O'zbekiston milliy terma jamoasi yarim himoyachisi Server Jeparov KXDR terma jamoasiga qarshi 12 noyabr kuni o'tkaziladigan o'yin oldidan o'z fikrlarini bildirib o'tdi.
O'zbekiston milliy terma jamoasi safida 110 o'yinda maydonga tushib, 23 golga mualliflik qilgan Server Jeparov eng avvalo, ushbu jamoa bilan Jahon chempionati-2018 ikkinchi saralash bosqichi doirasidagi dastlabki o'yinda uchralgan mag'lubiyat haqida to'xtalib, shunday dedi: “Birinchi o'yindagi mag'lubiyat sabablari sifatida bir nechta omillarni keltirib o'tish mumkin. Avvalo, KXDRga qarshi o'yin Jahon chempionati saralashidagi ilk o'yinimiz edi. Undan tashqari maydon bilan bog'liq muammolar bor edi. Sun'iy maydon tabiiysidan katta farq qiladi. Bu futbol, unda har bir o'yinda ham g'alaba qozonavermaysan. “Maydon tekis, to'p dumaloq”, deyishadi-ku”.
Server KXDR terma jamoasi ustidan Toshkentdagi o'yinda g'alaba qozonish imkoniyatlari haqida ham to'xtalib o'tdi.
“Albatta, bu jamoani yutish mumkin. Biz Shimoliy Koreyani ko'p bora mag'lub etganmiz ham. Faqat bir martagina ularga mag'lub bo'ldik, adashmasam”.
O'zbekistonlik 33 yoshli futbolchi terma jamoa yig'inining ilk kunlaridanoq unda ishtirok eta boshlashiga imkon yaratib bergani uchun “Ulsan” klubi bosh murabbiyidan minnatdor ekanini ham ta'kidlab o'tdi.
“Janubiy Koreyada chempionat yakuniga etyapti va men murabbiy bilan kelishgan holda milliy terma jamoa yig'iniga o'z vaqtida etib keldim. Bunga sharoit yaratib berishgani uchun klub ma'muriyatidan minnatdorman”.
— deya xabar beradi uff.uz nashri.