Yoshlar ligasi debyutanti sanalgan “Qo'qon-1912” jamoasi o'rinbosarlari maqtashga arzigulik natijalarga erishmoqda. Qo'qonlik yoshlar ayni damda musobaqa jadvalida 42 ochko bilan 6-o'rinda borishmoqda. Birinchi davrada "Qo'qon" o'rinbosarlari 12 uchrashuvda mag'lubiyatga uchramagan edilar. Ikkinchi davra boshida biroz barqarorlikni yo'qotgan yoshlar so'nggi beshta o'yinda ham maydonni mag'lub bo'lmagan holda tark etishmoqda. Muhsin Nizomiddinov boshqargan jamoa oxirgi marta 30 sentyabr kuni G'uzorda “Sho'rtan”ga yutqazib qo'ygan edi. Keyingi beshta uchrashuvning ikkitasida g'alaba qozonildi. Uchtasida esa durang natija qayd etildi. Darvoqe, hozirgi kunga kelib, Yoshlar ligasida eng ko'p durangga erishgan jamoa aynan "Qo'qon-1912" o'rinbosarlari bo'lib turishibdi. 29-turdan keyingi statistika quyidagicha: 10 g'alaba, 12 durang, 7 mag'lubiyat.
— deya xabar beradi uff.uz nashri.