“Lokomotiv” bu yilgi Osiyo chempionlar ligasini 20 fevral kuni boshlaydi. “Temiryo'lchilar” Saudiya Arabistonida “Al Taavon” mehmoni bo'lishadi. Jamoa OChL reglamentiga ko'ra bugun o'yin bo'lib o'tadigan stadionda bir soatlik mashg'ulot o'tkazdi. Ungacha esa kunning boshqa tadbirlari tashkil qilindi. Dastlab biz istiqomat qilayotgan mehmonxonada har ikkala klub vakillari hamda uchrashuv rasmiylari ishtirokida miting bo'lib o'tdi. Bunda ba'zi tashkiliy masalar hamda ertangi o'yinda kimning qaysi formada to'p tepishi aniqlab olindi. Demak, “Lokomotiv” “Al Taavon” bilan kechadigan bahsda qizil rangli, raqib jamoa esa sariq rangli futbolkalarda o'ynaydi. Uchrashuv mahalliy vaqt bilan 18:40da (Toshkent vaqti bilan 20:40) start oladi. Mitingdan so'ng o'yinoldi matbuot anjumani tashkil qilindi. Bunda dastlab mehmonlar ishtirok etishdi. “Lokomotiv” bosh murabbiyi Andrey Miklyaevga 33-raqamdagi futbolchimiz Oleg Zoteev hamrohlik qildi. Andrey Gennadevich savollarga javob qaytarar ekan, “Lokomotiv” yana bir bora Saudiya Arabistoniga tashrif buyurganidan mamnun ekanligini aytib o'tdi. “Biz bu erga necha marta kelgan bo'lsak, har safar iliq taassurotlar bilan qaytganmiz. Umid qilamanki, bu safar ham shunday bo'ladi. “Al Taavon” Osiyo chempionlar ligasida birinchi bor ishtirok etmoqda, ular bundan xursand ekanliklari turgan gap”. “Biz ertaga shu yil hisobidan birinchi rasmiy uchrashuvni o'tkazamiz va o'yin qanday kechishini oldindan aytish qiyin. Saudiya chempionatida mavsum ayni qizg'in pallaga kirgan, bizda esa chempionat hali boshlangani yo'q. Lekin biz bu haqda o'ylayotganimiz yo'q, chunki bu erga ijobiy natija bilan qaytish maqsadida kelganmiz”. “Al Taavon”ni yaxshilab o'rganishga harakat qildik. Ularning oxirgi ikkita uchrashuvini diqqat bilan kuzatib chiqdik. Jamoa yaxshi holatda. Biz mavsumga tayyorgarliknining asosiy qismini dastlab Dubayda, keyin Antaliyada olib bordik. Yigitlar ertangi o'yinga tayyor” – deya aytib o'tdi Andrey Miklyaev. Jurnalistlardan biri Oleg Zoteevga quyidagi savol bilan murojaat qildi: “Saudiyada futbolchilar tezkor va texnikasi zo'r, O'zbekistonda esa jismonan kuchli futbolchilar ko'p. Bu haqda nima deya olasiz?” Ushbu savolga javoban Zoteev quyidagi fikrni bildirdi: “O'zbekistonda ham texnik tomonlama mahoratli futbolchilar ko'p, xususan bizning jamoada ham bunday futbolchilar etarlicha topiladi. Agar ishonmasangiz, ertaga o'yinimizni ko'ring va bunga o'zingiz guvoh bo'lasiz”. Matbuot anjumanining ikkinchi qismida “Al Taavon” bosh murabiiyi Konstantin Galsa va jamoa sardori Talab Ali Absi qatnashdi. Ruminiyalik murabbiy bo'lajak bahs haqida fikr bildirar ekan, ko'p narsa omadga bog'liqligini aytib o'tdi. “O'zbekistonda mavsum hali boshlanmaganini bilamiz. Bu biz uchun yaxshimi? To'g'risi, bir narsa deyishim qiyin. Chunki ba'zi jamoalar birinchi rasmiy o'yindayoq ijobiy natija ko'rsata olishadi. “Lokomotiv”da hamma narsa bor: kuch, tezlik va raqibga nisbatan bosim. Ochig'i, bu jamoani hurmat qilish lozim”. “Albatta, ertangi bahs biz uchun juda muhim. Chunki klub tarixida ilk bor Osiyo chempionlar ligasi o'yinini o'tkazamiz. Futbolchilarimiz bo'lajak uchrashuvni intiqlik bilan kutishmoqda. Biz yangi tarix yaratishga harakat qilamiz”. “Menda ertangi o'yinga oid bir qator rejalar bor: uchrashuvni A planda boshlaymiz va o'xshamasa B, C rejalarga o'tamiz. Albatta, Osiyo chempionlar ligasida omad tufayli qatnashyapmiz va guruhdagi barcha raqiblarni hurmat qilamiz. “Lokomotiv”, “Al Ahli”, “Istiqlol” – bular Osiyoda nomi chiqqan klublar hisoblanadi. Lekin, biz ham o'zimizni ko'rsatishni xohlaymiz”, – deydi “Al Taavon” bosh murabbiyi. Matbuot anjumaniga yakuniga etgach, oradan ko'p o'tmay “Lokomotiv” o'yin bo'ladigan stadionga yo'l oldi. Jamoaning o'yinoldi mashg'uloti qizg'in kechdi. Barcha futbolchilar bor kuch bilan harakat qilishdi. Barchaning e'tibori Saudiya Arabistonidan uch ochko bilan qaytishga qaratilgan. Bir so'z bilan aytganda, “Lokomotiv” bo'lajak o'yinga tayyor va nasib qilsa g'alaba qozongan holda Toshkentga qaytamiz. “Lokomotiv” PFK matbuot xizmati. 
19 fevral, Burayda, S.Arabistoni.
— deya xabar beradi uff.uz nashri.