Xalqaro havaskor bokschilar uyushmasi – AIBA tomonidan o'tkazilayotgan The World Series Boxing (WSB) - Butunjahon boks seriyalarining VII mavsumida keskin va murosasiz kurashlarga boy bo'lmoqda.
Ayniqsa, musobaqaning "S" guruhidan boks rivojlangan mamlakatlar jamoalari - O'zbekistonning "Uzbek Tigers", Xitoyning "China Dragons", Rossiyaning "Patriot boxing team" va Qozog'istonning "Astana Arlans Kazakhstan" bokschilari joy olgani janglarning keskin va murosasiz o'tishini ta'minlamoqda.
Eng kuchli va murakkab deya e'tirof etilgan bu guruhda to'rtinchi turdan so'ng vaziyat tubdan o'zgardi. "Uzbek Tigers" jamoasi dastlabki ikki turdagi kutilmagan mag'lubiyatdan so'ng uchinchi turda g'alaba qozonganiga qaramay, to'rtinchi tur oldidan ham so'nggi pog'onani egallab turgandi.
O'zbek bokschilari to'rtinchi uchrashuvda ham haqiqiy qudratini namoyish etib, birinchi turdagi Xitoydagi mag'lubiyat tasodif ekanini isbotladi. Ayniqsa og'ir vaznli bokschilarimiz Bektemir Meliqo'ziev va Bahodir Jalolovning raqiblari jangni oxirigacha etkazolmadi. Ketma-ket ikkinchi uchrashuvda 5:0 hisobida zafar quchgan "o'zbek yo'lbarslari" ochkolari sonini oltitaga etkazib oldi va bu "Uzbek Tigers"ni so'nggi pog'onadan ikkinchi o'ringa olib chiqdi.
To'rtinchi turdan so'ng "S" guruhida quyidagi vaziyat yuzaga keldi. "Astana Arlans Kazakhstan" jamoasi ketma-ket to'rtta g'alabadan so'ng 12 ochko bilan birinchi o'rinni egallab turibdi. Qozog'istonliklar to'rtta uchrashuvdagi 20 ta jangdan 16 tasini o'z foydasiga hal qildi. Mutaxassislar "Ostona bo'rilarini" keyingi turda jiddiy raqibga duch kelishini ta'kidlashdi. "Astana Arlans Kazakhstan" jamoasining g'alabali seriyasi 1 aprel kuni Toshkentda "Uzbek Tigers" bokschilari tomonidan to'xtalishi kutilmoqda.
To'rtinchi tur oldidan to'rt ochko bilan ikkinchi o'rinda turgan Rossiya jamoasi ketma-ket ikki uchrashuvdan birorta ochko jamg'ara olmadi. Buning oqibatida "Patriot boxing team" bokschilari o'z o'rnini o'zbekistonlik charm qo'lqop ustalariga bo'shatib berdi.
"Uzbek Tigers" bokschilaridan yirik hisobda mag'lubiyatga uchragan "Xitoy ajdarlari" esa guruh autsayderiga aylanib qoldi. Xitoylik bokschilar 20 ta jangdan atigi to'rttasida g'alaba qozongan va 16 tasida mag'lub bo'lgan.
Nihoyat, ketma-ket 5:0 hisobidagi g'alabadan so'ng "Uzbek Tigers" so'nggi pog'onani xitoyliklarga qoldirib, ikkinchi o'ringa ko'tarilib oldi. Hamyurtlarimiz to'rtta uchrashuvda o'tkazilgan 20 ta jangdan 13 tasini o'z foydasiga hal qilgan. Bu ko'rsatkich bo'yicha ham bokschilarimiz guruhda ikkinchi o'rinni qayd etgan. №   Jamoa ochko yutuq mag'lubiyat durang 1 ASTANA ARLANS KAZAKHSTAN 12 4 0 0 2 UZBEK TIGERS 6 2 2 0 3 PATRIOT BOXING TEAM 4 1 3 0 4 CHINA DRAGONS 3 1 3 0
WSB turniri qoidalariga ko'ra, 12 jamoa uchta guruhda o'zaro raqobatlashmoqda. Har bir guruhdan eng yuqori ikki pog'onani egallagan va eng yaxshi ko'rsat kichga ega bo'lgan bir juft uchinchi o'rin sohibi keyingi bosqichga chiqadi.
"Uzbek Tigers" bokschilari 1 aprel kuni bo'ladigan beshinchi tur uchrashuvini Toshkentda guruh peshqadami "Astana Arlans Kazakhstan" jamoasiga qarshi o'tkazadi. Mazkur bahs nafaqat guruhning balki bu yilgi mavsumning markaziy uchrashuvi bo'ladi.
Hozirda "Uzbek Tigers" bokschilarida musobaqaning pley-off bosqichiga chiqish uchun juda qulay imkoniyat yuzaga kelgan. Bokschilarimizga omad va g'alabalar tilaymiz!
— deya xabar beradi uff.uz nashri.