«Agar men ingliz klubining sohibi bo'lganimda, murabbiylikka Toni Pyulisni taklif etardim. U – jamoa ko'zlagan marraning zabt etilishi kafolati. Tonining jamoalari aynan murabbiy o'ylagandek ish tutadilar. Bu –futboldagi eng qiyin vazifa!» - kasbdoshlari tajribasidan nimadir olish ilinjida bo'lgan Joze Mourinoning xulosasi ana shunday. Arsen Venger esa Pyulisga qarshi har bir uchrashuvda Rori Delapning to'pni autdan o'yinga kiritishini ajablanib kuzatadi, Tonining sodda uslubidan ensasi qotadi. Baribir, kasb­doshini cho'rtkesar murabbiy, deb hisoblaydi. Pyulis ixlosmandlari orasida ser Aleksni ham uchratish mumkin. Qiziq, doimo boshidan siyqasi chiqqan kepkasini, egnidan sport kostyumini qo'ymaydigan britaniyalik mutaxassis kim o'zi? «Brom» ximiyasi Pyulis - o'yin uslubini imkoni boricha soddalashtirish evaziga har qanday jamoa bilan rejalashtirilganidan ko'ra yuksak natijani qayd etishga tayyor turadigan murabbiy. Pyulisning futboli Angliya stadionlaridagi pirogni eslatadi: mazasini maqtay olmaysizu, asosiysi, ehtiyojingizni qondirasiz - qorningiz to'yadi. Toni va uning jamoalari - avvallari «Stok Siti», hozir «Vest Bromvich» o'ta jo'n uslub uchun doimiy tanqid ostida. Bosh murabbiy assistenti Deyv Kemp esa ajoyib himoya vositasini topib olgan: «Sizning qanday qilib jamoani tomoshabop qilmoqchi ekaningizni bilmayman. Nima, o'yinchilarni mini-yubkalarda maydonga tushishga majbur etmoqchimisiz?!». Pyulis esa har qanday so'zamol tanqidchini gazetaning so'nggi sonida chop etilgan turnir jadvalini ko'rsatish orqali mum tishlatadi. Darhaqiqat, bir qator «deh­qoncha» qoloq o'yinlarni namoyish etishiga qaramay, uning «Vest Brom»i APL vakillari orasida sakkizinchi pog'onada bormoqda. Bu - albatta, yo'qdan bor qiladigan fidoyi murabbiyning izlanishlari samarasi. Sir emaski, jamoa moliyaviy jihatdan ham, tarkib borasida ham cheklangan imkoniyatlarga ega. Tonining ustakorligi tufayli APL­ning chinakam britancha, jamoasi maqomini olgan «Vest Brom» standart vaziyatlarni o'zi uchun dahshatli qurolga aylantirib olgan: burchak zarbalaridan unumli foydalanish orqali 14ta, jarima zarbalaridan 4ta gol urildi. Ya'ni, APLda standart vaziyatlardan samara chiqarish borasida unga tenglasha oladigan jamoa yo'q. Hatto Evropa top-chempionatlari bo'yicha ham «Vest Brom» etakchi! To'g'ri, «Real» hisobida 20ta, «Monako»da 22ta gol standart mahsuli. Ammo foizlar bo'yicha hisoblanganda, «Vest Brom» (46,15 foiz) oldinda. Shu o'rinda standart vaziyatlarga etarlicha e'tibor bermaydigan mutaxassislarga e'tirozimiz bor: birinchidan, zamonaviy futbolda gollarning uchdan bir qismi aynan shunday holatda uriladi; ikkinchidan, top-chempionatlardagi natijalarni tahlil qiladigan bo'lsak, standart vaziyatlardan samarali foydalanayotgan jamoalar kutilganidan yuqoriroq natijalarga erishganlariga guvoh bo'lamiz. Masalan, «Xoffenxaym» standartlar evaziga EChL yo'llanmasidan biriga da'vogarlik qilmoqda; uchinchidan, allaqachon APLni tark etishi aniq bo'lib ulgurgan «Sanderlend» yaqqol misol bo'la oladi: Sem Ellardays davrida «qora mushuklar» standartda 15ta gol yaratishgandi. Devid Moyes rahbarligida esa atigi 2tagina. Natijani aytib o'tdik. Shular bo'lmaganida, Pyulisning «Vest Brom»i «Sanderlend»ga sherik bo'lardi. «Vest