O'zbekiston milliy terma jamoasi bugun, 12 noyabr kuni Jahon chempionati-2018 ikkinchi saralash bosqichi, 7-tur o'yinlari doirasida o'z maydonida KXDR terma jamoasini qabul qiladi.
O'yindan avval guruhdagi holat
O'zbekiston milliy terma jamoasi o'rin olgan saralashning “H” guruhida aynan mana shu ikki jamoa etakchi bo'lib turibdi. KXDR terma jamoasi shu vaqtga qadar besh o'yin o'tkazib, to'rt g'alaba va bir durang natija qayd etgan holda 13 ochko bilan jadvalning birinchi pog'onasidan o'rin olgan. O'zbekiston esa guruhdagi barcha raqiblaridan bir o'yin kam o'tkazgan bo'lib, ayni vaqtda guruhda ikkinchi o'rinni egallab turibdi. Jamoa hisobida 9 ochko bor. Birinchi turda aynan KXDR terma jamoasidan qabul qilib olingan mag'lubiyatdan keyin guruhdagi qolgan uch jamoani mag'lub etgan O'zbekiston milliy terma jamoasi raqiblar darvozasini 12 bora aniq nishonga olib, 5ta gol o'tkazib yuborgan. Shimoliy Koreyada esa 5 o'yinda 9 gol urib, ikkita gol o'tkazib yuborgan. O'tkazib yuborgan har ikki golini ham aynan O'zbekiston terma jamoasi Pxenyandagi dastlabki o'yinida kiritgan. Ushbu saralash bosqichi doirasida boshqa hech bir jamoa KXDR darvozasini ishg'ol qila olgani yo'q.
Guruhda Filippin ham keyingi bosqich yo'llanmasi uchyaun kurashni davoi ettirmoqda. Ayni vaqtda Duley shogirdlari 7 ochko bilan “H” guruhida uchinchi o'rinni egallab turibdi. Bugun ular guruhda so'nggi o'rinni egallab turgan Yaman terma jamoasini o'z maydonida qabul qiladi. Hozircha 6 ochkoga ega bo'lgan Baxrayn esa bu turda dam oladi. H - Guruhi № Jamoa O'yin G'alaba Durang Mag'lubiyat T-N Ochko 1 KXDR 5 4 1 0 9-2 13 2 O'zbekiston 4 3 0 1 12-5 9 3 Filippin 5 2 1 2 5-8 7 4 Bahrayn 5 2 0 3 7-7 6 5 Yaman 5 0 0 5 0-11 0 O'zaro o'yinlar
Ushbu jamoalar shu vaqtga qadar jami 7 bor o'zaro to'qnash kelishgan. O'zaro o'yinlardagi ustunlik O'zbekiston milliy terma jamoasida: 4 g'alaba, 2 durang va 1 mag'lubiyat. Ushbu o'yinlardagi to'plar nisbatida ham ustunlik to'liq O'zbekiston tomonida: 11-6.
Quyida jamolarning barcha o'zaro o'yinlari jadvalini keltirib o'tamiz: 1 07.12.1998 O'zbekiston 4-0 KXDR XIII Osiyo o'yinlari. Gurux uchrashuvi 2 24.12.2007 KXDR 2-2 O'zbekiston Tailand qiroli kubogi 3 29.08.2008 O'zbekiston 0-0 KXDR O'rtoqlik uchrashuvi 4 11.10.2011 KXDR 0-1 O'zbekiston JCh-2014 saralash uchrashuvi 5 11.11.2011 O'zbekiston 1-0 KXDR JCh-2014 saralash uchrashuvi 6 10.01.2015 O'zbekiston 1-0 KXDR Osiyo kubogi 2015. Guruh o'yini 7 16.06.2015 KXDR 4-2 O'zbekiston JCh-2018 saralash uchrashuvi O'yindan oldingi fikrlar
KXDR terma jamoasi bosh murabbiyi Kim Chang Bok:
“Pxenyandagi birinchi o'yin o'tgandan buyon ancha vaqt o'tdi. Har ikki jamoa shundan keyin ancha o'yinlarda maydonga tushdi va ularni muvaffaqiyatli o'tkazdi” — deya so'z boshladi 56 yoshli mutaxassis. — Shuning uchun bu o'yin ahamiyatini futbolchilarimiz yaxshi tushunib turibdi. O'yinga juda yaxshi tayyorgarlik ko'rdik va buni ertaga maydonda isbotlashga harakat qilamiz. Biz bu erga g'alaba uchun keldik. Ammo, agar biz ertangi o'yinda durangga imzo chekadigan bo'lsak ham, texnik tomondan bu biz uchun qoniqarli natija bo'ladi. Chunki, asosiy raqibni o'z maydonimizda mag'lub etib, javob o'yinida durang qayd etgan bo'lamiz. Yana bir muhim jihat shundan iboratki, ertaga O'zbekiston o'z maydonida o'ynaydi va muxlislar ularni qo'llab-quvvatlab turadi. Biz muxlislar bosimini engib o'ta olsak, o'ylaymanki, yaxshi natijaga erisha olamiz”.
O'zbekiston milliy terma jamoasi bosh murabbiyi Samvel Babayan:
“Bizni mas'uliyatli va juda muhim o'yin kutib turibdi. KXDR terma jamoasi guruhimizda peshqadamlik qilmoqda. Shunday ekan ular hurmatga loyiq jamoa. Biz ham o'yinga yaxshi tayyorgarlik ko'rdik. Raqibni juda yaxshi o'rganib chiqdik. Yaxshi o'yin ko'rsatib, muxlislarni xursand qilishga harakat qilamiz. Bilasiz, biz nominal bir hujumchi bilan o'ynab kelyapmiz va bo'lajak o'yinda ham bu sxemadan voz kechmaymiz. Bu chiziqda esa istalgan hujumchi paydo bo'lishi mumkin. Eng muhimi — jamoaviy o'yin. Biz 10 kishi bo'lib hujumga o'tamiz va 10 kishi bo'lib himoyalanamiz. Ob-havo o'yinga ta'sir o'tkazadi, deb o'ylamayman. Undan tashqari, biz Filippinga qarshi o'yinda uzoq vaqt jala ostida o'ynadik. Bu borada tajribaga egamiz. Eratangi o'yin juda muhim. U guruh taqdirini hal qiluvchi ahamiyatga ega. Shuning uchun, muxlislar o'yinga tashrif buyurib, jamoani qo'llab-quvvatlab turishadi, degan umiddamiz”.
Avvalroq, O'zbekiston milliy terma jamoasi bosh murabbiyining ushbu o'yin uchun tanlagan 23 futbolchidan iborat tarkibini e'lon qilgan edik.
Eslatib o'tamiz, o'yin bugun, 12 noyabr kuni “Paxtakor” markaziy stadionida, 18:00da boshlanadi.
— deya xabar beradi uff.uz nashri.