O'zbekiston KXDR terma jamoalari o'rtasida kechadigan o'yin oldidan o'tkazilgan matbuot anjumanida avval mehmonlar bosh murabbiyi Kim Chang Bok ishtirok etdi. Matbuot anjumani murabbiyning o'yinoldi fikrlari bilan boshlandi.
- O'zbekiston terma jamoasini tarixda ilk marta mag'lubiyatga uchratganimizdan buyon ancha vaqt o'tdi. Bu vaqt oralig'ida juda ko'p o'zgarishlar bo'ldi. Bizning jamoamiz bu o'yinga ajoyib tayyorgarlik ko'rgan va biz aynan shuni isbotlash maqsadida O'zbekistonga kelganmiz.
- O'zbekiston terma jamoasi bilan qay darajada tanishdingiz va bu jamoa haqida qanday videomateriallarga egasiz? Jumladan Filippin va Bahreynga qarshi kechgan o'yinlar bilan tanishib chiqdingizmi?
- Bizga qarshi kechgan uchrashuv va boshqalarini taqqoslaydigan bo'lsak, o'sha vaqtdagi ayrim futbolchilar ayni vaqtda terma jamoada yo'q. Terma jamoadagi 15, 16 va 19 raqamli futbolchilar avval o'ynamagan edi. Avvalgi jamoada asosan tajribali futbolchilar o'ynagan deb o'ylaymiz va ular asosan texnik jihatdan mahoratli edi. Ammo Bahreyn va Filippinga qarshi kechgan o'yinlarda O'zbekiston tarkibida yosh futbolchilar paydo bo'lganini ko'rdik. Ular jismoniy jihatdan kuchli tayyorgarlikka ega va to'liq to'qson daqiqa katta kuch bilan to'p sura oladi?
- Ayni vaqtda KXDRning kuchli va kuchsiz jihatlari haqida nima deya olasiz? Bu o'yinga necha foiz tayyormiz, deb o'ylaysiz?
- O'zbekiston terma jamoasining kuchli va kuchsiz jihatlari haqida gapirmayman. Faqat bo'lgan o'zgarishlar haqida gapiraman. Agar ilgari O'zbekiston asosan maydon markazida o'ynashga urg'u bergan bo'lsa, hozirgi jamoa tezroq o'ynashga va xududlarni to'liq yopishga intilmoqda. Tabiiyki terma jamoada murabbiy o'zgargach, taktika ham o'zgaradi. Ertaga bo'ladigan o'yinda muxlislar ham katta rol o'ynaydi. Bu o'yinda o'zbekistonlik muxlislar stadionni to'ldirib o'tirishiga va bizga qarshi muxlislik qilishiga ishonaman. Agar shuni engib o'ta olsak, maqsadimizga erishamiz, deb o'ylayman.
- Nima sababdan siz JCh saralashining ayrim o'yinlarini tabiiy maysali maydonda emas, balki sun'iy maydonda o'tkazmoqda. Bu ham raqibga qarshi kurashda bir usulmi?
Bu savolga KXDR bosh murabbiyi Kim Chang Bok javob qaytarishni istamadi va KXDR futbol federatsiyasi mas'ul xodimi Janob She javob beradi.
- Biz hech qanday raqibga noqulaylik tug'dirish uchun bu ishga qo'l urmaganmiz. Bu borada asosiy masala shuki, bizning iqlimga tabiiy maysa u qadar to'g'ri kelmaydi va ayni vaqtda yaxshi sifatdagi tabiiy maysa yo'q. Albatta tabiiy maysali maydonlar bor, ammo bu qadar mas'uliyatli o'yinlarga to'g'ri kelmaydi. Shu sababli biz yaxshi sifatdagi sun'iy maydonda o'ynashga majburmiz.
- Ertaga bo'ladigan o'yinda g'alabaga bo'lgan imkoniyatingiz qay darajada deb o'ylaysiz? Durang sizni qanoatlantiradimi?
- Durang bizni texnik jihatdan qanoatlantiradi.
- Terma jamoangiz tayyorgarligida so'nggi ilmiy yangiliklarni qo'llaysizmi? Yoki siz eski, an'anaviy tayyorgarlik tarafdorimisiz?
- Raqiblarni o'rganish borasida yangi texnologiyalar bo'yicha federatsiyamizda alohida bo'lim bor. Ular asosan videomateriallar va boshqa statistik ma'lumotlarga asoslanishadi. Ular bizga to'liq ma'lumot beradilar. Shu bilan birga murabbiy raqibning kuchli va kuchsiz tomonlarini o'z ko'zi bilan ko'rishi shart. Murabbiy ma'lumotlarni tayyorlaydigan departament ko'ra olmagan jihatlarni ham ko'rishi shart.
KXDR bosh murabbiyi Kim Chang Bok bilan o'yinoldi matbuot anjumani yakuniga etdi.

— deya xabar beradi uff.uz nashri.