APLning ushbu mavsumi grandlar uchun yo'qotishlarga boy bo'lmoqda. «Arsenal» doimgidek jarohatlar girdobida va ularning har yilgidek og'riqli nuqtasi zahira o'rindig'ining tor ekanligida. «Chelsi» yuqori darajali markaziy yarim himoyachiga ehtiyoj sezayotgan bo'lsa, «Liverpul»da Suaresdan keyin vaziyatlarga so'nggi nuqtani qo'ya oladigan forvard etishmayabdi. «Manchester Yunayted»ga tarkib borasida katta inqiloblar zarur bo'lsa, «Manchester Siti» deyarli butun tarkibini yangilashi lozim. Bugun shu va boshqa TOP Premer-liga klublarining kamchiliklari borasida fikr yuritamiz. «Chelsi» Kuchaytirilishi lozim bo'layotgan nuqtalar: Universal markaziy yarim himoyachi. «Chelsi»ning turnir jadvalida peshqadamlik qilayotgani, jamoaning zaif tomonlarini berkitmoqda. 3-4-3 taktik sxemasida futbolchilarning barchasi o'zlari o'rgangan pozitsiyalarda o'ynashmoqda. Gari Kexill qandaydir sababga ko'ra maydonga tusha olmaydigan taqdirda, uning o'rnini bilintirmaydigan zahirada Kurt Zumadek jismonan baquvvat futbolchi bor. Yozda Kristiansen ijara sarguzashtidan qaytishini inobatga olsak, asosiy tarkibga kirish uchun Natan Ake bilan to'rt nafar himoyachi raqobatlashishadi. Bu esa jamoaning himoyadagi ishonchli o'ynashiga zamin yaratishi mumkin Agar «Chelsi» vaziyat taqozosi bilan hujumkor-himoyaviy o'ynashni ma'qul ko'rsa, Kante singari universal futbolchiga ehtiyoj sezishi tabiiy. Matich hujumkor futbolchi, Fabregas esa himoyalanishda unchalik effekt bermaydi. Demak bunday holatda «Roma» futbolchisi Radja Nainggolan aynan Antonio Konte izlayotgan va uning uslubiga mos tushadigan o'yinchidir. Belgiyalik futbolchining statistik ko'rsatkichlari ancha yuqori holatda: har bir o'yinda raqiblaridan o'rtacha 2,4 marta to'pni olib qo'yadi, 80 % uzatmalari o'z manziliga aniq etib boradi. Uning eng katta ustunligi har ikkala oyog'ida aniq va o'ta kuchli zarba bera olishidir. Shuningdek, bu nuqtaga nomzod yana bir futbolchi bor - bu «Atalanta» bilan mavsumda kashfiyotga aylanayotgan futbolchi Frank Kessi. Ammo «Chelsi» keyingi yili Chempionlar Ligasida uzoqroqqa borishni istasa, o'ng qanotga hujumkor futbolchi sotib olishi kerak. Xuddi «Arsenal»ning eng ishongan futbolchisi Aleksis Sanches singari. Sababi, «aristokratlar» bir necha frontda tarkibni rotatsiya qilishga majbur bo'ladi. «Tottenhem» Kuchaytirilishi lozim bo'layotgan nuqta:Yarim himoya uchun zahira. «Tottenhem»ning yosh avlodi jamoaning ertangi kelajagini belgilab bermoqda. Maurisio Pochettino darhaqiqat Londonda grandlarga qarshilik ko'rsata oladigan jamoa tuzishga erishmoqda. Markaziy himoyachilarning tanaffuslarsiz maydonga tushishayotgani, Pochettino uchun biroz bosh og'riq bo'layotgan bo'lishi mumkin. Lekin potentsiali yuqori bo'lgan Karter-Vikersning maydonda bexato o'ynashga bo'lgan urinishlari, Maurisioning xuddi Dele Alli kabi yana bir yosh futbolchining yangi qirralarini ochayotganidan dalolat berayotgandek, go'yo. Yarim himoyani Dembele va Vanyamaning o'rniga olinadigan futbolchi orqali kuchaytirish mumkin. O'ylashimizcha, bu nuqtaga mos tushadigan futbolchini Pochettino va uning qo'l ostidagi skautlar yaxshi bilishadi. «Shporlar»da ham «Chelsi» singari chiziqlar bo'yicha yaqqol kamchilik yo'q, ammo zahira qanchalik kuchli bo'lsa, natija ham shunga mos bo'ladi.  «Liverpul» Kuchaytirilishi lozim bo'layotgan nuqtalar: Chap qanot himoyachisi, markaziy yarim himoyachi va hujumchi. Mavsum boshida Yurgen Klopp Alberto Moreno uning futbol uslubiga mos kelmasligiga ishonch hosil qildi. Ispaniyalikning dastlabki o'yinlardagi xatolarini kutmagan klub murabbiylari, uning o'rniga zahira futbolchisi olishmaganiga afsuslanishdi. Zudlik bilan esa yarim himoyaning barcha chiziqlarida o'ynagan Jeyms Milner mudofaaning chap qanotiga o'tkazildi. Ingliz futbolchisi hozircha himoyada bexato harakatlanishga urinmoqda, biroq bu faqatgina ushbu mavsum oxiriga qadar ish berishini murabbiylar shtabi yaxshi tushunib turishibdi. Keyingi yili jamoaning katta ehtimol bilan Evropa Chempionlar Ligasida ishtirok etishi va unda kuchli raqiblar, tezkor futbolchilarga qarshi o'ynashini hisobga olib, jangga tajribali, lekin tezlik jihatidan imkoniyatni boy berib qo'yishi mumkin bo'lgan Milnerga ishonch bildirilishi katta tavakkaldir. Hozircha «qizillar» uchun chap qanot himoyasiga eng real va olib kelinishi birmuncha osonroq bo'lgan futbolchi bu «Volfsburg»ning shvetsariyalik a'zosi Rikardo Rodrigesdir. Futbolchi 24 yoshda hamda o'sish davrini boshdan kechirmoqda. Yozda Rikardoning grand jamoalardan birini kuchaytirish ehtimoli bor va agar «Liverpul» uni qo'lga kiritishning uddasidan chiqadigan bo'lsa, bu mersisayd jamoasi uchun juda katta yutuq bo'lar edi. U jismoniy jihatdan ancha kuchli, himoyada ishonchli, hujumni esa keskinlashtira oladi. Shuningdek, Klopp o'z ko'z oldiga Yonas Hektorni ham olib qo'ygan. Agar ingliz futboli ichidan xarid amalga oshirishni istasa, Yurgen uchun so'nggi yillarda Angliya futboli uchun yosh iste'dodlarni etishtirib berayotgan «Sautgempton»ning eng umidli futbolchilaridan Rayan Bertrandni o'z jamoasiga olib kelish ham yomon variant emas. «Qizillar» rahbariyati yozda jamoani yanada qudratli ko'rinish olishi uchun ma'lum summani ajratishga tayyorlar, chap qanot himoyasini esa yuqorida nomlari keltirilgan futbolchilar kuchaytira oladilar. Klubning eng muammoli nuqtasi bu markaziy yarim himoyadir. Ushbu mavsum boshida «Nyukasl»dan xarid qilingan Jorjino Veynaldum jamoa  o'yiniga deyarli kirishib ketdi, ammo unda barqrorlik hozircha ko'rinmayabdi. Maydon markazida Kloppga o'yin davomida 11-12 km masofani bosib o'tadigan, o'yinni kuchaytirish uchun katta kuchga ega bo'lgan tayanch zarurdir. Yil davomida klub hamda Mahmud Daudni bir-biri bilan bog'lashdi, oxir-oqibat Daud Bundesligada qoladigan bo'ldi, faqat o'zining ish joyini boshqa «Borussiya»ga o'zgartirgan holda. Og'riqli chiziqni bartaraf etishga ushbu mavsum sensatsiyalar bosh sababchisi «Leyptsig»ning gvineyalik a'zosi Nabi Keyta bu rolga ideal tarzda mos tushadi. Ushbu mavsumda Nabi har bir o'yinda o'rtacha 2,3 marta raqiblardan to'pni olib qo'ymoqda, 2,6 marta golli vaziyatlar yaratmoqda, darvoza tomon esa 1,4 marta zarba bermoqda. Uning