Xabaringiz bordir, O'zbekiston Professional futbol ligasida yangi mavsum uchun qur'a tashlash barobarida bir qator qarorlar ham qabul qilindi. Ular orasida eng kutilmagani - superkubok bahsining bekor qilingani. Bu fikrimizga qarshi chiqadiganlar ko'p topilmasa kerak. Umuman, bundan tashqari ham, PFL masalasida bir qator savollar yig'ilib qolgandi. Shu sabab, tashkilot rahbari Farhod Magometov bilan maxsus suhbat uyushtirishni lozim topdik. Avvalo, «InterFutbol» tahririyati iltimosimizni inobatga olib, taklifimizni qabul qilgani uchun PFL rahbariyatiga minnatdorchilik bildiradi. Farhod Magometov bilan suhbatimiz esa superkubok o'yini xususida boshlandi.
SUPERKUBOK VA TIBBIY KO'RIK
- Farhod aka, suhbatimiz avvalida bir narsaga aniqlik kiritib olishni istardik - o'tgan mavsum chempionlik ham, kubok ham bitta jamoaga nasib etgani uchun superkubok bahsi bekor qilindi. Ammo kelasi yil nima bo'ladi?
- Ochig'i, bu borada hozircha aniq to'xtamga kelganimiz yo'q. Fursat topib, klublar vakillarini yig'amiz va ular bilan maslahatlashamiz. Zero, avvalo, superkubok ular uchun qay darajada muhimligini aniqlab olishimiz lozim. Bu masalada xohishim bitta: o'yin birinchi navbatda, muxlislarni qiziqtirishi lozim. Qiziqishni esa klublar ta'minlab berishlari shart. Axir rasmiyatchilik uchun o'yin tashkillashdan ma'no nima?  Boz ustiga, bu yil superkubok o'yini uchun maqbul vaqt ham topilmadi. OChLda ishtirok etuvchi «Nasaf», «Bunyodkor» va «Lokomotiv» klublari yangi mavsumga tayyorgarlik ishlarini ancha erta boshlashdi. Qaysidir jamoa yig'in o'tkazish uchun chet elga chiqadi, boshqasi o'zimizda qoladi.
- Klublar tomonidan bildirilayotgan e'tirozlardan biri tibbiy ko'rikka bog'liq. Chunonchi, barcha klublar ko'rik uchun Toshkentga kelishga majburlar. Shu jarayonni viloyatlarda tashkillash imkoni yo'qmi?
- E'tirozda jon bor. Shaxsan menga ham klublardan ko'p shikoyatlar kelib tushgan. Ushbu masala bo'­yicha O'FF vitse-prezidenti Sardor Rahmatullaevga murojaat qildim. Demoqchimanki, barchasini O'FF rahbariyati bilan ko'rib chiqishimiz lozim.
BADAL PULI VA MARKETING
- Professional futbol ligasi faoliyati hozirda to'lig'icha klublardan olinadigan badal puliga bog'liq. Ammo bu tizim futboli rivojlangan o'lkalarda allaqachon eskirgan. Bizda qachon o'zgarish bo'ladi?
- Aslida badal puli ko'plab davlatlarda mavjud. Bu borada istagancha bahslashish mumkin. Masalan, Rossiya chempionatida badal puli qanchaligini bilasizmi? Mana, men aytaman - 9 million rubl! Bu o'tgan mavsumdagi ma'lumot va to'lov miqdori yanada oshgan bo'lishi mumkin. Yaponiyada esa klublar badal puli sifatida 500 ming dollardan to'lashadi. Bizda esa qancha? Oliy liga klubi uchun belgilangan miqdor - 150 million so'm. Ichki musobaqalarni aynan shu  yig'iladigan mablag' evaziga tashkillaymiz. To'plangan pul qaerga va qancha sarf­lanishini reglamentda aniq-tiniq yozib qo'yganmiz. Deylik, bitta tur o'yinlari uchun hakamlarga qancha haq to'lanishini bilasizmi? Buning ustiga, ularning tayyorgarlik jarayoni xarajatlari ham bizning zimmamizda. Ya'ni hakamlar uchun maxsus yig'inlar tashkil qilamiz. Ularda jami 150 nafar hakam ishtirok etadi. Yana nazoratchilar yig'ini ham bor. Bularga hakamlar maktabi faoliyatiga bog'liq xarajatlarni ham qo'shing...
- Ammo ayni payt badal puli ko'plab klublarga og'irlik qilishi mumkin. Masalan, birinchi ligada vaziyat ancha og'ir.
- Quyi liga ishtirokchisi uchun bor-yo'g'i 20 million so'mga teng badal puli belgilangan. E'tibor bering, bu miqdor hakamlarga bog'liq xarajatlarni ko'tarish uchun ham etmaydi. Lekin liga ravnaqini o'ylab, moliyaviy talablarni oshirmayapmiz.
- PFL musobaqalarni o'tkazishga ketadigan xarajatlarni boshqa tomondan topishi mumkin emasmi? Aytaylik, marketing va homiylar bilan ishlash bo'yicha qanday ishlar amalga oshirilmoqda?
- Butun dunyoda futbol rivoji avvalo, televideniega bog'liq. Musobaqalar byudjetining 60-70 foizi translyatsiyalar sotuvidan tushadigan mablag' evaziga qoplanadi. Ammo bizda vaziyat boshqacha.
- PFL ham translyatsiyalarni sotish borasida ish olib borsa bo'lmaydimi? Qolaversa, marketingni rivojlantirish mumkin...
