UEFA «Lion» va «Beshiktosh» klublarini shartli ravishda ikki yil muddatga evrokuboklardan chetlashtirdi, deya xabar qilmoqda tashkilot rasmiy sayti. Shuningdek, ikki jamoa ham 100 ming evro miqdorida jarimaga tortiladi. Bunday qarorga qabul qilinishiga Evropa Ligasi chorak finalidagi o'yinda ikkala klubning ishqibozlari tomonidan yuzaga keltirilgan tartibsizliklar sabab bo'lgan. Avvalroq, UEFA ushbu masala yuzasidan tartib-intizom ishini ochgani haqida xabar bergandik. «Lion» muxlislari ikkinchi goldan so'ng pirotexnika vositalarini ishlatganlar, stadiondagi zinalarni to'sib, maydonga chiqishga intilganlar. Shuningdek, «Beshiktosh» ishqibozlari ham pirotexnikadan foydalanganlar va maydonga har xil buyumlarni uloqtirganlar. Uchrashuv «Beshiktosh» muxlislari tomonidan yuzaga keltirilgan tartibsizliklar sabab bir soat keyin boshlangan edi. Turklar pastki tribunalar tomon pirotexnika vositalarini uloqtirganlar va buning natijasida yuzlab «Lion» muxlislari maydonga qochib chiqishgan edi.
— deya xabar beradi uff.uz nashri.