bu ko'rsatkichlari, statistikasining yaxshi tomonda ekanligini bildiradi: 23 o'yin, 7 gol va 7 golli uzatma. Mazkur yarim himoyachini Lallana bilan yaxshi tandem hosil qiladi oladi degan fikrga bemalol kelish mumkin. Jamoa hozirgi pallada yaqqol forvardga ehtiyoj sezmoqda. Sadio Manening jarohat olishi o'yinga salbiy ta'sir o'tkazmay qolmadi. Ammo bu zahirada o'z navbatini kutib o'tirgan futbolchilarga berilgan imkoniyatdan foydalanish uchun yagona yo'l edi. Ahyon-ahyonda gol kiritadigan Daniel Starrij, muhim gollarni uradigan, biroq ba'zida vaziyatlarni ko'kka sovuradigan Divok Origi bilan uzoqqa borib bo'lmasligini barcha yaxshi tushunib turibdi. Mane safga qaytar, lekin keyingi mavsumda jamoaga haqiqiy forvard kerak. Suaresdan keyin bu rolni hech kim yaxshi ijro eta olmadi. Koutino, Firmino, Mane, Origi yaxshi hujumchilar bo'lishi mumkin, ammo ular Obameyang emas. O'zingiz tushungandirsiz... «Manchester Siti» Kuchaytirilishi lozim bo'layotgan nuqtalar: Darvozabon, qanot himoyachilari, tayanch yarim himoyachisi. O'tgan yilning yozida transferlar oynasida juda faol bo'lgan Manchester Siti»ning ko'p xaridlari o'zini oqlamadi. Gvardiola o'zining uslubiga mos tushadigan futbolchilarni yig'ishda davom etyapti, arab shayxlari ham o'z manfaatlari uchun har qanday puldan voz kechishmoqda. Darvoza chizig'iga 34 yoshli Klaudio Bravo olib kelindi, uning APLga to'liq moslashib olishiga bir mavsum kam ekanligi ko'rinib qoldi va Pep hozirning o'zida unga ishonch bildirmay qo'ydi. Eng noodatiy qarorlardan Hartni ortga qaytarish yoki boshqa posbon izlash. Ayni damda «Real Sosedad» darvozasini ishonch bilan qo'riqlab kelayotgan Heranimo Rulli aynan «shaxarliklar» izlayotgan kiperlardan biri. Uning ustun jihatlari oyoqda yaxshi o'ynay oladi - u jamoadoshlariga uzatgan to'plaridan 53% o'z manziliga aniq etib borgan va bu ko'rsatkich uni TOP 5 chempionatlari orasida eng yaxshi ko'rsatkich qayd etayotganidan dalolat bermoqda. Yana bir ustun jihati esa o'z darvozasini uzoq vaqt «quruq» saqlay oladi. Uchinchi ustunligi, havodagi kurashlarda kamdan-kam hollarda xatoga yo'l qo'yadi. To'rtinchisi - posbon «Siti» bilan deyarli kelishuvga erishdi. Tasdiqlanmagan ma'lumotlarga ko'ra, 25 yoshli darvozabonning transferi «Siti»ga 14 mln evroga tushgan va ushbu xarid jamoa manfaatiga ishlashi tabiiy. «Siti»dagi qanot himoyachilari ham APL tezligiga dosh bera olishmayabdi - Klishi, Sanya va Sabaletaning davri o'tgan, klubga yosh, tezkor futbolchilar kerak. Chap qanotga ispaniyaning yosh umidli futbolchisi Aleks Grimaldoning ham «Siti»ga mos tushishi, Gvardiolaga yoqadigan futbolchi bo'lishi aniq. 21 yoshli himoyachi ushbu mavsum Portugaliya chempionatida kam o'yinlarda maydonga tushayotgan bo'lsada, har bir o'yinda o'rtacha 2,1 marta to'pni olib qo'yishi, 2,4 marta sheriklariga golli vaziyatlar yaratishi va 1,3 marta darvoza tomon zarba berishi mumkin. Bundan tashqari undan ham kuchliroq futbolchi bor. Bu ikkala qanotda ham birdek harakatlanadigan - Emersondir. Qisqa vaqt ichida Luchiano Spalettining ishonchiga kirgan braziliyalik iqtidorning