Ertaga Toshkentda katta o'yin bo'ladi. "Bunyodkor" stadioni O'zbekiston hamda Qatar terma jamoalari o'rtasidagi o'yinni qabul qiladi.
Afsuski, 23 mart kuni Suriyaga qarshi o'yinda termamiz mag'lubiyatga uchrab, ko'plab tanqidlarni keltirib chiqardi. Lekin, o'zbek ishqibozi hamma narsaga ko'nikadi va unutadi. Qaytadan termasining o'yinlariga mahliyo bo'laveradi, bu futbol. U shunaqa qudratga ega. Faqatgina bunga termamiz chiroyli o'yinlari bilan javob bersa bo'ldi.
Ha, ertaga O'zbekiston termasi yil o'yinida maydonga tushadi. Agar g'alaba qozona olmasa, Rossiyadagi Jahon chempionatiga borish masalasi maksimal darajada yo'qqa chiqadi. Shunchaki, nazariy hisob-kitoblar qoladi, xolos.
Keling, aziz futbol muxlislari! Shu safar ham Suriyaga qarshi o'yinni tasodifga yo'yaylik va futbolchilarimizga ishonaylik. Agar darhaqiqat shunday bo'lsa, ertaga O'zbekiston ishonchli tarzda Qatarni yutishi kerak bo'ladi. Agar yuta olmasa, bilmadik keyin nimalar bo'lishini ...
Hozir vaziyat 4 yil avvalgidan boshqacha. Internet, ijtimoiy tarmoqlar rivojlangan. Bundan tashqari, boshqa nashlarda sport ruknlariga urg'u berish kuchaygan. Askiyachilar, shou-vakillarining bosh mavzulari o'zgargan. Xudo ko'rsatmasin, agar O'zbekiston termasi g'alaba qozona olmasa, oqibatini hech kim aniq ayta olmaydi. Zanjir reaktsiyasi o'sib borib, katta ijtimoiy muammoga aylanib ketishi mumkin. Buni esa, hech kim xohlamaydi.
Biz bir narsani istaymiz va talab qilamiz. Chunki, bunga haqqimiz bor deb o'ylaymiz.
Hurmatli futbolchilar, sizlardan iltimos ozgina mas'uliyatni his qiling. Qaysi o'yinda maydonga tushayotganingizni yana bir marta anglashga harakat qilib ko'ring. Beo'xshov o'yinlar kerakmas ishqibozga. Chunki, har biringizni nimalarga qodir ekanligingizni va saviyangizni xalq biladi. Mana shuni anglab eting.
Biz sizlarni baribir yaxshi ko'raveramiz va ishonamiz!
Suriyaga qarshi mag'lubiyat tasodif ekanligini isbotlang! Qo'lingizdan keladi. Uyog'iga uchta o'yin qoladi va unisi peshonadan endi. Agar Yaratgan bizga mundialga borishni nasib aylagan bo'lsa, boramiz Rossiyaga. Bo'lmasa yo'q: yosh avlodni tarbiyalaymiz, qilgan xatolarimizdan xulosa chiqaramiz.
Do'stlar, birlashaylik. Bugun termamiz har qachongidan ko'proq bizning qo'llab-quvvatlashga muxtojdirlar. Ertaga ular kerakli natija qilib berishadi. Bunga ishonamiz. Boshqa yo'limiz yo'q.
Olg'a, O'zbekiston!
— deya xabar beradi uff.uz nashri.