Bugun jamoamiz poytaxt yig'inidagi to'rtinchi nazorat uchrashuvida maydonga tushdi. Bu galgi o'yinda futbolchilarimizga Bekobodning “Metallurg” klubi raqiblik qildi. Dastlabki uchta uchrashuvda ikki g'alaba va bitta durang qayd etgan “Navbahor” bu safar raqibga 2:3 hisobida imkoniyatni boy berdi. Uchrashuvning birinchi bo'lim o'rtalarida futbolchilarimiz hisobni ochishga erishishdi. Mirzohid G'ofurovning qanotdan uzatib bergan to'pini Azizbek Turg'unboev boshi bilan darvozaga yo'llashni uddasidan chiqdi. Tanaffusga yaqin bekobodliklar ikki bor muvaffaqiyat qozonishdi. Dastlab, “Metallurg” futbolchilari darvozamizga belgilangan penaltini aniq amalga oshirish orqali hisobni ochishgan bo'lsa birinchi bo'lim so'nggida Tursunboev darvozasi ikkinchi bor nishonga olindi. Ikkinchi bo'limda tomonlar bittadan gol urishdi. Dastlab bekobodliklar hisobni 3:1 ko'rinishiga keltirib qo'yishdi. Uchrashuv yakunlanishi arafasida Alisher Mahmudov “Metallurg” darvozasiga belgilangan penaltini aniq amalga oshirib, hisobni qisqartirdi. Aynan shu natija hakamning final xushtagi chalinguncha o'zgarishsiz qoldi. Jamoamiz uchrashuvni quyidagi tarkibda o'tkazdi: Akmal Tursunboev, Hasanboy Ergashev, G'iyos Komilov, Abbos Otaxonov, Tohir Shamsitdinov, Jahongir Mehmonov, Azizbek Turg'unboev, Ro'zimboy Ahmedov, Mirzohid G'ofurov, Dilshod Jabborov, Nemanya Yovanovich. Zaxiradan maydonga tushganlar: Alisher Mahmudov, Alisher Mirzaev, Islom Isoqjonov, Ravshan Xursanov, Abduaziz Sultanov, Akmal Ortiqov.
— deya xabar beradi uff.uz nashri.