to'pni egallab olishlari, tezkorligi, darvoza tomon xavfli reydlar amalga oshirishi «Roma» tiffozilarining olqishiga sazovor bo'lmoqda. Shuningdek, Gvardiolaning jamoasida hozirda yaqqol bitta tayanch yarim himoyachisi etishmayotgani ayon bo'lmoqda. Kamchilikni to'ldirish maqsadida Pep yozda «Borussiya Dortmund»ning 21 yoshli futbolchisi Yulian Vayglni sotib olishga urinib ko'rishi mumkin. Futbolchi xuddiki maydonda o'zini «Busketsning timsoli»dek erkin his qiladi. Uning eng ustun jihati maydonni ko'ra olish va hujumlarni keskinlashtirishda yuqori darajali uzatmalarni bera olishida. Yana bir variant «Monako» hamda Evropaning eng yaxshi penaltichilaridan biri Fabino. Maydonda Vaygl bilan Fabino deyarli bir xil vazifani bajaradi, farqli tomoni u hujumga ko'proq qo'shiladi. «Manchester Yunayted» Kuchaytirilishi lozim bo'layotgan nuqtalar: Markaziy va chap qanot himoya.  Bir qarashda «Manchester Yunayted» tarkibi Premer-ligadagi eng kuchlisidek ko'rinadi. Ammo klub qayd etayotgan natija, hozircha gapimizga isbot bo'la olmaydi. Joze Mourino o'tgan yozda birinchi navbatda himoya markazini kuchaytirishga e'tibor qaratdi va Erik Bayi transferini amalga oshirdi. Darhaqiqat, Bayi transferi o'zini oqlamoqda. Joze yangi boshlanajak mavsumda ham, ximoyadagi kamchiliklarni to'la bartaraf etish uchun bor kuchini ishga solishi aniq. Asosiy nomzod - «Benfika»dan Viktor Lindelef. Shved futbolchisi yosh, jismonan baquvvat va bosh bilan yaxshi o'ynay oladi. Ikkinchi xarid esa «Roma»dan ketishi kutilayotgan Kostas Manolasdir. Grek futbolchisi 25 yoshda va so'nggi yillarda katta o'sishga erishdi. U Italiya chempionatining o'zi ishtirok etgan havodagi kurashlarning 84 % da yutib chiqdi. APL klublariga aynan mana shunday toifadagi himoyachi zarur. «Qizil iblislar» chap qanot himoyasini jamoa rahbariyati Rikardo Rodriges bilan kuchaytirish ehtimoli bor.  «Arsenal» Kuchaytirilishi lozim bo'layotgan nuqtalar: Markaziy hujumchi. «Arsenal» so'nggi 10 yilda juda achinarli ahvolga kelib qoldi. Vengerning transferlarni uncha xushlamasligi, jamoaning bugungi kunda evroarenalardagi muvaffaqiyatsizligi va ichki chempionatda faqat EChLga beriladigan to'rtinchi o'rin uchun kurashishi bunga bosh sabab bo'lmoqda. Rahbariyatning oldida juda jiddiy qaror kutib turibdi - Vengerga ishonch bildirish yoki boshqa murabbiyni olib kelish. Shu kabi «Arsenal» muxlislari ham ikkiga bo'lingan. Ularning ayrimlari «Venger out» desa, boshqalari «Arsenal»ni «Arsenal» qilgan Venger  demoqda.  Bugungi «Arsenal» tarkib bo'yicha kuchli to'rtlikka arziydigan jamoa, biroq  futbolchilarda ko'pincha dadillik etishmayapti. Ayni damda «Arsenal»ga kuchli va tezkor hujumchi kerak. Ular bu borada «Lion» hujumchisi Aleksandr Lyakazettga ko'z tikmoqda. Agar Lyakazett kelsa Sanchesga yana bir aqlli sherik topilgan bo'lardi.  Ammo, «to'pchilar» Chempionlar Ligasiga yo'llanmani qo'lga kirita olmasa, etakchilarni saqlab qolish oson bo'lmaydi. Bu holda tabiiyki, kuchli futbolchilar ham «Arsenal»ga kelishdan bosh tortadi.  Nodirbek Mamatqulov tayyorladi.
— deya xabar beradi uff.uz nashri.