Bundan biroz vaqt oldin Qibrayda “Navbahor” va “So'g'diyona” jamoalari o'rtasidagi nazorat o'yini yakunlandi. Bu safargi uchrashuvda ham jamoamiz raqibga imkoniyatni boy berdi. Yodingizda bo'lsa futbolchilarimiz o'tgan haftada "Metallurg" klubiga 2:3 hisobida yutqazishgandi. O'yinning birinchi bo'limida urilgan yagona gol “So'g'diyona”ning 1:0 hisobidagi g'alabasini ta'minladi. Uchrashuvning birinchi bo'limi teng kurashlar ostida o'tgan bo'lsada, jizzaxliklar hisobni ochishga erishishdi. Raqib futbolchisi 25 metrlardan belgilangan jarima zarbasini golga aylantirishni uddasidan chiqdi. Eminovning zarbasidan keyin to'p darvoza ustuniga tegib to'rdan joy oldi. Tanaffusdan keyin futbolchilarimiz hisobni tenglashtirish uchun bir qator hujumlar tashkil etishdi. Gol urish uchun imkoniyatlar bo'lsada vaziyatlardan foydalanishda aniqlik etishmadi. Ikkinchi bo'lim o'rtalarida har ikki jamoa a'zolari o'zaro tortishib ketishdi. Shu sababli hakam uch nafar futbolchiga qizil kartochka ko'rsatdi. Jamoamizdan Alisher Mahmudov va Alisher Mirzaevlar maydondan chetlatilishdi. Nazorat o'yini bo'lganligi sababli o'yinchilar sonini tenglash maqsadida Ravshan Xursanov yana safga qo'shildi. Uchrashuvni jamoamiz quyidagi tarkibda o'tkazdi: Asilbek Omonov, Jahongir Mehmonov, G'iyos Komilov, Tohir Shamsiddinov, Alisher Samatov, A'zam Aliev, Dilshod Jabborov, Oybek Qilichev, Mirzohid G'ofurov, Ro'zimboy Ahmedov, Ravshan Xursanov. Zaxiradan maydonga tushganlar: Azizbek Turg'unboev, Alisher Mahmudov, Hasanboy Ergashev, Abduaziz Sultanov, Akmal Ortiqov, Abbos Otaxonov, Ilhom Boydedaev, Alisher Mirzaev. Uchrashuvda jamoamizning serbiyalik hujumchisi Nemanya Yovanovich ishtirok etmadi. Legioner futbolchimiz mashg'ulot o'tkazish bilan cheklandi. Yana bir darvozabon Nodir Ashurmatov esa zaxirada qoldirildi.
— deya xabar beradi uff.uz nashri.