Shubhasiz, Pol Pogba - frantsiyalik eng yaxshi futbolchilardan biri. Ayniqsa, hozirgi paytda. Yodingizdadir, u ilk bora 2013 yili 20 yoshli futbolchilar o'rtasida o'tkazilgan jahon chempionatida yaqqol ko'zga tashlangandi. Iste'dodli yarim himoyachi shundan buyon faollikni susaytirmay, yildan-yilga mahoratini oshirib bormoqda. Jumladan, Italiya chempionatida «Yuventus»ning ketma-ket 4 marta skudetto yutishiga ulkan hissa qo'shdi va bu orqali o'zi tarbiya olgan klub - «Manchester Yunayted»ga qaytishni uddaladi. E'tiborlisi, Pogbaning iqtidorini vaqtida etarlicha qadrlamagan «qizil iblislar» mazkur transfer uchun rekord darajada mablag' sarflashga majbur bo'lishdi. Bir so'z bilan aytganda, zamonamizning eng qimmatbaho futbolchisi yordamida Frantsiya terma jamoasi ham kuchaymoqda. FIFA.com sayti xodimlari kuni kecha Pogba bilan uchrashib, undan turli mavzular yuzasidan intervyu olishdi. Suhbat uchun tanlangan bosh masala  - Grizmann haqidagi savollar javobi birmuncha qiziqarli yangraganini alohida aytish o'rinli. - Ma'lumki, hamyurtingiz Antuan Grizmann asosiy yulduzlar - Krishtianu Ronaldu va Lionel Messi qatori yilning eng yaxshi futbolchisi maqomini olishga da'vogar bo'lib turibdi. Terma jamoadagi do'stingizni ushbu ro'yxatda ko'rish siz uchun yoqimlidir...  - Albatta. Yoqimligina emas, bundan faxrlanaman ham. Chunki Antuanning boshidan qanday kunlar o'tgani menga yaxshi ma'lum. Deylik, u «Atletiko Madrid» safiga qo'shilganida, ilk mavsum davomida juda qiynalgandi. Negaki, jamoaga to'la moslasholmagani bois, zaxirada o'tirar, etarlicha o'yin amaliyotiga ega bo'lmasdi. Antuan xususan, men bilan uchrashganida, bu haqda ko'p gapirar, jismoniy holati yaxshi bo'la turib, maydonga tushmayotganidan asabiylashardi. Eng muhimi, Grizmann bunday yoqimsiz va og'ir ruhiy holat sabab, tushkunlikka berilmadi. Aksincha, tinimsiz ter to'kib, aslida kim ekanligini barchaga isbotladi. Mana, ko'rib turganingizdek, endi u dunyoning eng yaxshi 3 nafar futbolchisi safida. Antuanning muvaffaqiyatidan juda xursandman. Boz ustiga, u Frantsiya fuqarosi va bu omil meni ikki karra quvontiradi. O'ylashimcha, milliy jamoamizning hozirgi avlodi borgan sari Zidan davridagi yulduzli tarkib shakliga kirib bormoqda. - Grizmanni boshqalardan yaqqol ajratib turadigan xususiyatlar bormi? - Menimcha, bu - uning mehnatsevarligi. Ma'lumki, Antuan avvallari hujumchi hisoblanmasdi. Lekin bugunga kelib, etarlicha ko'p gol urmoqda. U juda aqlli, gavdasidan qanday foydalanishni yaxshi biladi. Aslini olganda, Antuanning bo'yi uncha baland emas. Biroq shunga qaramay, epchilligi hisobiga ayrim kamchiliklarini butunlay yopib yuboryapti. Deylik, imkon tug'ilishi bilan raqib darvozasini o'qqa tutadi. Ayni shu xususiyati Antuanni g'oyat xavfli hujumchiga aylantirmoqda. - Xo'sh, Antuan maydon chetida qanday inson? - Aytsam ishonmaysiz: Antuan men uchratgan futbolchilar orasida eng ajoyibi. U mashg'ulotlarda qancha ko'p ter to'kmasin, doimo quvnoqligicha qolaveradi. Kiyinish xonasida ham barchaga yaxshi kayfiyat ulashadi. Ajablanarlisi, Grizmann to'p bilan oldinga intilganida, qandaydir o'ta engil harakatlanib, kutilmagan fintlar ishlatadi va raqiblaridan osonlikcha o'tib ketaveradi. To'pni o'zida ushlab turishi bilan esa Dide Drogbani eslatadi. Harqalay, to'pni undan olib qo'yishning iloji yo'q, deyarli. - Pol, oxirgi vaqtlarda o'zingiz ixtiro qilgan raqs harakatlarini tez-tez ijtimoiy tarmoqlarga joylayapsiz. Antuan ham shunday raqslarga tusha oladimi? Davomi: www.interfutbol.uz
— deya xabar beradi uff.uz nashri.