Bromvich» printsiplari Toni Pyulis standartlardan foydalanishga oid bir nechta ishlanmalar yaratgan. «Vest Brom»ning asosiy ustunligi - raqibi uning navbatdagi burchak zarbasini amalga oshirayotganda qanday harakat qilishidan bexabarligida. Toni har bir raqibning imkoniyatlari, uslubidan kelib chiqqan holda turli usullarni qo'llaydi. Uch nafar futbolchining raqib darvozaboni maydonchasida tartibsizliklarni yuzaga keltirishi, biri olis burchak yonida ochilishi, yana ikki nafari darvozabon maydonchasidan chiqib qaytishi mumkin bo'lgan to'pni nazorat qilishi - eng ko'p qo'llaniladigan usul. Chalg'ituvchi tezlanishlar. Jamoaning har bir a'zosi standart vaziyatda ma'lum vazifani ado etadi. Masalan, Solomon Rondon yaqin ustun tomon yugurib, himoyachilarni chalg'itadi. Raqiblar uni to'pga oshiqyapti, deb o'ylashadi. Rondon to'pga eta olgan taqdirda ham zarba bermaydi, balki uni ortida turgan sheriklariga o'tkazib yuboradi. «Uotford» bilan kechgan bahsda aynan shunday manzaraga guvoh bo'ldik: to'p olis ustun hududiga yo'llandi, Solomon baribir yaqin burchak tomon yugurib, himoyachilarni o'ziga jalb etdi. Orqa chiziqdan yugurib chiqadigan jamoadoshiga mo'ljallangan uzatmalar. Bu uslub sof fizika qonuniga asoslangan - to'p sari yugurib kelayotgan futbolchi harakatsiz turgan raqibdan ko'ra ko'proq imkoniyatga ega bo'ladi. Raqib faqat yuqoriga sakrashi mumkin. Pyulis ana shu ustunlikdan samarali foydalanadi. Burchak zarbalari amalga oshirilayotgan payt himoyachilarning faol ishtiroki alohida e'tiborga molik. Tabiiyki, raqib himoya chizig'ida Garet Makauli hamda Kreyg Dousonning tashrifini kutishmagan. Shu sababli ular kimni ta'qib qilish kerakligini bilmay, sarosimaga tushib qolishadi. Aralash ta'qib uslubi (ayrim o'yinchilar hududni qo'riqlashadi, ayrimlari esa personal ta'qibni amalga oshirishadi). Bu usul qo'llanilganda «Vest Brom» o'zini juda erkin sezadi. Arsen Venger Pyulisga qarshi aynan shu usulni qo'llagandi. Qarama-qarshilik Pyulisning foydasiga hal bo'ldi. Xokkeycha chalg'itish. Xokkey uchrashuvlarida hujumchi darvozabon maydonchasi tomon shiddat bilan intiladi. Himoyachi unga tashlanib, maydonchadan chiqarishga urinadi. Natijada darvozabon ro'parasida tortishuvlar yuzaga kelib, zarba yo'nalishini to'sib qo'yadi. «Vest Bromvich» to'pga chiqishda tez-tez xatoga yo'l qo'yadigan darvozabonlarga qarshi shu usulni qo'llaydi. Ko'pincha Pyulis raqib darvozaboni maydonchasiga Darren Fletcherni yo'llaydi. «Arsenal» bilan bo'lgan bahsda «to'pchilar» himoyachisi Darrenni maydondan chiqarishga urindi. Shu tariqa o'zi istamagan holda darvozabonga xalal berdi: to'p yo'llangan pallada Ospina yiqilib tushdi, hujumchi bo'sh qolgan darvozani qiyinchiliksiz zabt etdi. To'siq («zaslon») qo'yish. Basketbolga xos bo'lgan usuldan futbolda ham tobora keng foydalanilmoqda. Toni Pyulis «zaslon»dan kam foydalanadi. Bu vazifa Joni Evans zimmasida. Standartlar chog'ida himoyachi olis burchakdan joy olib, to'pni qaytarishga shaylanib turgan raqib himoyachisiga xalal beradi. Oqibatda himoyachi xavfni bartaraf etolmay qoladi. Garet Makauli «Xall» darvozasini aynan Evansning basketbolcha to'sig'i yordamida ishg'ol etgandi. O'yinchilarning standart vaziyatdagi vazifalari DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.