Millliy terma jamoamiz kecha jahon chempionati saralash bosqichi doirasida KXDR termasiga qarshi bahs olib bordi va unda irodali hisobda g'alaba qozondi. Ushbu yutuqning ahamiyati qanchalik ekanligi deyarli hech kimga sir bo'lmasa kerak. Biz uchrashuvga oid ba'zi holatlarni tahlil qildik va terma jamoa bosh murabbiyi Samvel Babayanning ham xizmatlarini alohida e'tirof etib o'tdik.
Babayan termaga g'oliblik shukuhini qaytardi
Milliy terma jamoamiz Mirjalol Qosimov qo'l ostidagi oxirgi 5 ta bellashuvning 4 tasida mag'lubiyatga uchrab bittasida durangga erishgan edi. Bu mag'lubiyatlar Janubiy Koreya, Eron, KXDR va Yaponiya kabi terma jamoalardan qabul qilindi. Shundan so'ng futbolchilarning ruhiyati ham cho'kib qolgani rost. Babayan esa terma jamoaga g'oliblik shukuhini qaytarib berdi. To'g'ri uning qo'l ostida termamiz nisbatan o'rtamiyona yoki kuchsiz raqaiblarni taslim qildi. Biroq ushbu g'alabalar bizga juda va juda zarur edi. Babayan esa buni uddaladi.
Babayan hujumkor futbolni qaytardi
Babayan nafaqat g'alaba shukuhini, shuningdek hujumkor futbolni ham qaytardi desak aslo yanglishmaymiz. Terma jamoamiz yangi bosh murabbiyi qo'l ostidagi 4 ta o'yinda 13 ta gol urdi. Qosimov boshqaruvidagi oxirgi 15 o'yinda hamyurtlarimiz 17 ta gol urishgan edi. O'rtadagi farqning qanchalik katta ekaniga amin bo'lgandirsiz. Asosiysi hujumchilarimizda ham o'zlariga bo'lgan ishonch ortdi. Rashidov va Sergeev 5 o'yinda 4 tadan gol urishdi va terma jamoamizdagi “hujumchilar qabristoni” atamasini yo'qqa chiqarishdi.
Babayan muxlislarni stadionga qaytardi
Babayan qo'l sotida terma jamoamiz qatorasiga uchta g'alabaga erishganidan so'ng, muxlislar yana stadionga qayta boshlashdi. Uchrashuvning sovuqda o'tkazilishi, boz ustiga yomg'ir ostida kechishi, chiptalarning olib sotarlar qo'liga o'tib ketishi ham muxlislarni stadionga tushishiga qarshilik qila olmadi. Ma'lumotlarga qaraganda o'yinga 30 mingga yaqin tomoshabin tashrif buyurgan. Toshkent va Olmaliqda o'tkazilgan oxirgi 8 ta o'yinda muxlislar soni 15 mingdan ortmagan edi. Oxirgi marta stadion Qatarga qarshi (5:1) uchrashuvda to'lgandi. Demak bu muxlislar tashrifi bo'yicha so'nggi 9 o'yindagi eng yaxshi ko'rsatkich. Taqqoslash uchun termamizning oxirgi 6 o'yiniga umumiy hisobda 40 mingta muxlis tashrif buyurgan. Demak, Babayan muxlislarni stadionga qaytarishga ham erishdi!
Davomi Furqat Yusupov blogida.
— deya xabar beradi uff.uz nashri.