Birinchi Liganing 15-turida "Kosonsoy" uyda "Xorazm"ni qabul qildi. Uchrashuvda Mehmonxon Solixo'jaev shogirdlari 4:2 hisobid zafar quchdi. Endilikda bu klub so'nggi turda "Obod"ga qarshi safarda to'p suradi. Aytish kerak, bu o'yinning ahamiyati juda yuqori hisoblanmoqda. "Obod" uyda bo'ladigan bahsda "Kosonsoy"ni mag'lub qilsa, oliy ligaga beriladigan yo'llanmani naqd qiladi. Shuning uchun ham ushbu bellashuvga qiziqish yuqoridir. "Xorazm" bilan o'yindan so'ng "Kosonsoy" bosh murabbiyi Mehmonxon Solixo'jev UFF.uz internet portaliga o'z fikrlarini bildirib o'tdi.
- "Xorazm" bilan o'yindan keyingi fikrlaringiz qanday?
- O'yin qiyin kechdi. Lekin shogirdlarim harakter namoyish qilishib, g'alaba qozondik. Aslida raqib yomon jamoa emasdi. Lekin biz o'z o'yinimizni namoyish qilish orqali muvaffaqiyatga erisha oldik. G'alabani tantana qilish yoqimli bo'ldi.
- Keyingi turda "Obod" bilan muhim o'yin kutmoqda. Toshkentliklar uyda "Kosonsoy"ni engsa, oliy liga yo'llanmasini naqd qiladi.
- Xabarimiz bor. Men shuni ayta olamanki, chindan ham birinchi liganing joriy yildagi eng qiziqarli bahsi bo'lib o'tadi. "Kosonsoy" safarga shunchaki bormoqchi emas. Qo'limizdan kelgan barchasini ishga solib, raqibimizga imkoniyatni bermaslik uchun to'p suramiz. Bu borada klubimizning imkoniyati yaxshiroq deb o'ylayman. Bosim yo'q. "Obod" g'alaba uchun baribir kurashadi va o'ziga yarasha bosim yuzaga keladi. Shundan ham foydalanib qolmoqchimiz.
- Shogirdlaringizdan "Obod" klubidan ochko tortib olishiga ishonasizmi?
- Albatta. Futbolda hamma narsa ro'y beradi. Ertadan mashg'ulotlarni boshlaymiz. Poytaxtadagi bahsda osonlikcha taslim bo'lmaslik uchun kurashamiz. "Obod" yaxshi jamoa. Lekin biz ularga munosib qarshilik ko'rsatmoqchimiz.
- Mazkur o'yin oldida jamoa safida yo'qotishlar yo'qmi?
- Hozircha barcha o'yinchilarimiz sog'-salomat.

— deya xabar beradi uff.uz nashri.