«Lokomotiv»ning avvalgi turda Saudiya Arabistonida ko'rsatgan o'yini va qayd etgan natijasi muxlislarni ranjitgani ayni haqiqat. Albatta, mavsum startidagi muvaffaqiyatsizlik hali jamoaning to'liq formaga kirmagani, boz ustiga, ko'p xatolarga yo'l qo'yilgani bilan izohlandi. O'sha xatolardan to'g'ri xulosa chiqarilgan, chog'i, 2-turda «temiryo'lchilar» o'z maydonlarida OChL-2017dagi dastlabki g'alabani qo'lga kiritishdi. «Lokomotiv»-«Al-Ahli» uchrashuvidan oldin tashkil etilgan matbuot anjumanida dastlab mehmon jamoa ustozi Kosmin Olariu qatnashib, jurnalistlar savollariga javob qaytardi. Unga hujumchi Makete Diop hamrohlik qildi. IKKI O'ZGARISh Bu galgi raqib jiddiyroq edi, buni BAA klubining tarkibidan ham anglab olish qiyin emas. Tabiiyki, shunga yarasha choralar qo'llash talab etilardi. «Lokomotiv» murabbiylar shtabi «Al-Ahli»ga qarshi bahsda tarkibda ikkita o'zgarishga qo'l urishdi. Sadriddin Abdullaev va Salim Mustafoev bu gal zaxirada qoldirilib, ularning o'rniga Marat Bikmaev hamda Salamat Qutiboev uchrashuv boshidanoq maydonga tushishdi. Aytish joizki, Mirko Yelichichning bu qarori o'zini to'liq oqladi. TEZKOR GOL Ha, aynan mana shu tezkor gol «temiryo'lchilar» muvaffaqiyatida muhim rol o'ynadi. Zero, shundan so'ng «Lokomotiv» futbolchilarining o'zlariga bo'lgan ishonchlari ortib, raqibga erkin o'ynash imkoniyatini berishmadi. Bevosita to'p kiritilgan vaziyatga to'xtaladigan bo'lsak, maydon egalarining 20-soniyadayoq uyushtirgan dastlabki hujumi Marat Bikmaevning chap qanotdan to'p uzatishi va Salamat Qutiboevning boshi yordamida «Al-Ahli» darvozasini ishg'ol qilishi bilan xotima topdi. XATODAN ChIQARILGAN XULOSA Mehmonlar voqealar bunday rivoj olishini kutishmagani bois, biroz karaxt ahvolga tushishdi. Ammo shunga qaramay, ularning hujumlari ham xavfli tus oldi. Ammo Saudiyadagi o'yinda xatoga yo'l qo'yganini tan olgan Nesterov Toshkentdagi bahsda ajoyib harakat qilib, aksariyat vaziyatlarda jamoasi joniga oro kirdi. Xullas, avvalgi xatosini «yuvdi». Bilasiz, futbolda darvozabonning ishonchli o'yini uning sheriklariga ijobiy ta'sir o'tkazadi. Amalda ham shunday bo'ldi. Dastlabki 45 daqiqa mobaynida «temiryo'lchilar» bir nechta xavfli hujumlar uyushtirishdi, ammo tanaffusgacha hisob o'zgarmadi. IKKINChI BO'LIM Mehmonlar kutilganidek, ikkinchi bo'limni tarkibdagi bitta o'zgarish va tabiiyki, hujumkorlik bilan boshlashdi. «Lokomotiv» esa asosan himoyalanib, imkon tug'ilishi hamono oldinga o'tdi. Ammo gol urish yana «temiryo'lchilar»ga nasib qildi. 57-daqiqada shu kuni eng yaxshi futbolchilardan biriga aylangan Sardor Mirzaevning to'p uchun kurashdagi faolligi samara keltirib, buning natijasida Marat Bikmaev raqib darvozaboni bilan yakkama-yakka holatda qoldi. Tajribali hujumchi bunday pallalarda qanday o'ynash kerakligini juda yaxshi biladi: «Al-Ahli» kiperi u tomonidan yo'llangan zarba oldida ojiz qoldi - 2:0. XULOSA Umuman olganda, shu kuni «Lokomotiv» tezkor va mazmunli o'yin namoyish etdi. Futbolchilarda o'ziga bo'lgan ishonch oshgan, jamoada biz ko'nikkan g'oliblik ruhi ko'zga tashlanmoqda. Salamat Qutiboev, Jaloliddin Masharipov, Shuhrat Muhammadiev hamda afrikalik legionerlar «Loko» o'yiniga asta-sekin moslashishmoqda. Shu kuni «temiryo'lchilar»ga raqiblik qilgan jamoaning jiddiy ekanini inobatga olsak, faollikni saqlagan holda dastlabki maqsad - guruhdan chiqish vazifasini uddalasa bo'ladi. Buning uchun albatta, keyingi o'yinlarda ham faqat g'alaba haqida o'ylash va imkon qadar ko'proq ochko to'plash lozim. Ishonamizki, Mirko Yelichich va uning shogirdlari buni sharaf bilan uddalashadi. Hozircha esa «Lokomotiv»ni OChL-2017dagi ilk uch ochko bilan tabriklaymiz. Davomi bor. Ushbu tahliliy maqola davomini "InterFUTBOL" gazetasining  2 mart kungi payshanba sonida mutoala qilishingiz mumkin.  InterFutbol.uz ningTelegramdagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.