Bugun milliy terma jamoamiz KXDRga qarshi muhim o'yinda maydonga tushadi. Ushbu o'yin oldidan mutaxassislarni fikrlari bilan qiziqib ko'rdik. Xususan o'z vaqtida milliy termada o'ynagan va bugungi kunda "Metallurg"da katta murabbiy sifatida ish yuritayotgan Abduqahhor Ma'rufaliev UFF.uz internet portaliga o'z fikrlarini bildirib o'tdi.
- Toshkentda bo'ladigan uchrashuv hamma qatori menda ham qiziqish uyg'otganligi rost. Chunki bizning terma jamoa ayni paytda guruhdagi asosiy raqibi bilan hisob-kitob qiladi. Bilasiz, birinchi o'yinda mag'lub bo'lgandik. Endilikda o'sha mag'lubiyat uchun revanch olish vaqti keldi. Nima deyish mumkin? Terma jamoaga yaxshi o'yinchilar taklif qilingan. Shuningdek, chaqirilganlar o'z klublari safida doimiy ravishda maydonga tushib, sport formalarini tiklab olishgan.  Raqibimiz Shimoliy koreya guruhda peshqadam bo'lishiga qaramay, biznikilarda ustunlik bor degan bo'lardim.  
- Bu uchrashuv avvalgisidan farq qiladimi?
- Albatta, farq qiladi. Nega deganda, birinchi o'yinda mag'lub bo'ldik. Lekin o'shanda yigitlarga biroz vaqt etishmadi. Birinchi taymdan keyin vakillarimiz 4:0 hisobida mag'lub bo'layotgandi. Ikkinchi bo'limda esa vaziyat o'zgarib, ikkita gol urib olganimizdan keyin, qolgan vaqt davomida gol kiritishga imkon bo'lmadi. Biz aslida raqibdan kuchsiz emasmiz. Astoydil harakat qilinsa, g'alaba qozonishimiz ham mumkin.
- Nima deb o'ylaysiz, Samvel Babayan KXDRga qarshi o'yinda qanday tarkibni maydonga tushiradi?
- Asosiy raqib bo'lgani tufayli, baribir tajribali o'yinchilarning xizmatidan foydalanadi. Bir so'z bilan aytganda, sinalgan tarkibdan foydalanadi. Chunki yangilarga imkoniyat berish orqali, natijani qo'ldan chiqarishi mumkin. Shuni hisobga olib aytadigan bo'lsak, o'sha eski o'yinchilar maydonga chiqishadi.


— deya xabar beradi uff.uz nashri.