Yosin bin al Manni kim o'zi? «Nyukasl»ning ushbu debyutanti hozir ko'pchilikning og'zida. Boisi uning ijrosidagi jarima zarbalaridan keyin to'p g'oyat go'zal tarzda darvoza «to'qqizligi»dan joy olmoqda. Bundan tashqari, u raqib o'yinchilarini noqulay ahvolga solib kelyapti. Aytaylik, to'pni oyoqlar orasidan olib o'tish uning eng sevimli fintlaridan biridir. Xo'sh, bu bola o'zi kim va qaerdan paydo bo'ldi? Bu savolga javob topishga harakat qilamiz. - Bularning hammasini qaerdan o'rgandim? Aslida, Ronaldino, Leo Messi, Robino va Krishtianu Ronaldular ishtirokidagi lavhalarni YouTubeda ko'rardim. Ulardan biror narsani o'rganib, takrorlashga harakat qilardim. O'tgan hafta Angliya kubogi doirasidagi «Nyukasl»-«Birmingem» o'yi­nida 21 yoshli Yosin bin al Manni  «olaqarg'alar» safidagi debyutini o'tkazdi. g'alabali bellashuvda u 70 daqiqa maydonda harakat qildi. «Xo'sh, nima bo'libdi?» degan o'rinli savol tug'ilishi tabiiy. Gap shundaki, olti oy oldin «Nyukasl» uni ruyxatdan o'tkazganida u bor-yo'g'i YouTubedagi fristayllar yulduzi edi, xolos. Endi esa o'rinbosarlar safida 8ta o'yin o'tkazib, asosiy tarkibgacha etib kelishga muvaffaq bo'ldi. Yosin o'z mashhurligiga Rule m Sports kanalidagi rolik seriyalari tufayli erishdi. Bu loyiha eng zo'r britaniyalik videoblogerlar tomonidan yaratilgan bo'lib, mashhurlikka erishgan. Yosin ishtirokidagi roliklarni taxminan yarim millionga yaqin kishi tomosha qildi va ular orasida «Nyukasl» ofisidagilar ham bo'lishgan. Yo'qsa, «Chelsi» ko'rigidan o'tolmagan o'yinchi bu ishni qanday qilib Angliya­ning shimoliy-sharqida uddaladi? 1995 yili Londonda tug'ilgan al Mannining kelib chiqishi marokashlikdir. Uning familiyasi va ismi ham bundan dalolat berib turibdi. Uning ota-onasi afrikalik, o'zi esa londonlik bo'lishga erishdi. Biroq bu narsa unga hech qanday imtiyoz bergani yo'q. «Nyukasl»gacha Yosin atigi ko'cha futboli va Britaniya futbolining eng quyi tabaqalarida ishtirok etadigan «Barneta», «Aldershot», «Farnboro» va «Lyuis» kabi jamoalarning yoshlari tarkibida o'ynash bilan kifoyalangan. Ularning faqatgina oxirgisida ishlari biroz yaxshi ketgan. Al Mannini o'zi ham buni tan oladi. O'tgan yili u hatto, «Chelsi» ko'rigida bo'lib, kimsan Gus Xiddink boshqaruvida asosiy tarkib bilan shug'ullandi. O'rinbosarlar safidagi debyut o'yinida gol urgan bo'lsada, ko'rikdan baribir, o'tolmadi. - Bu voqealarning hammasi menga yordam berdi. Shuncha yillik «darbadarlik»dan keyin «Nyukasl»da taqdim etilgan imkoniyatni qo'ldan boy bermasligim kerak, - dedi Yosin. Yaqinda «Nyukasl» yoshlar jamoasi murabbiyi Piter Birdsli ham o'z shogirdining iste'dodi haqida iliq fikrlar bildirdi.«Hujumda unda hech qanday muammo yo'q. Faqat himoya­chilarga yordam berish uchun orqaroqda o'ynashni ham o'rganishi kerak. qachon pressingga qo'shilib, yordam berishni tushunib olish lozim. Shunga qaramay, u ajoyib yigit va hammasini tez o'rganyapti», - dedi Piter.  Davomi: www.interfutbol.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.