“Qizilqum” — “Metallurg” uchrashuvidan so'ng, ikkinchi bo'lib mezbonlar futbol klubi bosh menejeri Hamidjon Aktamov jurnalistlar bilan o'z fikrlarini o'rtoqlashdi.
— Bugungi o'yin muxlislarga ham manzur bo'ldi, deb o'ylayman, — deya so'z boshladi Hamidjon G'ulomovich. — Afsuski, jamoamiz a'zolari uchrashuvda ular kutganidek futbol namoyish qila olishmadi.  “Metallurg” futbolchilari  o'yinlarini tahlil qilib, chuqurroq o'rganishga harakat qilgandik.  Biroq, jamoamiz a'zolarining dastlabki bo'limda raqibni mensimay maydonga tushganligi yakunda qimmatga tushdi. Qolaversa, chempionat oxirida ayrim futbolchilarimizning jarohat tufayli maydonga tushmaganligi ham bugun salbiy ta'sir qildi.
— Aksariyat vaziyatlarda yigitlarimiz uyushtirilgan hujumlarga mavsum to'purari Bahriddin Vahobov orqali ijobiy nuqta qo'yishni mo'ljallashgandi. Ammo raqib himoyachilari bunga yo'l berishmadi. Agar sodir etilgan xavfli vaziyatlardan unumli foydalanganimizda, bugun bemalol g'alaba qozonishimiz ham mumkin edi. Nachora, bu futbol!  Afsuski, doimo o'ylagan rejalaring osonlikcha amalga oshavermaydi.
— Jamoamiz oldiga muxlislarga manzur bo'ladigan o'yin namoyish etib, g'alabalar qozonish vazifasi yuklatilgan. Yashirmayman, bizning moliyaviy ahvolimiz kamtarona. Biz ham kuchli legionerlarni jalb etishni juda istaymiz. Ammo hozirgi imkoniyatimiz bunga yo'l bermaydi.
— Asosan mahalliy futbolchilar xizmatidan foydalanyapmiz. Yana bir turdan so'ng, navbatdagi chempionat nihoyasiga etadi. Garchi, safarda o'ynasak-da, unda faqat g'alaba uchun maydonga tushamiz. Navoiyda ko'pchilik havas qiladigan futbol maydoni barpo etildi. Kelasi mavsumdan boshlab  uy uchrashuvlarimizni “Yoshlar” sport majmuasida o'tkazamiz. Navoiyda kuchli va raqobatbardosh jamoa shakllantirishni rejalashtirganmiz. Bu borada bosqichma-bosqich ishlar amalga oshirilmoqda. Yangi mavsum oldidan tarkibda ham, murabbiylar shtabida ham jiddiy o'zgarishlar amalga oshiriladi. Navoiyda futbolni juda sevishadi. Buni har bir uchrashuvga tashrif buyurayotgan tomoshabinlar soni ham tasdiqlab turibdi.  Maqsadimiz esa avvalo ana shu muxlislar ishonchini oqlashdir. Bu yo'lda bor kuch va imkoniyatimizni ishga solishga harakat qilamiz, albatta.

— deya xabar beradi uff.uz nashri.