Yaqinda internet nashrlarida argentinalik futbolchi Lionel Messining “oltin to'p”ga asosiy da'vogar bo'lgan futbolchilar ro'yxatiga kiritilmaganligi haqidagi xabar chiqdiyu, ko'pchilik bu mavzu borasida fikr bildirishga kirishdi. Aniqrog'i, “France Football” talqiniga ko'ra, bu safar “Oltin to'p” uchun Krishtianu Ronaldu, Antuan Grizmann, Kilian Mbappe va Janluiji Buffonlar kurash olib borishadi. Xo'sh, bu qanchalik adolatli? NOO'RIN QARORLAR QURBONI Messi bu holatdan darg'azab bo'ldi, albatta. Chunki u hali yosh, qolaversa, ancha vaqtdan beri mazkur ro'yxatdan tushmay kelayotgandi. Argentinalik futbolchi o'zining omadsiz o'yinini “Barselona” bosh murabbiysi Luis Enrikening qo'pol taktik xatolari va yon daftarchasidagi qora ro'yxatga tirkalgan futbolchilar — Jeremi Matyo, Andre Gomesh, Luka Din, Aleish Vidal va Pako Alkaserlarning sust o'yini bilan izohlagan. Albatta, bu fikrlarda jon bor, chunki Lionel Messi shu vaqtga qadar 36 ta o'yinda 35 ta gol urishning uddasidan chiqdi. Bu hazilakam natija emas. Ammo futbolchi qanchalik kuchli bo'lmasin, bir o'zi hech narsani hal qila olmaydi. Messi ham oddiy futbolchi, o'zga sayyoralik emas. Aynan yuqoridagi saviyasi Kataloniya klubining darajasiga umuman mos tushmaydigan futbolchilarning omadsiz xatti-harakatlari va Luis Enrikening taktik xatolari natijasida Messining ajoyib o'yiniyu ko'plab gollari hech narsaga yaramadi, shunchaki yuvilib ketdi. Oqibatda “Barselona” hech narsaga erisha olgani yo'q. Jamoaning oldida La Liga va Ispaniya kubogi qoldi, xolos. Umuman olganda, Messi yaxshi harakat qilib, ko'p gollar urdi, ammo bu gollari o'zidan boshqa hech kimga foyda keltirgani yo'q (o'zi shu gollari evaziga “Oltin butsa”ni qo'lga kiritishi mumkin). BUFFON — ENG MUNOSIB NOMZOD Ha, “Yuventus” posboni Janluiji Buffon “Oltin to'p”ga asosiy nomzod. Birinchidan, u shu yoshida ham fantastik o'yin ko'rsatib, irodali futbolchi qanday bo'lishi kerakligini ko'rsatdi. Ikkinchidan, u jamoasiga ancha foyda keltirdi, kerakli vaziyatlarda muqarrar gollardan klubini saqlab qoldi. Uchinchidan, bu Buffon uchun “Oltin to'p”ni qo'lga kiritish yo'lida so'nggi imkoniyat bo'lishi mumkin. Xo'sh, uning “Oltin to'p”ni qo'lga kiritishiga nima xalal beradi? Futbolchining shaxsiy natijasi ham anchagina salmoqli. Yaxshisi, Ronaldu, Grizmann, Mbappe hamda Messining aniq zarbalari va Buffonning seyvlarini solishtirib ko'ring! Ishonamizki, Buffonning aniq zarbalarni qaytarish borasidagi ko'rsatkichlari raqiblarining aniq zarbalaridan kam emas. Qolaversa, nega endi darvozabon “Oltin to'p”ni qo'lga kiritmasligi kerak? Italiya chempionatida Buffon “Yuventus” bilan birga navbatdagi skudettoni qo'lga kiritish arafasida turibdi. Endi posbonning mazkur sovringa ega chiqishini, bizningcha, Evropa Chempionlar ligasining finali hal qiladi. Xabaringiz bor, mazkur matchda “Yuventus” “Real” bilan o'ynaydi. Agar Turin klubi bosh sovrinni o'ziniki qilsa, “Oltin to'p” ham o'z-o'zidan Janluijiga nasib etishi mumkin. Bordiyu aksi bo'lsa, Buffon bu safar ham mazkur sovrindan quruq qolishi hech gap emas, chunki finalda uning “Oltin to'p”dagi asosiy raqobatchisi — Ronaldu ham o'ynaydi. U BUNGA MUNOSIB Agar “Real” Evropa Chempionlar ligasida g'olib chiqsa, Ronaldu “Oltin to'p”ga to'liq munosib bo'ladi. “Nega endi, u to'purarlikda Messidan ortda qolib ketdi-ku!” yoki “U unchalik faol o'ynagani yo'q-ku!” deya e'tiroz bildirishingiz mumkin. Ammo oldingi yillardan farqli ravishda bu safar Ronaldu samarali o'ynadi. Agar uning o'sha “kam sonli” gollari bo'lmaganida “Real” “Bavariya” to'sig'idan o'ta olmasdi. Agar Krishtianuning “kam sonli” gollari bo'lmaganida, “Real” “Atletiko”ga ham yutqazishi mumkin edi. Ayni damda “Real” hamda Ronalduda mavsumni ajoyib tarzda yakunlash imkoni mavjud, jamoa Ispaniya milliy chempionatida g'olib chiqish va EChL bosh sovrinini qo'lga kiritish uchun yaxshi imkoniyatga ega. Agar “oltin dubl” qayd etilsa, shak-shubhasiz, “Oltin to'p” portugaliyalik futbolchiga nasib etadi. OMADSIZ LAHZALAR QURBONI Davomi
— deya xabar beradi uff.uz nashri.