Oliy Liga 9-turidan o'rin olgan “Nasaf” – “Neftchi” uchrashuvidan keyin qarshiliklar bosh murabbiyi Ro'ziqul Sa'dullaevich o'yin haqida ushbu fikrlarni bildirib o'tdi. “Bugungi uchrashuvda yigitlarga asosan to'pni ko'proq nazorat qilib, raqibning bo'sh zonalaridan ko'proq foydalanishni aytgan edik, ular bu ko'rsatmalarimizni to'liq ado etishdi. Guvohi bo'ldilaringiz, bu orqali bugun biz haqli  g'alabaga erishdik. Jamoamiz bugun ajoyib o'yin namoyish etdi. Dilshod Rahmatullaev endi o'z formasini tiklab borayapti, bilasizlar u o'tgan mavsumning oxirlarida jarohat olgan edi. U tajribali o'yinchi, albatta keyingi o'yinlarda u bizga to'liq yordam bera oladi. Yil laureati bo'lish albatta yoqimli. Bu nafaqat mening yutug'im, balki butun jamoaning, klubimizning yutug'idir. Bunday sharafga bitta murabbiyning mehnati kamlik qiladi. Avvalo klubimiz rahbarlarining bizga nisbatan ko'rsatayotgan g'amxo'rliklari bu yutuqlarga omil bo'layapti. Qolaversa, buning zamirida butun klubimizning katta mehnati yotibdi. Albatta, e'tirof etaman, menga ovoz bergan mamlakatimizning barcha OAVlariga, jumladan hurmatli jurnalistlarimizga kattadan –katta tashakkurlarimni bildiraman. Ularga ijodiy barkamollik tilab qolaman. “Nasaf” bundan keyin ham muxlislarga chiroyli va mazmunli o'yinlarni  ulashishda davom etaveradi”, – dedi Ro'ziqul Berdiev. 
— deya xabar beradi uff.uz nashri.