O'zbekiston terma jamoasi tashvishlari bilan to'la kunlar ham ortda qoldi. Endi e'tiborimiz markazida yana oliy liga bo'ladi. O'zbekiston terma jamoasini qo'ya turing, ichki chempionatda ham yangi mavsum biz uchun kutilmagan sovg'alardan xoli bo'lmayapti. Xususan, «Dinamo» chempionatda bayroqdor bo'lib turishini hech kim kutmagan bo'lsa kerak. Agar voqealar rivoji shu taxlit davom etaversa, samarqandliklar yaqin kunlarda pesh-qadamlikni boy berib qo'yishmasa kerak. Masalan, 4-tur taqvimi bizga aynan shunday xulosa chiqarish imkonini beradi. Ushbu turda e'tiborimizni uchta o'yin tortdi. «DINAMO» - «NAVBAHOR» «Dinamo» ushbu turda o'z maydonida «Navbahor»ni qabul qilishi lozim. Agarda kimdir mavsum boshlanishi oldidan ushbu uchrashuv eng qiziqarlilaridan biri bo'ladi, deganda, aniqki, ishonmasdik. Biroq «Dinamo» 9 ochko bilan musobaqada etakchilik qilmoqda va bu jamoaning har bir o'yini e'tibor markazida bo'lishi turgan gap. Aytaylik, samarqandliklarning 1-turdayoq «Metallurg»ni safarda 2:0 hisobida mag'lub etishlarini kimdir kutganmidi? Mayli, «Sho'rtan»ning yirik hisobda mahv etilishini taxmin qilganlar bordir (3:0), ammo «Paxtakor»ga qarshi kechgan o'yindagi g'alaba-chi? Bunaqa natijani kimdir oldindan ayta olarmidi? Agar mana shu mantiqqa asoslanib fikr yuritadigan bo'lsak, «Navbahor»ga qarshi kechadigan o'yinda ham «Dinamo» ertagi qay taxlit davom etishiga qiziqish bo'lishi turgan gap. Zero «Navbahor» ham anoyi jamoalardan emas. Namanganliklar yangi mavsumda nimalarga qodirliklarini ko'rsatishga urinishlari aniq. «Dinamo» esa o'z muxlislari qarshisida yuzi erga qaramasligi uchun ham bor kuchini tashlaydi. Xullas, Samarqanddagi o'yinni nazardan chetda qoldirmang... «LOKOMOTIV» - «OLMALIQ» «Olmaliq»da yangi mavsum oldidan juda katta o'zgarishlar qilindi. Eng avvalo, Igor Shkvirin boshchiligidagi murabbiylar shtabi to'lig'icha iste'foga chiqarildi va o'rniga qozog'istondan Viktor Kumikov keltirildi. Shuningdek, tarkibda ham ancha o'zgarishlar bo'ldi. Bu esa «Olmaliq» oldiga yangi mavsumda ulkan natijalar qo'yilganini taxmin qilish imkonini berardi. Ammo uchinchi tur yakunlariga ko'ra, jamoa birgina ochko jamg'ardi va 15-o'ringa tushib ketdi. Ammo hamma gap shundaki, mana shu bittagina ochko ham «Bunyodkor»ga qarshi kechgan o'yinda qo'lga kiritildi. Bu hali hammasi emas, davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.