Ispaniya chempionatining 37-turidan o'rin olgan «Real» – «Sevilya» uchrashuvi o'z nihoyasiga etdi. Unda 4:1 hisobi qayd etilib, madridliklarning g'alabasi bilan tugadi. Uchrashuv mezbonlarning tezkor hujumlari bilan boshlandi. Ilk o'n daqiqalikning boshida Marko Asensioni «Sevilya» futbolchilari o'z jarima maydonlari tashqarichida to'xtatib qoldilar. Nacho esa hakam xushtagini kutib o'tirmay to'pni darvozaga joylab qo'ydi, uchrashuv bosh hakami esa golni inobatga oldi va uchrashuvda hisob ochilganini qayd etdi. Uchrashuvning 22-daqiqasi o'tib borayotgan bir vaqtda «Sevilya» maydon markazida to'pni yo'qotdi, mezbonlar esa qarshi hujumdan unumli foydalandilar: Asensiodan to'pni qabul qilib olgan Ronaldu uni Xames Rodrigechga tashlab berdi, kolumbiyalik futbolchining zarbasini darvozabon qaytarishga erishdi, qaytgan to'pni Ronaldu darvozaga joylab qo'ydi. O'tkazib yuborilgan gollardan so'ng mehmonlar bir nechta xavfli hujum tashkil qilishga erishdilar. To'p goh darvoza to'siniga tegsa, gohida Keylor Navas uning yo'liga to'g'anoq bo'ldi. Shu tariqa birinchi bo'lim mezbonlaring ishonchli g'alabasi bilan tugadi. Ikkinchi bo'limni faol boshlagan «Sevilya» futbolchilari taym debyutidayoq gol kiritishga erishdilar. Ajoyib tashkillashtirilgan kombinatsiyani Yovetich chiroyli yakunlab qo'ydi va hisobni qisqartirdi. Uchrashuvning 77-daqiqasi o'tib borayotgan bir vaqtda Toni Kroos jarima maydonchasiga yorib kirdi va to'pni Ronalduga uzatib berdi, portugaliyalik futbolchi esa to'pni darvozaning chap to'qqizlik burchagiga «mixlab» qo'ydi  va o'yindagi dublini nishonladi. O'yinning 84-daqiqasida Toni Kroos Nachoning to'p uzatishidan so'ng «Real»ning to'rtinchi golini kiritdi. Shu tariqa Qirollik klubi ushbu g'alabadan so'ng ochkolari sonini 87 taga etkazdi va birinchi o'rinni  «Barselona» bilan bo'lishib turibdi. Biroq, madridliklar zaxirasida bitta o'yin mavjud. Ispaniya chempionati 37-tur Real Madrid – Sevilya 4:1  Gollar: 1:0 – 10 Nacho, 2:0 – 23 Ronaldu, 2:1 – 49 Yovetich, 3:1 – 78 Ronaldu, 4:1 – 84 Kroos. Real Madrid – Navas, Varan, Nacho, Ramos, Danilo, Kroos, Asensio, Kovachich (Modrich, 72), Xames (Kazemiro, 61), Morata (Vaskes, 61), Ronaldu. Sevilya – Riko, Langle, Merkado, Parexa (Montoyya, 46), Karrisu, Vitolo, Kranevitter, Korrea, Nzonzi, Kron-Deli, Yovetich. Ogohlantirishlar: Danilo (39), Morata (56), Merkado (69), Korrea (80), Nacho (80), Vaskes (83).
— deya xabar beradi uff.uz nashri.