Terma jamoa murabbiyi va uning otashin nutqlari bo'lmaganida hafta davomida gonorarsiz qolgan bo'lardim. Babayanning baxtiga jurnalist va muxlis bor, yillar davomida qilgan gunohlarini yuvib turish uchun.
Qatar bilan o'yindan keyin ul kishim ichak uzdi intervyulari bilan yana esda qoldilar. Masalan, “Paxtakor” klubining tanqid qilingani bir shirin chiqqan. Tushunyapsizmi, Babayan “Paxtakor”dan norizo bo'lgan. Emishki, uch nafar futbolchi terma ixtiyoriga jarohat bilan kelgan: Igor Sergeev, Stanislav Andreev va Aleksandr Lobanov.
Bu endi kulishmas, qotib qolish deb atalsa kerak. Kolosovskiy “Paxtakor”da nima qilayotgani va qanday ishlayotgani Babayanga qorong'u, bunday qarasa, uch futbolchi jarohat olib turibdi. “Men ‘Paxtakor’dan noroziman” degandi, hamma “ooov” devordi. Chunki bungacha Babayan va “Paxtakor” so'zlari bir-biriga sinonim bo'lib qolgandi. U esa bitta “pufff” bilan hammaning og'ziga urdi (o'z ko'nglida, albatta).
Matbuot anjumaniga bormaganim — mening aybim. Shundan kelib chiqib, shu xususda tanqidiy fikr bildirishim — mening xatoim. Shunday bo'lsa-da, betni shartta sidirib turib, fikr bildiraman (hamkasblarim, ming bor uzr). Masalan kimdir chiqib, jarohati bo'lsa nega Lobanov va Sergeev maydonga tushdi, deb so'ramagan. Nesterov kasalmi? Yoki uchinchi darvozabon kalmi? Sergeev saralash bosqichining hal qiluvchi raundida qisqa qilib aytganda gol urmadi. Yo'q, biz uni tushiraveramiz. O'zbekistonda hujumchi zoti qurib bitgan. Toki Geynrixdan yosh ekan, o'ynayveradi (Sasha istisno, futbolda uning yoshi hamisha 18).
Masalan yoshroq hujumchi maydonga tushsa, u ham gol urmasligi mumkin (balki urib ham qolar, bilmadim). Biroq biz umidli kimnidir katta maydonda toblashimiz mumkin. Sergeevning nimasini toblamoqchi bo'lamiz? Masalan Samvel aka shu tarkibni eng kuchlisi, dedi. Tan olaman, Birodar Abduraimovning o'yinlarini ko'rmaganman, Shkvirin va Abduraimovlarni uncha yaxshi eslolmayman (tushunib ko'rmaganman-da o'yinini). Lekin Sergeev hech bo'lmaganda Shatskix va Irismetovdan kuchlimas men uchun. Babayan esa unda Ibragimovichni ko'radi (Ibragimovichda Sergeevni ko'rishi ham mumkin).
Mayli, Babayan Lobanov va Sergeevdan boshqasini bilmas ekan, deylik. Bilasizmi nima, u oddiy haqiqatlarni ham bilmaydi. Biz 25 yil davomida vatan manfaati har narsadan ustun deb, bir ishni qoyil qilmadik. Lekin negadiro'zini Shvetsiyadan yuqoriroq ko'radigan Ibrahimovich jahon yulduzi. “Barselona”ni Argentinadan ko'ra ko'proq yoqtiradigan Messi har ikki jamoasi uchun ham qadrli. Demoqchimanki, bizda hammasi tilda. Babayanga qolsa Masharipovning “Lokomotiv”ga o'tishi ham, Lobanovning “mahalliylashtirilishi” ham, Sergeevning Xitoydan qaytib kelgani ham terma jamoa manfaatlari uchun. Hay, barakatopkur, “Paxtakor” manfaatidan boshqa narsani bilmagan odam sifatida hadeb shuni takrorlashdan uyalmaysanmi, desa bo'ladi, bemalol (ura-ura davrlar o'tdi, endi oshkoralik).
Men nega bularni esladim, Babayan klublarimiz bilan ishlashi kerakligi haqida aytdi. Bunisi endi haqorat, o'rtoqlar. Lushanga, Berdievga, Yelichich va qolganlarga nisbatan haqorat, tushunyapsizmi? Babayan kim? Fergyuson? Klopp? Anchelotti yoki Gvardiola? Nima qiladi boshqalarning ishiga burnini suqib? Qanaqa Amerika ochmoqchi, tushunmadim.
Lippi Italiya terma jamoasini jahon chempioni qilgan, lekin A Seriya klublari bilan ishlashga harakat qilmagan. Lyov Germaniyani chempion qildi, buning uchun “Bavariya” yoki “Borussiya” ishiga aralashmadi. Bunday misollarni qalashtirib tashlashim mumkin, u-chi? Gapiga javob berishi mumkinmi?
Masalan menda fikr bor, Iskanderov, Sergeev, Kozak qaysi yilgacha o'sishda davom etdi va ayrimlari qaysi yildan boshlab o'sishdan to'xtadi. Babayan “Paxtakor”ni rasman murabbiy sifatida boshqargan yillar yodingizga kelmayaptimi? Odilni aytmasa, yana kim katta muvaffaqiyatga erishdi? Ha bu Suriyaga ham, Eronga ham, Xitoy-u Koreyaga ham bir xilda tarkib va o'sha-o'sha taktikani qo'llaydigan murabbiy ko'ngli yana nimani tusaydi? “Olmaliq” bilan o'yindan keyin Lushchan Shomurodovni asosiy tarkibda tushira olmaganiga terma murabbiylarini sababchilardan biri sifatida ko'rsatgandi (yaxshi ma'noda). Tasavvur qiling, Desham qo'ng'iroq qilib, Mourinodan Marsyalni maydonga tushirmaslikni so'radi. Katta ehtimol bilan “toshingni ter” degan javobni olsa kerak. Shuni bilgani uchun ham Desham bunday kaltafahmlikka qo'l urmas. Bizda esa hamma Babayandan maslahat olishi kerak. Daho-da u!
Xullas, ahvol shunday. Shpargalka uchun Angliya, Ispaniya, boring ana Yaponiya futboli turgan bir paytda biz “Babayan saboqlari” bilan davom etmoqchimiz. Kim o'zi u degan muxlislar bo'lsa, terma jamoaning so'nggi o'yinlariga boqing. Agar shu futbol bo'lsa, unda Lobanov Buffondir.
P.S. Odil Ahmedovga rahmat. “Kirni ham yuvib ketaveradi, sigirni ham sog'ib ketaveradi”. Babayan esa daraxt tepasida o'tirgan “propessor”ga ko'proq o'xshaydi. O'tirgan joyidan tushirish uchun Anzirat buvi hozir shart emas, ishlasin endi oxirigacha!
Diyor IMOMXO'JAEV
— deya xabar beradi uff.uz nashri.