Ushbu mavsum O'zbekiston superkubogi bahsi o'tkazilmaydigan bo'ldi. Bu haqda yangi mavsumga qur'a tashlash marosimida Professional futbol ligasi rahbari Farhod Magometov ma'lumot berdi. Qaror mazmuni ham mutasaddi tomonidan izohlab o'tildi. «Bu yil superkubok o'yini o'tkazilmaydi. Chunki «Lokomotiv» ham chempion bo'ldi, ham kubokni oldi. Shu bois uchrashuvga qiziqish katta bo'lmasa kerak», - dedi PFL rahbari. Agar bu qarorga o'tgan yili o'tkazilgan superkubok bahsi sabab bo'lsa, mutasaddini tushunamiz. Yodingizdami, «Bunyodkor» stadionida o'tkazilgan o'sha o'yinga qiziqish darhaqiqat yuqori bo'lmagan va yig'ilgan muxlislar bitta tribunani ham to'ldira olishmagandi. Biroq stadion to'lmagani uchun ayb kimda? O'sha kuni futzal bo'yicha Osiyo chempionatida O'zbekiston terma jamoasi Iroqqa qarshi muhim o'yinda maydonga tushgandi. Balki shu sababdir? Axir shunday o'yin turganda superkubokka kim ham qiziqardi? Haliyam «Nasaf» o'ynagani uchun bo'lsa kerak, stadionga ancha-muncha odam keldi. Ma'lumot o'rnida aytib o'tamiz, «Nasaf» va «Paxtakor» o'rtasida kechgan bahsda qarshiliklar 1:0 hisobida g'alaba qozonib, superkubokni qo'lga kiritishgandi. Agar o'yinni men qatori siz ham ko'rmay qolgan bo'lsangiz, o'zingizni ayblamang. Chunki o'sha kuni futzal bo'yicha O'zbekiston terma jamoasi jahon chempionati yo'llanmasi uchun Iroqqa qarshi maydonga tushib, g'alaba qozongan edi. Bu uchrashuvdan qolgan taassurotlarni hali uzoq yillar unuta olmasligimiz turgan gap. Biroq superkubokni allaqachon yoddan chiqargan ekanmiz... O'zbekiston superkubogi qayta joriy etilganiga hech qancha vaqt bo'lmadi. Bir vaqtlari «Navbahor»ning g'alabasidan so'ng to'xtab qolgan bahs qayta tiklandi va unda «Lokomotiv» va «Nasaf» g'alabaga erishib ulgurishdi. Agar bu yil ham o'tkazilganda, reglament bo'yicha «Bunyodkor» va «Lokomotiv» maydonga tushishari. Chunki bir jamoa ham chempionatda g'alaba qozonib, ham kubokni qo'lga kiritsa, superkubok sohibi oltin va kumush medal sohiblari o'rtasidagi bahs orqali aniqlanardi. Biroq PFLning birgina qarori bilan bu o'yin o'tkazilmaydigan bo'ldi. Qiziq tomoni, reglamentga hali tegishli o'zgarish ham kiritilmagan. Yaqin haftalar va balki oylar davomida bu yog'ini ham to'g'rilab qo'yishsa kerak. Endi masalaning boshqa jihatiga e'tibor qaratsak. PFL o'z qarori bilan qaysidir ma'noda haq. Qanday qilib deysizmi? Hozir tushuntiramiz. «Lokomotiv» joriy mavsum hammadan kuchli ekanini allaqachon isbotlab ulgurgan. Chunki kubokda ham, oliy ligada ham g'alaba qozondi. Endi o'ylab ko'ring, mabodo superkubok bahsi o'tkazilsa-yu, «Bunyodkor»ning omadi chopib, g'alaba qozonsa, qay darajada adolatdan bo'lardi? «O'roqda yo'q, mashoqda yo'q, xirmonda hozir», bo'lib qolmaydimi? Na chempion bo'lgan va na kubokni qo'lga kiritgan klub dabdurustdan superkubokni yutib olsa, qanchalik to'g'ri bo'ladi? Bu yog'ini ham o'ylab ko'rish kerak. Balki mavsum boshlanishi oldidan klublarning boshini qotirmasdan, tayyorgarlik ko'rishga imkon berish ham to'g'ri bo'lar? PFLning qarorini endi tushunyapsizmi? «Lokomotiv» chempion bo'lib, kubokni qo'lga kiritib, eng kuchli ekanini isbotlagan ekan, superkubok, darhaqiqat, kerak emas. Mayli, biz bunga rozimiz, ammo bir shart bilan. Modomiki, superkubok bahsi O'zbekiston chempionati va kubogida bir jamoa g'olib bo'lgan yili tashkillanmas ekan, demak aksincha, chempionlik va kubok boshqa-boshqa jamoalarga nasib qilgan yili o'tkazilishi shart. Mana shu bandni har yili o'zgaraveradigan reglamentga yaxshilab tirkab qo'yish kerak. Aks holda, beqarorlik kishini zeriktiradi. Hali u deymiz, hali bu. Axir qachongacha reglament tovusdek tovlanishi kerak? Davomi iff.uz saytida.
— deya xabar beradi uff.uz nashri.