Jamoalari turli yoshdagi viloyat, Respublika va xalqaro musobaqalarda muntazam g'oliblikni egallaydigan Andijon futbolga ixtisoslashgan maktab-internatida kishi havas qilgudek sharoitlar muhayyo.
Mussasada barcha qulayliklarga ega muhtasham bino, sport zali, yopiq suv havzasi, 2 ta sauna, trenajyor xonasi, ikkita 90x50 hajmdagi tabiiy,  joiz bo'lsa oliy va birinchi liga jamoalari havas qiladigan 100x68 hajmdagi tribunalari 750 nafar tomoshabinga mo'ljallangan sun'iy qoplamali futbol maydoni, 120 o'rinli yotoqxona mavjud. Yuqoridagi sanab o'tilgan barcha inshootlar  yosh futbolchilar xizmatida.
Hozirgi kunda maktab-internatida tanlov asosida qabul qilingan 10 yoshdan 15 yoshgacha bo'lgan 149 nafar o'quvchi yoshlar ta'lim va tarbiya olmoqdalar. Ularga o'z kasbini ustasi bo'lgan murabbiylar futbol sirlarini o'rgatib kelishayotir.
- Ta'lim dargohimiz faoliyatini 7 yil oldin boshlagan bo'lib, oz fursat davomida bir qator muvaffaqiyatlarga erishdik,-deydi maktab-internati direktori Nasibullo Madrahimov. – Ayni paytda mamlakatimizning etakchi va turli yoshdagi terma jamoalarida ko'plab tarbiyalanuvchilarimiz to'p surishmoqda. Jumladan,  15 yoshgacha bo'lgan O'zbekiston terma jamoasiga ikki nafar,  17 yosh toifasiga 5 nafar, 19 yoshgacha bo'lgan saralangan jamoaga esa 6 nafar shogirdimiz jalb qilingan. “Bunyodkor”, “Paxtakor”, “Metallurg” kabi oliy liga hamda birinchi liganing “Andijon”, “UzDongJU” va “Norin” klublari safida bir qator tarbiyalanuvchilarimiz muvaffaqiyatli ishtirok etishmoqda.
Maktab-internati vakillari o'tgan 2016 yilda Xalq ta'limi vazirligi  tizimidagi futbolga ixtisoslashgan maktab-internatlari o'quvchilari o'rtasida o'tkazilgan Respublika musobaqasida 1- o'rinni egalladi. Rossiyaning Sochi shahrida o'tkazilgan xalqaro turnirda 2003 yilda tavallud topgan o'quvchilardan iborat maktab jamoasi  MDH va Sharqiy Evropa davlatlaridan tashrif buyurgan tengqurlari bilan bellashib 4 o'rinni qo'lga kiritdilar. 2015- 2016 yillar davomida tarbiyalanuvchilardan iborat jamoalar jami 29 ta viloyat va mamlakat miqyosidagi  musobaqalarda qatnashib, deyarli barchasida g'olib va sovrindor bo'lishgan.
Erishilayotgan yutuqlar zamirida - Yazgeldi Kudanov, Lutfullo Majidov, Shakir Galimov, Shohruh Ishanov va Lochin Guldaev kabi murabbiylarning sidqidildan qilayotgan mehnatlari yotibdi.   
Ta'lim dargohining turli musobaqalarda faol qatnashishi uchun viloyat hokimligi katta e'tibor qaratib kelmoqda.
Istiqlol bergan imkoniyatlarga har tomonlama unumli va samarali ishlari bilan javob berayotgan Andijon futbolga ixtisoslashgan maktab-internatidan hali ko'plab iqtidor egalari etishib chiqishiga tilakdoshmiz.
Elmurod Ermatov, Andijon
Elmurod Ermatov, Andijon  
— deya xabar beradi uff.uz nashri.