- Albatta, ma'lum loyihalarni tayyorlayapmiz. Masalan, UzReport TV telekanali bilan hamkorlik qilish rejasi bor. Bu kanal bilan asta-sekin ish boshlashni ko'zlab turibmiz. To'g'ri, birdaniga barcha o'yinlardan translyatsiya uzatish qiyin masala. Shu bois, avvaliga balki faqat tur doirasidagi markaziy o'yinlar telehuquqini berarmiz. Ammo hozircha bu aniq ma'lumot emas.  UzReport TV bilan hamkorlik - yaqin kelajak uchun o'ylab qo'yilgan reja. Jahon amaliyotida marketing masalasida qilinadigan ishlar - futbolkalar, atributlar va boshqa suvenirlar savdosidan tushadigan mablag' byudjetning bor-yo'g'i 1 foizini qoplashi mumkin. Translyatsiya esa 60-70 foiz mablag'ni ta'minlaydi. Umid qilamanki, bu borada oldinga siljiymiz, baribir.
YaNA O'ShA TAQVIM
- Farhod aka, PFLning tanqid qilinishiga asosiy sabab sanalgan yana bir jihat -  bu taqvim. Aytingchi, bizda o'yinlar sanasi nega bunchalik ko'p o'zgartiriladi?
- Ha, taqvim masalasi o'zimiz uchun ham katta bosh og'rig'i. Ammo buning ham o'ziga yarasha sabablari bor. Aslida o'yinlarni qoldirishdan PFLga qanday naf bor? Nima, taqvimning buzilishi bizga yoqadimi? Endi sabablarga kelsak, ular orasida aytiladigan va aytilmaydiganlari bor. Yana bir tomoni, taqvim ko'pincha O'zbekiston milliy jamoasi manfaatlaridan kelib chiqib, o'zgartiriladi. Unutmaslik kerakki, reglamentga muvofiq, 3 nafar futbolchisini terma jamoaga yuborgan klub o'z o'yinini keyinroq muddatda surdirishga haqli.
- Terma jamoa manfaatini o'ylab, ish yuritish yaxshi, albatta. Ammo bu muammo necha yillardan buyon hal etilmayotgani ham ayni haqiqat. Milliy jamoaning yillik rejasi oldindan ma'lum ekan, taqvimni shunga moslab tuzish mumkin emasmi?
- Ha, terma jamoa rejasi oldindan tasdiqlanadi va bu borada e'tiroz bildirish ortiqcha. Ammo muammo shundaki, biz terma jamoaga qaysi payt qaysi klublardan necha nafar o'yinchi chaqirilishini bilmaymiz-ku!
- Lekin yil davomida bo'sh kunlar ko'p, nahotki, terma jamoa yig'ini o'tkaziladigan muddatga umuman o'yin belgilamaslikning iloji yo'q bo'lsa...?
- Iloji bor, albatta. Lekin terma jamoaning talablari yil davomida oshib borishini ham inobatga olish lozim. Taqvimni qanchalik qulay tuzishga urinmaylik, murabbiylar shtabi yana-da yaxshiroq sharoit yaratib berishimizni so'rashi mumkin.
- Nima, yil boshida deylik, Samvel Babayan bilan birga o'tirib, «Qanday sharting bo'lsa, hozir ayt, taqvim tuzilgandan keyin uni buzmaymiz», deyish qiyinmi?
- Tabiiyki, avvaldan kelishib olamiz. Mana, terma jamoaning yillik rejasi bor va taqvim tuzish jarayonida shundan kelib chiqib, ish yuritamiz. Ammo bu o'rinda futbolchisi terma jamoaga chaqirilmaydigan klublar manfaatini ham unutmaslik lozim. Har qanday klubning o'ziga yarasha tayyorgarlik rejasi bo'ladi va terma jamoaga bog'liq tanaffus cho'zilib ketishi ayrim jamoalar zarariga ishlashi hech gap emas. Xullas, taqvim tuzishda barcha ishtirokchilar manfaatini hisobga olish talab etiladi. Bu o'rinda O'FFning talabi ham bor. Taqvim o'zgarsa, bizning ishimiz ham ko'payadi. Ayniqsa, xavfsizlik masalasiga jiddiy e'tibor qaratish lozim. O'yin boshqa kunga ko'chirilgan taqdirda, huquq-tartibot organlari vaqtida boxabar qilinishi shart. Qisqasi, taqvim buzilishi nafaqat muxlislar, balki ko'pchilik uchun noqulayliklar tug'diradi. Ammo o'rtada O'zbekiston terma jamoasi manfaati turganida, o'zgarishlarga qo'l urishga majburmiz.
- Lekin bu holat qachongacha davom etishi mumkin?
- O'zimizga qolsa, taqvimni umuman o'zgartirmaymiz. Hozir FIFAning 2020 yilga qadar tuzib qo'ygan rejasidan xabardormiz. Ammo ular bizdagi sharoit bilan mos emas. Hammasini kelishtirish esa ancha murakkab. Faqat shuni aytishim mumkinki, yangi mavsumda bu borada imkon qadar yaxshiroq ishlashga harakat qilamiz.
KUBOK FINALI
- O'zbekiston kubogi final o'yini Samarqand shahrida tashkillashtirildi va bu hammaga yoqdi. Buning uchun rahmat. Ammo bitta savol bor: uchrashuv nega soat 13:00ga belgilandi? Boz ustiga, hafta o'rtasida...
- Aslida O'zbekiston kubogi finali reja bo'yicha 27 noyabrda, ya'ni yakshanba kuni o'tkazilishi lozim edi. Shunda hech qanday muammo chiqmasdi. Ammo yana yuqorida aytilgan sabablar pand berdi. Davomi interfutbol.uz saytida.
— deya xabar beradi uff.uz nashri.