Osiyo Chempionlar Ligasi “S” guruhi 2-turidan o'rin olgan “Bunyodkor” – “Al-Ayn” uchrashuvni oldidan tashkil etilgan matbuot anjumanining ikkinchi qismida “qaldirg'ochlar” ustozi Sergey Luchshan hamda yarim himoyachi Dostonbek Hamdamov ishtirok etdi. “Raqib ancha xavfli, bu darajadagi kuchli jamoa bilan avval o'ynamaganmiz. “Al-Ayn” turnir favoriti sanaladi. Raqib jamoaning barcha rasmiy o'yinlarini kuzatib bordim, ularni o'rgandim. “Al-Ayn” hujumkor futbol ko'rsatishiga amin bo'ldim. Raqib tarkibi ajoyib, ularda Osiyoning eng yaxshi futbolchisi – Umar Abdulrahmon to'p suradi.  U haqiqiy “o'zga sayyoralik”. Umar ajoyib uzatmalar beradi, maydonni to'liq ko'ra oladi. “Bunyodkor”ning asosiy maqsadi yoshlarni tarbiyalash va ularga o'yin amaliyotini berish, ayniqsa, OChL musobaqasida. Shubhasiz, “Al-Ayn” ertaga favorit, biroq ochko olish uchun kurashamiz. Dastlabki o'yinda qo'yilgan xatolar borasida yigitlar bilan gaplashib oldik, ammo ular yosh va hamma ham xato qiladi”, – dedi Sergey Lushchan. “Uchrashuv oson bo'lmasligini bilamiz va shunga yarasha tayyorgarlik ko'rdik. O'z o'yinimiz bilan muxlislar va o'zbek xalqini xursand qilishga harakat qilamiz. Jamoaiy o'yin asosiy qurolimiz”, – dedi Dostonbek Hamdamov. Eslatib o'tamiz, “Bunyodkor” va “Al-Ayn” o'rtasidagi uchrashuv ergata, 28 fevral kuni Toshkentdagi “Bunyodkor” stadionida bo'lib o'tadi. O'yin 18:00 da start olishi rejalashtirilgan.
— deya xabar beradi uff.uz nashri.