizning futbolchilar evaziga boyitish hisoblanadi. Yoshlar har doim birinchi jamoa bilan birgalikda mashg'ulot o'tkazishadi. Murabbiylarimiz bejizga bunday qarorga kelishmagan. Shu tariqa yoshlarda o'ziga bo'lgan ishonch hissi ortib boradi. Natijada, ularning asosiy tarkib o'yiniga tezda kirishib, moslashib ketishlari qiyin kechmaydi. - «Bunyodkor»ning o'tgan mavsumdagi ishtirokini qanday baholaysiz? - Jamoamiz oldiga hamisha eng yuqori vazifalar qo'yiladi. Bu yil ikkinchi o'rinni egalladik. Lekin kumush medallar ham yomon emas. Shaxsan men yosh tarkib bilan bunday natijaga erishishni ijobiy holat sifatida baholayman. Albatta, chempion bo'lish yoki mamlakat kubogini qo'lga kiritishni xohlagandik, lekin ayrim o'yinlarda omadimiz kelmadi. - Chempionat yakunlanishiga ikki tur qolganda, o'z maydoninglarda «Navbahor» bilan durang o'ynadinglar. Bu kutilmagan natija o'sha turdayoq «Lokomotiv»ga chempionlikni taqdim etdi... - Ha, bu kutilmagan natija edi. Bu - futbol. «Navbahor» o'sha o'yinda bizga yutqazib qo'yganida, oliy liga bilan xayrlashishi mumkin edi. Aslida, eng qiyin o'yinlar so'nggi o'rinda borayotgan jamoalar bilan kechadi, ular bor kuchlarini sarflashadi. Amalda ham shunday bo'ldi. Raqib darvozasini ishg'ol qilish uchun ko'plab imkoniyatlar yaratdik, biroq ulardan foydalana olmadik. - O'zbekiston kubogi yarim finalida «Lokomotiv»ga har ikki o'yinda ham imkoniyat boy berildi. Bu o'tgan mavsum «temiryo'lchilar»ning «qaldirg'ochlar»dan ustun bo'lganiga ishorami? - Nega endi, biz «Lokomotiv» to'sig'idan bemalol o'tishimiz mumkin edi. O'sha safarda kechgan ilk o'yinda bizda imkoniyatlar etarlicha bo'ldi. Ammo bitta xato tufayli mag'lubiyatga uchradik. O'yin bobida raqibga yutqazmadik. Bizning yigitlar biroz xotirjamlikka berilishlari oqibatida «Lokomotiv» g'alabani ilib ketdi. Ikkala uchrashuvda ham bitta xato o'yin taqdirini amalda hal qildi. Afsuski, o'sha xatoga yo'l qo'ygan jamoa biz bo'ldik. Qolaversa, tan olish kerak, «Lokomotiv» futbolchilaridagi tajriba yuqoriroq edi. - Parallel ravishda murabbiylik faoliyatini ham boshladingiz. Futbolni sog'inayotgandirsiz? Davomi iff.uz saytida.
— deya xabar beradi uff.uz nashri.