Xabaringiz bor, ayni paytda “Buxoro” klubi Toshkentda kishki yig'inni olib bormoqda. Jamoa yig'ini, o'zgarishlar va etakchilar bilan bog'liq masalalar borasida klub bosh murabbiyi Jamshid Saidov SPORTS.uz sayti uchun intervyu berdi.
Jamshid aka “Buxoro”ning tayyorgarlik jarayoni haqida ma'lumot berib o'tsangiz?
- “Buxoro” Toshkentdagi yig'inni yanvardan boshladi. Ertalab “Obod” stadionida mashg'ulotlar o'tkazsak, kechki payt “NBU-Osiyo” o'yingohida shug'ullanamiz.
Dastlabki o'rtoqlik o'yinimiz “Bunyodkor” o'rinbosarlar jamoasiga qarshi o'tkazdik. Jamoa tarkibi hali to'la emas. Bugungi o'yinda asosan yoshlar maydonga tushdi. Hozir ularga imkoniyat bermoqdamiz. Etakchilar esa sekin-asta klubga kelib qo'shilishmoqda.
“Bunyodkor” bilan o'yin bizning dastlabki o'rtoqlik uchrashuvimiz edi. Endi “Neftchi” va “Obod” bilan ham nazorat bahslari o'tkazamiz. Shundan so'ng bu bosqichdagi yig'inimiz yakunlanadi. So'ngra 3 kunga futbolchilarga javob beramiz. Keyin esa yana Toshkentda yig'ilamiz.
O'tgan yilgi o'yinlari orqali “Buxoro” ko'pchilikda yaxshi taassurot qoldirdi. Shunday ekan yangi mavsumda bu jamoaning maqsadi borasida barcha birdek qiziqmoqda. Shu haqda to'xtalib o'tsangiz?
- Ayni paytda aniq shu bizning maqsadimiz deb ayta olmayman. Lekin biz kamida o'tgan yilgi natijani takrorlashga harakat qilamiz. Hozirda bizda rahbariyatda o'zgarishlar bo'ldi. Shuning uchun hali aniq bir maqsad borasida ma'lum qilinmadi. Lekin biz hammasi yaxshi bo'ladi deb umid qilamiz.
“Buxoro” klubi sardori hisoblangan Shavkat Salomov Malayziyaning “T-Tim” jamoasi yig'inida ishtirok etdi. Uning kelajagi borasida muxlislar qiziqishmoqda. Aytingchi, Salomovni yangi mavsumda ham “Buxoro” safida ko'ramizmi?
- Buni vaqt ko'rsatadi. Oldindan bir narsa deyish qiyin. Kecha Aziz Ibragimov Chexiyadan keldi. Bugun u jamoa bilan birga. O'rtoqlik o'yinida ham ishtirok etdi. Shavkat Salomov ham kecha Malayziyadan qaytdi. U bilan gaplashib olishimiz kerak. Biz nafaqat Salomovni balki, klubning barcha etakchilarini olib qolishga harakat qilamiz. Bizning asosiy vazifamiz o'tgan yilgi jamoa o'zagini saqlab qolish.
Yangi mavsum oldidan “Buxoro” o'z safiga legioner ham qo'shib olishi mumkinmi?
- Albatta, 2016 yil “Buxoro” futboli saviyasini ko'tardik. Shuning uchun yangi mavsumda ham yanada yaxshi natijalar ko'rsatishga intilamiz. Bizdan muxlislar yanada ko'prog'ini kutishmoqda. Albatta, biz ularga munosib javob berishni istaymiz. Qolaversa, OChLga jamoani olib chiqishni xohlaymiz. Bu barchaning orzusi.
Biz o'tgan mavsumning birinchi davrasida legionerlarsiz harakat qildik. Ikkinchi mavsumda esa Vadim Chemirtanni qo'shib olgandik. Lekin u yaqinda “Bunyodkor”ga o'tib ketdi. Biz shunday futbolchi topishimiz uchun vaqt kerak. Legioner masalasida shoshish kerak emas. Biz chet-ellik futbolchini chaqirishdan oldin uning natijalarini yaxshilab ko'rib chiqamiz. Chemirtan ham huddi shu tarzda bizning klubga kelib qo'shilgandi. Ammo hozircha legioner masalasi bizning kun tartibimizdan o'rin olmagan.
Agar “Buxoro” legionerlarga ehtiyoj sezsa, bu qaysi chiziq futbolchisi bo'lishi mumkin?
- Hozir jamoa to'liq holda yig'ilsa keyin qandaydir to'xtamga kelishimiz mumkin. To'g'ri, barcha chiziqlarda muammolar bor. Himoya, yarim himoya va hujumda ham. Biz yangi mavsum uchun raqobatbardosh jamoa shakllantirishimiz kerak. Shuning uchun har bir pozitsiyaga kuchli futbolchilar kerak.
Jamshid aka, biz uchun vaqt ajratganingiz uchun rahmat. “Buxoro” klubiga yangi mavsumda ham omad tilab qolamiz.
- Rahmat.
Bekzod ISAEV
— deya xabar beradi uff.uz nashri.